استانادا ازاماتتاردىڭ قارجىلىق ساۋاتىن ارتتىرۋ ماقساتىندا «قارىزسىز قوعام» جوباسى جۇزەگە اسىپ جاتىر. جوبا اياسىندا ساراپشىلار بيىل 9 مىڭعا جۋىق ادامدى وقىتۋدى جوسپارلاپ وتىر, دەپ حابارلايدى astana-akshamy.kz
كۋرسقا كەز كەلگەن ادام ونلاين تىركەلە الادى. قازاقستاندىقتارعا كۋرستان ءوتۋ بارىنشا ىڭعايلى بولۋى ءۇشىن Qogamfin.kz ارنايى ءبىلىم بەرۋ پلاتفورماسى ازىرلەنگەن.
Qogamfin.kz سايتىنا كىرىپ, «كۋرسقا قاتىسۋ» دەگەن باتىرمانى باسۋى قاجەت. جوباعا قاتىسۋعا نيەتتى ازاماتتار بىرنەشە سۇراققا جاۋاپ بەرەدى. اتى-ءجونى, بايلانىس نومەرى, تۇرعىلىقتى جەرى, الەۋمەتتىك مارتەبەسى مەن جالاقىسىن جانە نەسيە مولشەرىن كورسەتۋى ءتيىس. ساۋالناما سۇراقتارىنا جاۋاپ جولدانعاننان كەيىن جوبانىڭ جەتەكشىلەرى حابارلاسىپ, كۋرس وتەتىن ورىن مەن باسقا دا اقپاراتتاردى ۇسىنادى.
«قارىزسىز قوعام» جوباسى بويىنشا, ەلوردادا ءبىر ۋاقىتتا 5 ورىندا ترەنينگ ۇيىمداستىرىلعان. ارقايسىندا شامامەن 50 ادام ءبىلىم الادى. كۋرستىڭ ۇزاقتىعى 5 كۇن, قازاق جانە ورىس تىلدەرىن تاڭداۋ مۇمكىندىگى قاراستىرىلعان.
جوبا مەنتورلارىنىڭ ءبىرى راۋان ەرعاليەۆتىڭ ايتۋىنشا, 5 كۇندىك بەكىتىلگەن ورتاق باعدارلاما بار.
«الايدا كۋرستىڭ العاشقى ساباعىندا اۋديتوريانىڭ قاجەتتىلىگى مەن سۇرانىسىن انىقتاۋ ماقساتىندا مىندەتتى تۇردە قانداي تاقىرىپتاردىڭ قامتىلعانىن قالايتىنىن انىقتايمىز. كۋرس بەكىتىلگەن تاقىرىپتار بويىنشا وتكەنىمەن, قاتىسۋشىلارىڭ سۇرانىستارى مەن وي-پىكىرلەرى ەسكەرىلىپ, ولاردىڭ سۇراقتارىنا جاۋاپ بەرەمىز», – دەدى ول.
كۋرس باعدارلاماسى قاراپايىم تاقىرىپتان باستالىپ, كۇردەلىگە كوشەدى. ماسەلەن العاشقى كۇنى وتباسى بيۋدجەتىن جوسپارلاۋ جانە باسقارۋ, قولدا بار اقشانى ۇنەمدەۋ جانە كوبەيتۋ جولدارى, نەسيە جانە ونىڭ تۇرلەرى, پايىزدى ەسەپتەۋ فورمۋلاسى, دەپوزيتتەر تۋرالى ايتىلدى. كەيىن ينۆەستيتسيا, بانكروتتىق, قازاقستاننىڭ قور بيرجاسى, اكتسيا مەن وبليگاتسيالار, بروكەرلىك كومپانيالار مەن ولاردىڭ جۇمىسى جايلى تاقىرىپتارعا كوشەدى.
جوبانىڭ تاعى ءبىر ارتىقشىلىعى ءبىر جىل بويى زاڭگەرلەردەن تەگىن كونسۋلتاتسيا الا الادى. ماماندار بانكپەن نەمەسە باسقا دا قارجىلىق ۇيىمدارمەن جاسالعان كەلىسىمشارتتار بويىنشا نەمەسە قۇزىرلى ورگاندارعا جولداناتىن قۇجاتتاردى ساۋاتتى تولتىرۋعا, جالپى قارجى ماسەلەسىنە قاتىستى جاسالاتىن ءاربىر قادامىنا كومەكتەسە الادى.
