بيىل «نۇر وتان» پارتياسى باسشىلىعىنىڭ باستاماسىمەن ەلىمىزدىڭ بارلىق وڭىرىندە مادەنيەت پەن ونەردى دامىتۋ ماسەلەلەرى جونىندەگى «ميراس» قوعامدىق كەڭەسى قۇرىلعان بولاتىن. سونىڭ استاناداعى ايماقتىق كەڭەسى كەشە العاشقى جيىنىن وتكىزىپ, ەلوردانىڭ ونەرى الەمىندەگى بىرقاتار ماسەلەلەردى تالقىلادى.
جيىنعا توراعالىق ەتكەن پارلامەنت ءماجىلىسىنىڭ دەپۋتاتى, «نۇر وتان» پارتياسى استانا قالالىق فيليالى جانىنداعى مادەنيەت پەن ونەردى دامىتۋ ماسەلەلەرى جونىندەگى «ميراس» قوعامدىق كەڭەسىنىڭ توراعاسى ءامىرحان راحىمجانوۆ الدىمەن ونىڭ ماقسات-مىندەتتەرىمەن تانىستىردى.
كەڭەس استاناداعى مادەنيەت پەن ءبىلىم سالاسى وكىلدەرىنىڭ باسىن قوسا وتىرىپ, ەلوردانىڭ رۋحاني الەمىندەگى ماسەلەلەردى كوتەرىپ, ونى شەشۋ جولدارىن قاراستىرادى. تۇيتكىلدى پروبلەمالار پارلامەنت دەڭگەيىندە كوتەرىلىپ, سوعان بايلانىستى ۇكىمەتكە ناقتى ۇسىنىستار ازىرلەنبەكشى.
كونسۋلتاتيۆتىك كەڭەس وتىرىسىنا قاتىسقان «نۇر وتان» پارتياسى استانا قالالىق فيليالى توراعاسىنىڭ ءبىرىنشى ورىنباسارى ساپار احمەتوۆ باسقوسۋدا تالقىلانعان ماسەلەلەردىڭ شەشىمىن تابۋىنا پارتيا دا ىقپال ەتىپ, ونەردى دامىتۋعا ۇلكەن جاۋاپكەرشىلىك الىپ وتىرعانىن جەتكىزدى.
جيىننىڭ العاشقى وتىرىسىندا ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى عيماراتىنىڭ تارلىعى ءسوز بولدى. ءامىرحان مۇراتبەكۇلى تەاترعا جاڭا عيمارات بەرۋ ماسەلەسى باياعىدان بەرى قوزعالىپ كەلە جاتقانىن, نەگىزگى جوباسى ازىرلەنگەنىن اتاپ ءوتتى.
ال پارلامەنت دەپۋتاتى نادەجدا پەتۋحوۆا مادەنيەت سالاسىندا جالاقىنىڭ ماردىمسىزدىعىنان تارتىپ, قوردالانعان ماسەلەلەر بارشىلىق ەكەنىن ايتا كەلىپ, بۇل جايتتار دۇرىس شەشىمىن تابۋ ءۇشىن ونەر وكىلدەرىنىڭ وزدەرى بەلسەندى بولۋ قاجەتتىگىن ەسكەرتتى.
جيىننىڭ قورىتىندىسىندا «ميراس» قوعامدىق كەڭەسىنىڭ مۇشەلەرى الداعى وتىرىستاردى ونەر وشاقتارىنىڭ بىرىندە ۇجىممەن بەتپە-بەت وتىرىپ وتكىزۋدى جوسپارلاپ, ءتورتىنشى توقسانداعى جۇمىس جوسپارىن بەكىتتى.
قىمبات نۇرعالي
