كەشە مۋزىكالىق جاس كورەرمەن تەاترىندا «Elorda Aqparat» جشس تاۋەلسىزدىك كۇنى مەرەكەسىنە وراي استانا قالاسى اكىمدىگىنىڭ قولداۋىمەن ۇيىمداستىرعان «تاۋەلسىزدىك جانە ەلوردا» اتتى رەسپۋبليكالىق ءمۇشايرانىڭ قورىتىندى ماراپاتتاۋ كەشى ءوتتى. ادەبي-سازدى كەش فورماتىندا وتكەن جۇلدەلەردى تاپسىرۋ سالتاناتىنا پارلامەنت دەپۋتاتتارى, قوعام قايراتكەرلەرى, استانالىق زيالىلار, ولەڭسۇيەر قاۋىم قاتىستى.
كەشتى اشقان «Elorda Aqparat» جشس ديرەكتورى ولجاس سىدىقبەك وسى جەلتوقسان ايىندا تاۋەلسىزدىك باستاۋى – الاش اۆتونومياسىنىڭ قۇرىلعانىنا 105 جىل تولىپ وتىرعانىن, ۇيىمداستىرۋشىلار وسى ءمۇشايرا ارقىلى الاش قايراتكەرلەرىنىڭ ەڭبەگىن جانە جەلتوقسان كوتەرىلىسىنە قاتىسۋشىلاردىڭ ەرلىگىن ەسكە الىپ, تاۋەلسىزدىككە تاعزىم ەتۋدى كوزدەگەنىن اتاپ ءوتتى. ءمۇشايرا دەمەۋشىسى «بەرەكە ا» كورپوراتسياسى جانە ونىڭ باسشىسى راشكۇل وسپاناليەۆاعا العىس ايتتى.
ءمۇشايرا قاراشا ايىنىڭ باسىندا جاريالانىپ, شارت بويىنشا 40 جاسقا دەيىنگى اقىنداردىڭ ولەڭدەرى ءبىر ايدان استام ۋاقىت قابىلدانعانىن ايتىپ, ەلگە تانىمال, كورنەكتى اقىنداردان قۇرالعان قازىلار القاسىمەن تانىستىردى. ولاردىڭ قۇرامىندا قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى نەسىپبەك ايتۇلى, فيلولوگيا عىلىمدارىنىڭ كانديداتى, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ دوتسەنتى وڭايگۇل تۇرجان, قازاقستاننىڭ ەڭبەك سىڭىرگەن قايراتكەرى, اباي اتىنداعى مەملەكەتتىك سىيلىقتىڭ لاۋرەاتى عالىم جايلىباي بولدى.
– ەگەر تاۋەلسىزدىك بولماسا, استانا بولماس ەدى, سالىنباس تا ەدى. اقمولا كەشەگى كەڭەستىك كەزەڭدە ەڭ قازاعى از بولعان قالا بولدى. ال قازىر ءىرى قالالاردىڭ ىشىندەگى استانا قازاعى ەڭ كوپ مەگاپوليسكە اينالدى. بۇل – تاۋەلسىزدىكتىڭ ارقاسى. تاۋەلسىزدىك بولماسا, قازاقتىڭ بالاسى جان-جاقتان بۇل جەرگە اعىلماس ەدى, – دەدى سەنات دەپۋتاتى نۇرتورە ءجۇسىپ. جيىرما جىلدىڭ ىشىندە استانانىڭ سول جاعالاۋىندا ءۇش-اق عيمارات بولعانىن اتاپ وتكەن سەناتور قازىر تۇتاس قالاعا اينالعانىن ايتتى.
