ەلىمىزگە الەمگە ايگىلى تەننيسشى رافاەل نادال كەلدى. قازاقستان تەننيس فەدەراتسياسىنىڭ شاقىرتۋىن قابىل العان «ۇلكەن شلەم» ءتۋرنيرىنىڭ 14 دۇركىن جەڭىمپازى استانادا بىرقاتار ءىس-شاراعا قاتىستى. يسپان سپورتشىسىمەن بىرگە تانىمال فرانتسۋز تەننيسشىسى جو-ۆيلفريد تسونگا دا ءبىزدىڭ توپىراققا تابان تىرەدى.
24 كۇنى استاناعا جەتكەن وليمپيادا چەمپيونى الدىمەن «Team Kazakhstan» اكادەمياسىنىڭ تالانتتى جاستارىنا شەبەرلىك ساباعىن وتكىزىپ, كەلەسى كۇنى نازارباەۆ ۋنيۆەرسيتەتىندە جۋرناليستەرگە ارناپ ءباسپاسوز ءماسليحاتىن وتكىزدى. سودان كەيىن ۋنيۆەرسيتەتتىڭ ستۋدەنتتەرىمەن كەزدەسىپ, جاستاردىڭ سۇراقتارىنا جاۋاپ بەردى.
«مەن قازاقستان تەننيس فەدەراتسياسىنىڭ پرەزيدەنتىنەن شاقىرۋ العاندا, كوپ ويلانباستان كەلىسىم بەردىم. بۇل – قازاقستانعا العاشقى ساپارىم. ءسىزدىڭ ەلگە كەلگەنىمە وتە قۋانىشتىمىن. قازاقستاندا ۇلكەن تەننيستى دامىتۋ ماقساتىندا ۇيىمداستىرىلىپ وتىرعان شارا – جانكۇيەرلەر مەن جاس تەننيسشىلەر ءۇشىن باعاسى جوق مۇمكىندىك» دەدى نادال.
ال باستى شارا 25 قىركۇيەك كۇنى ساعات 19:00-دە ۇلتتىق تەننيس ورتالىعىندا ءوتتى. وعان دەيىن مەملەكەت باسشىسى قوس سپورتشىنى ارنايى قابىلداپ, كەزدەسۋ الدىندا ايگىلى تەننيسشىلەردىڭ ساپارى ەلىمىزدەگى تەننيستىڭ بۇدان ءارى دامۋى ءۇشىن ماڭىزدى ءرول اتقاراتىنىنا سەنىم ءبىلدىردى.
«بۇل – قازاقستاندىق جاس سپورتشىلار ءۇشىن ۇلكەن ۋاقيعا. سىزدەر ولارعا وزدەرىڭىزبەن ويناۋ مۇمكىندىگىن بەردىڭىزدەر. بۇل ولاردى ايتارلىقتاي ىنتالاندىرۋ بولىپ سانالادى. سونداي-اق, سىزدەر ءبىزدىڭ ەلىمىزگە كەلىپ, ەلوردانىڭ ايتۋلى نىساندارىن كورۋ مۇمكىندىگىنە يە بولدىڭىزدار» دەدى قازاقستان پرەزيدەنتى نۇرسۇلتان نازارباەۆ.
وسىدان كەيىن ەلباسى رافاەل نادال مەن جو-ۆيلفريد تسونگا اراسىنداعى تەننيس ماتچىن تاماشالادى.
نۇريسلام قۇسپانعالي
