قازاقستاننىڭ قورعانىس سالاسىنىڭ الدىندا ەل قارۋلى كۇشتەرىنىڭ قاتارىن كاسىبي ماماندارمەن تولىقتىرۋ ماقساتى تۇر. وسى ماقسات 2016 جىلى تولىعىمەن ورىندالۋى ءتيىس. قازىردىڭ وزىندە 35 مىڭنان اسا ادام, ياعني جەكە قۇرامنىڭ 70 پايىزدايى اسكەر ساپىندا كەلىسىمشارت نەگىزىندە قىزمەت ەتىپ ءجۇر. قورعانىس مينيسترلىگىنىڭ تاراتقان اقپاراتىنا جۇگىنسەك, بيىلعى قاڭتار-ناۋرىز ايلارىندا 2 مىڭ قازاقستاندىق كەلىسىمشارتپەن اسكەرگە الىنعان. وتان قورعاۋشىلار كۇنى مەرەكەسىنىڭ قارساڭىندا پارلامەنت سەناتىنىڭ دەپۋتاتى, «حالىق قاھارمانى», ارميا گەنەرالى مۇحتار التىنباەۆپەن اسكەرىمىزدىڭ الەۋەتى جايىندا سۇحباتتاسقان ەدىك.
– مۇحتار قاپاشۇلى, بيىل ءتول اسكەرىمىزدىڭ قۇرىلعانىنا 22 جىل تولاتىنىن بىلەسىز. سونىڭ باسى-قاسىندا ءوزىڭىز ءجۇردىڭىز. سول كەزەڭدە الدارىڭىزدان شىققان قيىندىقتىردى سۇراماي-اق قويايىق. دەسەك تە, ارتقا شەگىنىس جاساپ, قازاقستان تاۋەلسىزدىگىن ەندى عانا العان جىلداردى ەسكە الايىقشى.
– وتكەنگە كوز جىبەرسەك, قازاقستان رەسپۋبليكاسىنىڭ ساياسي جۇيەسىن قالىپتاستىرۋ, ەكونوميكانى قايتا جاڭعىرتۋ, الەۋمەتتىك باسىمدىقتاردى انىقتاۋ ءۇشىن ەڭ الدىمەن سەنىمدى اسكەري جۇيە قۇرىلۋى قاجەت ەدى. اسكەرلەرىمىزدى ىدىراعان كسرو قۇرامىنان الىپ, قازاقستاننىڭ زاڭدى قۇزىرەتىنە كوشىرۋ جاعدايىندا قارۋ-جاراقتىڭ, اسكەري تەحنيكانىڭ, ماتەريالدىق قۇرالداردىڭ ساقتالۋىن قامتاماسىز ەتۋ مىندەتى وتكىر ماسەلە كۇيىندە تۇردى. بۇل رەتتە اسكەرلەردىڭ جاۋىنگەرلىك دەڭگەيىن تومەندەتۋگە دە جول بەرمەۋ كەرەك بولدى. قازاقستاننىڭ اسكەري قۇرىلىس تاجىريبەسىنىڭ بولماۋىنا, وتپەلى كەزەڭنىڭ وبەكتيۆتى قيىندىقتارىنا قاراماستان, ءبىز قىسقا مەرزىم ىشىندە قارۋلى كۇشتەرىمىزدى قۇرا الدىق.
– اسكەرىمىز كاسىبي باعىتقا قاراي بۇرىلدى. بۇل ۇدەرىس قازىر عانا قولعا الىندى دەي الماسپىز. ونى وزدەرىڭىز باستاپ بەردىڭىز دەپ ويلايمىز. كاسىبي اسكەر جاساقتاۋدىڭ العىشارتتارى قانداي ەدى؟
– «كادر ءبارىن شەشەدى» دەمەكشى, ەڭ الدىمەن, جەدەل قيمىلدايتىن جانە جاۋىنگەرلىك دايىندىعى كۇشتى ساربازداردى دايارلاۋعا كوڭىل بولدىك. قارۋلى كۇشتەر بەدەلىن تومەندەتىپ الماۋىمىزعا دا نازار اۋداردىق. ول ءۇشىن سول كەزەڭنەن قازىرگە دەيىن قازاقستاندىق اسكەريلەر وزدەرىنىڭ جاۋىنگەرلىك شەبەرلىگىن تۇراقتى تۇردە شىڭداپ تۇرادى. ءبىرىنشى كەزەكتە بۇل – اسكەر مۇمكىندىكتەرىن قاراستىراتىن كوماندالىق-شتابتىق, تاكتيكالىق جانە تاكتيكالىق-ارناۋلى جاتتىعۋلار بولىپ تابىلادى. ولاردىڭ قاتارىندا «شەپ», «ءوزارا ءىس-قيمىل», «بەيبىت ميسسيا» ءتارىزدى ىرگەلى جاتتىعۋ ويىندارى بار. بۇل جاتتىعۋلاردان ءتيىستى قورىتىندىلار شىعارىلادى. اسكەري قۇرىلىمداردىڭ ءوزارا ۇيلەسىمدى قيمىلى كورىنەدى.
