جاقىندا France Football باسىلىمى جىلدىڭ ۇزدىك ويىنشىلارىن ماراپاتتاۋ كەشىن وتكىزدى. سالتاناتتى جيىندا «التىن دوپ» يەگەرى انىقتالىپ, قوسىمشا ەكى جۇلدەنىڭ جاڭا جەڭىمپازدارى ماراپاتتالدى.
سالتاناتتى كەشتە «رەال» فۋتبول كلۋبى مەن حورۆاتيا ۇلتتىق قۇراماسىنىڭ جارتىلاي قورعاۋشىسى لۋكا مودريچ «التىن دوپ» جۇلدەسىنىڭ يەگەرى اتاندى. مارتەبەلى سىيلىق حالىقارالىق سپورت جۋرناليستەرىنىڭ داۋىس بەرۋى ناتيجەسىندە انىقتالدى. ونىڭ قورىتىندىسى بويىنشا حورۆات ويىنشىسى 753 ۇپاي جيناسا, 476 ۇپايى بار كريشتيانۋ رونالدۋ («يۋۆەنتۋس», پورتۋگاليا قۇراماسى) 2-ورىندى قاناعات تۇتتى. ال ۇزدىك ۇشتىكتى انتۋان گريزمانن («اتلەتيكو», فرانتسيا قۇراماسى) 414 ۇپايمەن تۇيىندەدى. ەنشىسىندە نەبارى 280 ۇپايى بار ليونەل مەسسي 5-ورىنعا تابان تىرەدى.
ءبىر ايتارلىعى, «التىن دوپتى» 2008 جىلدان بەرى مەسسي مەن رونالدۋ بەس رەتتەن جەڭىپ العان. وسىلايشا 33 جاستاعى حورۆاتيالىق جارتىلاي قورعاۋشى قوس ويىنشىنىڭ ۇستەمدىگىن توقتاتىپ وتىر.
مودريچ حورۆاتيا ويىنشىلارىنىڭ اراسىندا العاش بولىپ ايتۋلى جۇلدەگە قول جەتكىزدى. ال وسىعان دەيىن ۋەفا جانە فيفا نۇسقالارى بويىنشا ۇزدىكتەردىڭ ۇزدىگى اتانعان. ول بيىل «رەال» ساپىندا چەمپيوندار ليگاسىنىڭ ءتورت دۇركىن جەڭىمپازى بولسا, ءتورت جىلدا ءبىر كەلەتىن الەم چەمپيوناتىنىڭ فينالىنا حورۆاتيا قۇراماسىن الىپ شىقتى. بۇعان قوسا رەسەيدە وتكەن ءدۇبىرلى دودانىڭ ۇزدىك ويىنشىسى اتاعىنا يە بولدى.
بۇل كەشتە France Football ەكى بىردەي جاڭا جۇلدە تاعايىندالعانىن حابارلادى. اتالعان باسىلىم جىلدىڭ ۇزدىك جاس ويىنشىسى نوميناتسياسىندا كيلليان مباپپە (پسج, فرانتسيا قۇراماسى) توپ جارعانىن حابارلاسا, العاش رەت ايەلدەر اراسىنداعى ۇزدىك ويىنشىنى انىقتاپ, وعان دا «التىن دوپ» تاپسىراتىنىن ءمالىم ەتتى. ناتيجەسىندە «ليون» فۋتبول كلۋبى مەن نورۆەگيا قۇراماسىنىڭ شابۋىلشىسى ادا حەگەربەرگ جەڭىمپاز اتاندى.
