ەلورداداعى الەۋمەتتىك تۇرعىن ءۇي رەتىندە بەرىلگەن 58 پاتەردە ءۇشىنشى ادامنىڭ تۇراتىندىعى انىقتالىپ وتىر.
بۇعان قالالىق تۇرعىن ءۇي جانە تۇرعىن ءۇي ينسپەكتسياسى باسقارماسى مونيتورينگ جاساۋ ارقىلى كوز جەتكىزىپ وتىر. جاقىندا عانا جۇرگىزىلگەن رەيدتىك قاداعالاۋ بارىسىندا اتالعان تۇرعىن ۇيلەردە مۇلدە بوتەن ادامداردىڭ دا تۇرىپ جاتقانى تىركەلگەن. وسى فاكتىلەر بويىنشا ءتيىستى حابارلامالار جىبەرىلىپ, ورىن العان كەمشىلىكتەردى تاياۋ ۋاقىتتا جويۋ جونىندە نۇسقاۋ بەرىلدى.
2021 جىلى تۇرعىن ءۇي كودەكسىنىڭ زاڭ تالاپتارىنا سايكەس التى مىڭعا تارتا ادام تۇرعىن ۇيگە مۇقتاجدار تىزىمىنەن الىنىپ تاستالعان. قازىر كەزەكتە بەس مىڭنان اسا ادام تۇر.
– تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ نەگىزگى قىزمەتىنىڭ ءبىرى – جالعا بەرۋ تولەمدەردەرىنە مونيتورينگ جاساۋ بولىپ سانالادى. وسىعان سايكەس بەس كەلىسىم شارت بويىنشا تاعى دا قوسىمشا مونيتورينگ جۇرگىزىلىپ, 115, 2 ملن تەڭگە قارىز بار ەكەنى انىقتالدى. بۇعان قوسا تەك قازان-قاراشا ايىندا قارىز ازاماتتاردان 48 ميلليون تەڭگە ءوندىرىلىپ الىنعان, – دەدى ەلوردالىق تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ باستىعى ءانۋار سايىتوۆ.