وسى تۇرعىدا, ەل قارۋلى كۇشتەرىنىڭ جوعارعى باس قولباسشىسىنىڭ ۇجىمدىق قاۋىپسىزدىك كەلىسىم ۇيىمىنا مۇشە مەملەكەتتەردىڭ جىلدام ارەكەت ەتۋ كۇشتەرىن قۇرۋ باستاماسى ايرىقشا سەرپىلىس بەرگەنىن ايتىپ وتكەن ءجون. زامان تالابىنا ساي قارۋلانعان, كەز كەلگەن قارۋلى قاقتىعىستىڭ الدىن الۋعا نەمەسە تويتارىس بەرە الۋعا قاۋقارلى وسىنشالىقتى كۇشتىڭ قاجەت ەكەنى ارىدەن بەلگىلى بولعان.
– ساربازدارعا قاجەت ءتۇرلى جاتتىعۋلاردىڭ ماڭىزىن اتاپ ءوتتىڭىز. ال, ەندى اسكەر دايىندىعىن كوتەرەتىن وسىنداي جاتتىعۋلارعا ارنالعان ءتيىستى ورىندار قازىردە جەتكىلىكتى دەپ ويلايسىز با؟
– اسكەر دايىندىعىنا ارنالعان اتىس جۇرگىزۋ, اۆياتسيالىق, ارتيللەريالىق, اۋە-دەسانت جانە تاعى باسقا زاماناۋي جاتتىعۋ كەشەندەرى مەن ترەناجەر كلاستارى مول. دايىندىقتار اسپاندا دا, جەردە دە مەيلىنشە ناقتى جاعدايعا جاقىنداتىلعان سيپاتتا ءوتۋى ءتيىس. بۇل رەتتە قۇرلىقتاعى اسكەرلەر مەن اۋە قورعانىسى كۇشتەرىندەگى جاۋىنگەرلىك دايىندىق شەڭبەرىندەگى كورسەتكىشتەردى جەكەلەپ قاراستىرعان ابزال. مىسالى, بولىمشە-ۆزۆود-روتا-باتالون تىزبەگىندە ۇيىمداستىرىلعان اتىس دايىندىقتارىنىڭ كۇندىزگى جانە تۇنگى ساندارى, جۇرگىزۋدىڭ كيلومەتراجى الدىڭعى جىلعىلارمەن سالىستىرعاندا ايتارلىقتاي ىلگەرىلەگەنى بايقالادى. سونداي-اق, اسكەري ۇشقىشتاردىڭ ۇشۋ ساعاتتارى دا ايتارلىقتاي وسكەن.
– كاسىبي اسكەر جاساقتاۋ ماسەلەسىنە ورالايىقشى. ارينە, ول ءۇشىن بىلىكتى ماماندار قاجەت-اق. كادر جايلى ايتقانىڭىزدى اشا تۇسسەڭىز.
– قارۋلى كۇشتەردىڭ دامۋىنا ماماندار كورپۋسىن ۇتىمدى پايدالانۋ ايرىقشا اسەر ەتەدى. دامىعان مەملەكەتتەردىڭ اسكەرى بۇل ءۇردىستى الدەقاشان قابىلداعان. اسكەري قىزمەتشى قىزمەت ەتۋ جىلدارى بويىندا كاسىبي شەبەرلىگىن شىڭداۋدان شەت قالماۋى ءتيىس.
بىزدە كادەت كورپۋسىنىڭ مازمۇنىن ارتتىرعان كاسىبي سەرجانتتار ينستيتۋتى تولىقتاي قالىپتاسىپ بولدى. ءتول قارۋلى كۇشتەرىمىزگە قاجەت مامانداردى ءوز ەلىمىزدە دايارلايمىز. اسكەري ءبىلىم بەرۋ جۇيەسىنە ەنگەن جوعارى اسكەري وقۋ ورىندارى زامان تالابىنا ساي باعدارلاما بويىنشا ءبىلىم بەرۋدە. ءبىر سوزبەن ايتقاندا, كادر دايارلاۋ ماسەلەسى ءوز جولىمەن جۇرگىزىلۋدە. بۇل رەتتە اقتوبە قالاسىنداعى اۋە قورعانىسى كۇشتەرى اسكەري ينستيتۋتىنىڭ ءرولىن جوعارى باعالاعان ءجون. سونىمەن بىرگە, ەكىجاقتى كەلىسىمدەر نەگىزىندە رەسەي, قىتاي, اقش پەن ەۋروپانىڭ بىرقاتار ەلدەرىندە ءبىلىم الىپ جاتقان ماماندارىمىز دا بار.
