بايقوڭىردان كوتەرىلگەن تالاي عارىش كەمەسى جەرگە ورالعاندا, اقمولا وبلىسىنىڭ ايماعىنا قوناتىن. سول ساتتە عارىشكەرلەر جەرگىلىكتى حالىقتىڭ ىستىق ىقىلاسىنا بولەنىپ, تسەلينوگرادتا قوناق بولىپ, شارۋاشىلىقتاردى ارالايتىن.
عارىش الەمىنە ءۇش رەت بارىپ قايتقان كسرو ۇشقىش-عارىشكەرى, ەكى مارتە كەڭەس وداعىنىڭ باتىرى, پولكوۆنيك ۆيكتور ۆاسيلەۆيچ گورباتكو تسەلينوگرادتىقتارمەن 1971 جىلى 28 قاڭتاردا كەزدەستى. تىڭ وڭىرىنە ونىمەن بىرگە ۆلكسم ورتالىق كوميتەتىنىڭ ەكىنشى حاتشىسى ب.پاستۋحوۆ, قازاقستان لكسم ورتالىق كوميتەتىنىڭ ءبىرىنشى حاتشىسى ز.كاماليدەنوۆ كەلدى.
قوناقتاردى تسەلينوگراد وبلىستىق پارتيا كوميتەتىنىڭ ءبىرىنشى حاتشىسى نيكولاي ەفيموۆيچ كرۋچينا قارسى الدى. ول اڭگىمە ۇستىندە قوناقتارعا وبلىستىڭ حالىق شارۋاشىلىعىن وركەندەتۋدەگى تابىسى جونىندە ايتىپ, الداعى ۋاقىتتا ەسىل وڭىرىندە ونەركاسىپ پەن اۋىل شارۋاشىلىعىن دامىتۋدىڭ جوسپارىمەن تانىستىردى. مەيماندار بۇدان سوڭ تىڭ يگەرۋشىلەر سارايىن كورۋگە كەلدى. ولار ونداعى قۇرمەتتى قوناقتار كىتابىنا مىناداي جازۋ قالدىردى: «قىمباتتى دوستار, بۇل ساراي تىڭ يگەرۋشىلەردىڭ تاماشا ەڭبەگىن اتاپ وتۋگە لايىق ەكەن. جاڭا تابىسقا جەتە بەرۋىڭىزگە, قىزىقتى كەزدەسۋلەر وتكىزىپ, سارايىڭىزدى ءان-كۇي وشاعىنا اينالدىرا بەرۋىڭىزگە تىلەكتەسپىز!».
بۇدان سوڭ قوناقتار تسەلينوگرادتىڭ كورنەكتى جەرلەرىمەن, سول كەزدە سالىنىپ جاتقان جاستار سارايىنىڭ قۇرىلىسىمەن تانىستى, «تسەلينوگرادسەلماش», «كازاحسەلماش», كەراميكا كومبيناتى جۇمىسشىلارىمەن جۇزدەستى.
سۋرەتتە عارىشكەر ۆيكتور ۆاسيلەۆيچ گورباتكونىڭ تسەلينوگراد قالاسىنداعى «بەرەزكا» بالاباقشاسىنا كەلگەن ءساتى. 1971 جىل.
عازيزا يساحان