– جاستار استانانى جاقسى كورۋ كەرەك, جىرلاۋ كەرەك. الماتىعا قانشا ولەڭ-جىر ارنالدى, قانشا اندەر شىقتى. استاناعا دا ءدال سونداي سۇيىسپەنشىلىك بولۋى كەرەك دەپ ويلايمىن, – دەدى سەناتور. ءماجىلىس دەپۋتاتى جاناربەك ءاشىمجان «ەLorda Aqparat» جشس جاقسى ىستەرگە ۇيىتقى بولىپ كەلە جاتقانىن, بۇدان بۇرىن بيلياردتان تۋرنير ۇيىمداستىرعانىن اتاپ ءوتىپ, «استانا اقشامى» گازەتىنە جازىلۋعا شاقىردى. 103 اقىننان كەلىپ تۇسكەن 206 ولەڭدى وقىپ شىعۋ وڭاي ءىس ەمەس ەكەنىن ايتقان قازىلار القاسىنىڭ مۇشەسى عالىم جايلىباي وسى ءمۇشايرا ولەڭدەرىن كىتاپ ەتىپ شىعارۋدى ۇسىندى.
استانا قالاسى ىشكى ساياسات باسقارماسىنىڭ باسشىسى داۋرەن بابامۇراتوۆ استانادا تاۋەلسىزدىك كۇنىنە ارنالعان 100-دەن استام ءىرىلى-ۇساقتى ءىس-شارانى وتكىزۋ جوسپارلانعانىن, سونىڭ باسى وسى «تاۋەلسىزدىك جانە ەلوردا» ءمۇشايراسى بولىپ جاتقانىن اتاپ ءوتتى. عالىم جايلىبايدى اباي اتىنداعى مەملەكەتتىك سىيلىق الۋىمەن قۇتتىقتاپ, قالا اكىمدىگى اتىنان اقىننىڭ يىعىنا شاپان جاپتى.
مۇشايراعا بارلىعى 100-دەن استام اۆتوردىڭ ولەڭدەرى كەلىپ ءتۇستى. قازىلار القاسىنىڭ شەشىمىمەن مىنا اقىندار جۇلدەگەر بولدى: بالالارى تاعايىنداعان كورنەكتى مەملەكەت جانە قوعام قايراتكەرى, بيىل تۋعانىنا 90 جىل تولعان «جەزكيىك» اقىن كاكىمبەك سالىقوۆ اتىنداعى ارنايى جۇلدەنى ۇمتىل زارىققان (استانا) يەلەندى. ءۇشىنشى ورىندى قارلىعاش قاشقىنباي (پاۆلودار) جانە ايدىن بايىس (استانا) ءبولىستى. ەكىنشى ورىندى ارشىن نۇرباقىت (الماتى وبلىسى) الدى. ال ءبىرىنشى ورىن ءىلياس مۇقاەۆقا (قاراعاندى) بۇيىردى.
ارنايى جۇلدەنى پارلامەنت دەپۋتاتتارى نۇرتورە ءجۇسىپ پەن جاناربەك ءاشىمجان, ءۇشىنشى ورىن جۇلدەسىن وڭايگۇل تۇرجان مەن اكادەميك, استانا قالاسى قوعامدىق كەڭەسىنىڭ مۇشەسى كارىمبەك كۇرمانالى, ەكىنشى ورىن العانعا عالىم جايلىباي, ال ءبىرىنشى ورىن جۇلدەسىن استانا قالاسى ىشكى ساياسات باسقارماسىنىڭ باسشىسى داۋرەن بابامۇراتوۆ تاپسىردى. جۇلدەگەر اقىندار ولەڭدەرىن وقىدى. مۋزىكالىق جاس كورەرمەن تەاترى ارتىستەرى اقيىق اقىن مۇقاعالي ماقاتاەۆتىڭ ءومىرى مەن شىعارماشىلىعىنان سىر شەرتەتىن «عاشىق جۇرەك» پوەتيكالىق قويىلىمنان ءۇزىندى كورسەتتى. بەلگىلى انشىلەر مەدەت سالىقوۆ پەن كلارا تولەنباەۆا, ە.راحماديەۆ اتىنداعى مەملەكەتتىك اكادەميالىق فيلارمونياسىنىڭ ءانشىسى جاقسىگەلدى ماياساروۆ, قازاق وركەسترىنىڭ دومبىراشىلارى ۇلتتىق اۋەندەردەن شاشۋ شاشتى.