– اسكەريلەردىڭ كاسىبي دايىندىعىنا ايرىقشا كوڭىل بولىنەتىندىگى بەلگىلى, ال ولاردىڭ الەۋمەتتىك جاعدايلارىن جاقسارتۋ جاعى قالاي؟ اسكەريلەرگە ءۇي بەرىلىپ جاتقانىن جان-جاقتى ناسيحاتتاۋدان بايقاپ قالامىز, الايدا, ولاردىڭ كوبىسى ءالى ءۇيسىز جۇرگەنى جاسىرىن ەمەس. بۇل ماسەلە جۋىق ارادا شەشىلە مە, الدە قيىن ءتۇيىن بولىپ قالا بەرە مە؟
– البەتتە, اسكەريلەردىڭ الەۋمەتتىك تۇيتكىلدەرىن شەشۋ ماڭىزدى ماسەلەلەردىڭ بىرىنەن سانالادى. ماسەلە وڭ شەشىمىن تاپقاندا عانا اسكەردىڭ بەدەلى, ابىرويى بيىكتەيدى. قارۋلى كۇشتەردىڭ جالپى قۇرىلىسى دا وسى ماسەلەگە تىكەلەي بايلانىستى. قارۋلى كۇشتەردىڭ جوعارعى باس قولباسشىسى اتالمىش ماسەلەنى ۇنەمى ءجىتى نازاردا ۇستايدى. ماسەلەنى دۇرىس شەشۋ جولىندا ەلباسىنىڭ بەرگەن تاپسىرمالارى اياسىندا بۇل تاقىرىپتا ايتارلىقتاي ىلگەرىلەۋ بار. وسىدان بەس جىل بۇرىن اسكەريلەردىڭ جالاقى مولشەرى 25 پايىزعا, 2012 جىلى تاعى 25 پايىزعا ءوستى. بۇل رەتتە, اسكەري شەن جانە كاسىبيلىك ءۇشىن تولەنەتىن ۇستەمەاقىنىڭ دا وسكەنىن ايتىپ وتكەن ءجون.
2009 جىلى اسكەريلەردىڭ جانە ولاردىڭ وتباسى مۇشەلەرىنىڭ مارتەبەسى, ولاردىڭ الەۋمەتتىك تۇرعىدا قورعالۋىنا قاتىستى زاڭعا وزگەرتۋلەر ەنگىزىلىپ, سولدات جانە سەرجانت شەنىندەگىلەر كەلىسىمشارت جاساسۋ مەرزىمىنە قاراي ءبىر جولعى كوتەرمە قاراجات الاتىن بولدى. سەگىز جىل قىزمەت ەتكەن اسكەري قىزمەتكەر 50 پايىزداي مولشەردە مەملەكەت ەسەبىنەن جوعارى ءبىلىم الاتىن مۇمكىندىك يەلەندى.
اسكەريلەردى باسپانامەن قامتۋ جاعىنا كەلسەك, بيىل قىستا ءبىز بىرقاتار ارىپتەستەرىمىزبەن بىرگە پرەمەر-ءمينيستردىڭ اتىنا دەپۋتاتتىق ساۋال جولدادىق. ونىڭ سىرى مىناداي: ايماقتارعا ساپار شەڭبەرىندە قارۋلى كۇشتەر, ءىىم ىشكى ىستەر كوميتەتى جانە ۇقك شەكارا قىزمەتى اكادەمياسى اسكەريلەرىمەن كەزدەسۋلەر وتكىزىلدى. سول جەرلەردە شەشۋدى تالاپ ەتەتىن الەۋمەتتىك ماسەلەلەر كوتەرىلدى. سوندا اسكەري قىزمەتكەرلەردى تۇرعىن ۇيمەن, ەڭبەكاقى جانە زەينەتاقىمەن قامتاماسىز ەتۋ ماسەلەلەرى ءالى كۇنگە دەيىن وزەكتى ەكەنىن كوردىك. سول سەبەپتەن سونى كوتەردىك. ول ۋاقىتتا پرەمەر-مينيستر سەرىك احمەتوۆ ەدى عوي. قازىر قورعانىس ءمينيسترى بولعان ول سول تۇيتكىلدەردىڭ شەشىلۋىنە وڭ ىقپالىن تيگىزەدى دەپ ۇمىتتەنەمىن.
