ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى ساكەن سەيفۋللين ەسكەرتكىشىنىڭ الدىندا «ەستەلىكتەر ەسكىرمەيدى» اتتى جاستار اكتسياسى ءوتتى.
1986 جىلعى جەلتوقسان ۋاقيعاسىنا ءالى ناقتى باعا بەرىلمەي كەلەدى. الايدا, ول قۋعىن-سۇرگىننىڭ سوڭعى تولقىنى بولعانىن كەيبىر تاريحشىلار مويىندايدى. «قازاق ۇلتىنىڭ كوسەمى ءاليحان بوكەيحان ايتقانداي, «حالقىنا, ۇلتىنا, جۇرتىنا قىزمەت ەتۋ ءبىلىمنەن ەمەس, مىنەزدەن». اعا بۋىن – بىزدەر سول مىنەزدى جاستارىمىزدىڭ بويىنان كورگىمىز كەلەدى» دەدى «ناعىز جەلتوقسان» قوعامدىق بىرلەستىگىنىڭ توراعاسى قۇرمانعازى راحمەتوۆ.
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «شاڭىراق» ستۋدەنتتىك تەاترى تاريح عىلىمىنىڭ دوكتورى جامبىل ارتىقباەۆتىڭ زۇلمات جىلدارداعى قازاق وتباسىنىڭ تاعدىرى مەن تاۋقىمەتى بەينەلەنگەن «ءبىر ادامعا ەكى ءولىم جوق» پەساسىنان ءۇزىندى كورسەتتى. قويىلىم بارىسىندا دراما كەيىپكەرلەرىنىڭ ءبىرى «قازاقتىڭ جاۋى – قازاق» دەگەن ءسوزدى ايتادى. «بۇل ءبىزدىڭ ورتامىزعا سىڭىرىلگەن كىرمە ءسوز. قازاق قازاققا ەشقاشان جاۋ بولعان جوق» دەگەن جەلتوقسان قاھارماندارى اباي ابدراحمانوۆ پەن گۇلجامال بايمەنوۆا جاستارعا ونەگە بولاتىن سوزدەردى ايتتى.
شىعارما اۆتورىنىڭ ءوزى پەسانى بالا كەزىندە ەستىگەن اڭگىمە نەگىزىندە جازعانىن, ونىڭ پرەمەراسى كۇزگە جوسپارلانىپ وتىرعانىن جەتكىزدى. ساياسي قۋعىن-سۇرگىن مەن اشارشىلىق جىلدارىنىڭ قاسىرەتىنە توقتالدى. «سول زۇلمات كەزەڭدەردەن امان قالعان قازاق وتباسىلارى كەمدە-كەم. پەسامنىڭ نەگىزگى ماقساتى – رەپرەسسيا بولىپ جاتقان ۋاقىتتا جاقىن اعايىنعا كومەكتەسە الماي, امال جوقتىقتان نكۆد-عا ۇستاپ بەرۋ دراماسىن كورسەتۋ. ءحىح عاسىردىڭ جەتپىسىنشى جىلدارى رادلوۆ «قازاقتار – ەۋرازياداعى, ورتالىق ازياداعى رىتسارلىق قاسيەتىن ساقتاعان جالعىز حالىق» دەگەن ەكەن. ءبىز وسى قاسيەتتەن ناۋبەتتىڭ كەسىرىنەن ايىرىلىپ قالدىق» دەدى ول.
جاستار ماعجان جۇماباەۆ سىندى بوزداقتارىمىزدىڭ ولەڭدەرىن وقىدى. ەسكەرتكىشكە گۇل شوقتارىن قويىپ, ساكەن سەيفۋللين مۇراجايىن ارالادى.
امانعالي قالجانوۆ
