1990-شى جىلعىلار ءۇشىن بالالىق شاقتىڭ سيمۆولىنا اينالعان «ارىستان پاتشا» ءفيلمنىڭ رەمەيكى رەسپۋبليكالىق پروكاتكا شىقتى. «بولاشاق» كورپوراتيۆتىك قورى «ديسنەيدىڭ» كەزەكتى تۋىندىسىن قازاقشا سويلەتتى.
ادىلەت پەن ادالدىق ءۇشىن كۇرەسكەن ساۆاننا مەكەندەۋشىلەرى تۋرالى بۇل انيماتسيالىق تۋىندىدا اڭدار پاتشاسى مۋفاسانىڭ مۇراگەرى سيمبانىڭ ءومىرى باياندالادى. ءبىر قۋانارلىعى, دۋبلياج رەجيسسەرى ءفيلمدى قازاقشالاۋدا وقىرماننىڭ قۇلاعىنا بارىنشا ءسىڭىستى قازاقشانى قولدانۋعا تىرىسقان ەكەن. ماسەلەن, انيماتسيالىق تۋىندىداعى نەگىزگى كەيىپكەرلەردىڭ ءبىرى مۋفاسانىڭ ءىنىسىنىڭ ەسىمىن ىزعار دەپ اتاعانى – سونىڭ دالەلى.
– كەيىپكەردىڭ تۇپنۇسقاداعى اتى – Scar, ول ورىسشاعا «شرام» دەپ اۋدارىلادى. ال قازاقشا بالاماسى «تىرتىق» قۇلاققا تۇرپىدەي تيەدى ءارى كونتەكسكە دە كەلىڭكىرەمەيدى. اقىرى رەجيسسەردىڭ ۇسىنىسىمەن «ىزعار» دەپ اتاعاندى ءجون كوردىك. بۇل ءسوز كەيىپكەردىڭ قاتىگەز مىنەز-قۇلقىن دا ءدال بەرەدى, ونىڭ ۇستىنە ونىڭ دىبىستالۋىندا ارىستاننىڭ ىرىلى دا بار, – دەيدى Aray Media Group ستۋدياسىنىڭ نەگىزىن قالاۋشى, پروديۋسەر ايگۇل قىدىرعاليقىزى.
سونىمەن قوسا, ءفيلمنىڭ باسقا كەيىپكەرلەرىنىڭ ءسوزى دە ءوز قاسيەتتەرىنە لايىقتالىپ قۇراستىرىلعان. پرايدتىڭ يەسى, كۇللى ساۆاننانىڭ ءامىرشىسى مۋفاسا ارىستان ءبىر قاراعاندا ەلگە اقىلىن ايتار ابىز اقساقالدى ەسكە تۇسىرەدى. ونىڭ فيلم بارىسىندا ماقالداپ سويلەۋى سول سيپاتىن ابدەن اشىپ تۇر.
كورەرمەننىڭ ىشەك-سىلەسىن قاتىرعان قاھارماندار تيمون مەن پۋمبا جايلى دا ايتپاي كەتۋگە بولماس. «اكۋنا ماتاتا» دەگەن ۇراندارىمەن ارقاشان كوڭىلدى جۇرەتىن قابان مەن سۋريكاتتىڭ رولدەرىن جانىبەك مۇساەۆ پەن داۋرەن سەرعازين دىبىستاعان.
– پۋمبانىڭ ءرولىن اۋەلدە ساعادالدى ءۇسىبالى اعامىزعا بەرگەن ەكەن. ورازانىڭ كەزى بولسا كەرەك. سوندا ساعي اعامىز «ورازا كەزىندە حالال ءرول تابىلمادى ما؟» دەگەن ەكەن. پۋمبا قابان عوي. سول ايتپاقشى, «حارام» ءرول اقىرى ماعان بۇيىرىپتى, – دەپ كۇلەدى اكتەر جانىبەك مۇساەۆ.
قوس كەيىپكەر ءبىر-ءبىرىن قازاقى قالجىڭدارمەن قاعىتادى. كەي تۇستا قازاقشا ماقال-ماتەلدەردى ءوز يكەمدەرىنە قاراي تۇرلەندىرىپ العانى دا ءساتتى شىققان. اسىرەسە, سەمىز بۋناقدەنەلىنى «جاۋكەمدەگەن» تيمون «قۋىرداقتىڭ كوكەسىن قۇرت سويعاندا كورەسىڭ» دەگەندە, ەرىكسىز ەزۋ تارتاسىڭ.
مىڭ رەت ەستىگەننەن ءبىر رەت كورگەن ارتىق. قازىرگى تاڭدا «ارىستان پاتشا» ءفيلمى وتاندىق كينوتەاترلاردا قازاق جانە ورىس تىلدەرىندە كورسەتىلۋدە.