– وتانىمىزدىڭ قاۋىپسىزدىگىن ساقتاۋ ءىسى اسكەري قىزمەتشىلەردىڭ دەنساۋلىعىنا تىكەلەي بايلانىستى ەكەنى ءسوزسىز. بۇل سالادا قانداي جەتىستىگىمىز بار دەپ ويلايسىز؟
– قارۋلى كۇشتەردىڭ مەديتسينالىق قىزمەتى اسكەريلەردىڭ جانە ولاردىڭ وتباسى مۇشەلەرىنىڭ دەنساۋلىعى كۇزەتىندە قىراعى تۇر. قارۋلى كۇشتەردىڭ ارداگەرلەرى مەن زەينەتكەرلەرىنە دە تولىق كولەمدە مەديتسينالىق قىزمەت كورسەتىلەدى. اسكەري مەديتسينا سالاسىندا ءوز ىسىنە بەرىلگەن جوعارى بىلىكتى ماماندار قىزمەت ەتەدى دەپ ويلايمىن. ولاردىڭ كاسىبي دەڭگەيىن كوتەرۋ ماسەلەسى كۇن تارتىبىنەن ءتۇسىپ كورگەن ەمەس. مەديتسينالىق مەكەمەلەردىڭ ماتەريالدىق-تەحنيكالىق بازاسىن جەتىلدىرۋ دە نازاردان تىس قالماي كەلەدى.
جىل سايىن اسكەريلەرىمىز جاس شاماسىنا قاراي امبۋلاتورلىق جانە ستاتسيونارلىق جۇيە بويىنشا تەرەڭدەتىلگەن مەديتسينالىق تەكسەرۋلەردەن ءوتىپ تۇرادى. ولاردىڭ قورىتىندىسى بويىنشا ەم الۋدى قاجەت دەپ تاپقان اسكەريلەردى جوسپارلى تۇردە دەمالىس جانە ەم قابىلداۋ شيپاجايلارىنا جىبەرىپ تۇرادى. گوسپيتال مەن ەمحانالارىمىزدىڭ زامان تالابىنا ساي جابدىقتالۋى دا باستى نازاردا.
بۇگىنگى تاڭدا مەديتسينا ماماندارىن دايارلايتىن نەگىزگى كلينيكالىق بازا رەتىندە استانا قالاسىنداعى قورعانىس مينيسترلىگىنىڭ باس اسكەري كلينيكالىق گوسپيتالى مەن الماتىداعى اسكەري كلينيكالىق گوسپيتالداردى ايتۋعا بولادى.
– اسكەري عىلىم مەن اسكەري ونەركاسىپتىڭ ەلىمىزدەگى دامۋى جايىندا نە ايتا الاسىز؟
– قارۋلى كۇشتەرىمىزدەگى عىلىمي جۇمىستىڭ نەگىزگى ماقساتتارى – قارۋلى كۇشتەردىڭ بۇگىنگى جاي-كۇيى مەن بولاشاعىن باعدارلاۋ, قارۋ-جاراق پەن اسكەري تەحنيكانى پايدالانۋ مۇمكىندىگىنە عىلىمي ساراپتاما جاساۋ, اسكەري ءبىلىم بەرۋدى جەتىلدىرۋ. وسىنداي جۇمىستاردى جۇرگىزۋدىڭ جۇيەسى قالىپتاسقان. تۇراقتى نەگىزدە عىلىمي زەرتتەۋلەر جۇرگىزىلىپ تۇرادى.
KADEX حالىقارالىق كورمەسى دە اسكەري الەۋەتىمىزدى كورسەتىپ قانا قويماي, ءتۇرلى عىلىمي زەرتتەۋلەر جۇرگىزۋگە مۇمكىندىك بەرىپ كەلەدى. اتاپ ايتايىق, اتالمىش كورمە بيىل ءۇشىنشى رەت 22-25 مامىر كۇندەرى استانادا ءوتۋى ءتيىس.
قارۋلى كۇشتەر ءۇشىن عىلىمي ماماندار دايارلاۋ ماقساتىندا ءبىلىم جانە عىلىم ءمينيسترىنىڭ بۇيرىعىمەن 2008 جىلى ۇلتتىق قورعانىس ۋنيۆەرسيتەتىندە دوكتورلىق ديسسەرتاتسيالىق كەڭەس اشىلدى. 2009 جىلى اتالعان مينيسترلىكتىڭ مەترولوگيا جانە ستاندارتتاۋ كوميتەتى ۋنيۆەرسيتەتتە دوكتورانتۋرا اشۋعا ليتسەنزيا بەردى. بۇگىنگى تاڭدا ودان جۇزدەگەن ادام عىلىمي اتاق الىپ شىقتى.
– قارۋلى كۇشتەرىمىزدى اسكەري-تەحنيكالىق قۇرالدارمەن جاراقتاندىرۋ ماسەلەسىنە كوڭىلىڭىز تولا ما؟
– بۇل ماسەلەگە كەڭىنەن قاراۋ قاجەت. ەڭ بىرىنشىدەن, اسكەرلەردىڭ يەلىگىندەگى قارۋ-جاراق پەن اسكەري تەحنيكانى اقاۋسىز ۇستاپ تۇرۋ بولسا, ەكىنشى كەزەكتە ۇرىس الاڭىندا قارۋلى قاقتىعىسقا مەيلىنشە سەپتىگىن تيگىزەتىن تەحنيكا مەن قارۋ-جاراقتى ساتىپ الۋ كەرەك. ءۇشىنشى كەزەڭدە نەگىزگى اسكەر تۇرلەرىنە ارنالعان قارۋدى تولىقتاي قايتا الماستىرۋ بولىپ تابىلادى.
قازىرگى زاماندا اقپاراتتىق تەحنولوگيالاردىڭ الار ورنى ەرەكشە. دەمەك, وسى سالاعا جانە بايلانىسقا دا كوڭىل بولەتىن ۋاقىت جەتتى. اسكەرلەردى باسقارۋدىڭ اۆتوماتتاندىرىلعان جۇيەسىن ەنگىزۋ جۇمىستارى جالعاسىن تابۋدا. بۇل جۇمىس اسكەردىڭ بارلىق دەڭگەيىندە كورىنىس تاباتىن بولادى. بۇل رەتتە, اقش, تۇركيا, فرانتسيا, يزرايل ءتارىزدى مەملەكەتتەردىڭ مول تاجىريبەسى ساراپتامادان ءوتتى.
ەلىمىزدە, بۇگىنگى تۇسىنىكپەن ايتقاندا, ەسكىرىپ قالعان, بىراق كۇتۋى مەن كۇزەتۋى قىمباتقا ءتۇسىپ وتىرعان كوپ قارۋ بار. سولاردى ەندىگى جەردە ۇتىمدى پايدالانۋ ماسەلەسىن قاراستىرۋ كەرەك.
جالپى العاندا, قولدا بار جاۋىنگەرلىك تەحنيكا پاركىندەگى ۇلگىلەردى جاڭارتۋ جانە جاڭعىرتۋ مۇمكىندىكتەرىن قاراستىرۋ جانە وتاندىق قورعانىس-ونەركاسىپتىك كەشەندى دامىتۋعا كۇش سالۋ كەرەك.
– ءسىز كەزىندە سىناقشى-ۇشقىش بولدىڭىز. وسى تۇرعىدان سۇراق, ەلىمىزدىڭ اسكەري اۆياتسياسى قالاي دامىپ كەلەدى؟
– قازاقستاننىڭ اۋە كەڭىستىگىنىڭ تىنىشتىعى سەنىمدى قولدا دەۋگە بولادى. ەلىمىزدىڭ اۋە شابۋىلىنان قورعانىس جۇيەسى زامان تالابىنا ساي زەنيتتىك, اۆياتسيالىق, راديوەلەكتروندىق تەحنيكامەن جابدىقتالعان, ءارى تاۋلىك بويى جاۋىنگەرلىك كەزەكشىلىك اتقارادى. بىزدە «ميگ» جانە «سۋ» ماركالى دىبىستان جىلدام, جان-جاقتى جابدىقتالعان جاۋىنگەرلىك ۇشاقتاردىڭ بىرنەشە ءتۇرى بار.
قارۋلى كۇشتەردىڭ ستراتەگيالىق دامۋى شەڭبەرىندە اسكەري اۋە كۇشتەرىنىڭ دامۋ تۇجىرىمداماسى جاسالعان. وسى قۇجاتتىڭ نەگىزىندە «سۋ-27» ۇشاقتارى مەن جاۋىنگەرلىك تىكۇشاقتار قايتا جاڭارتۋدان ءوتىپ ۇلگەردى. سوڭعى ون جىل ىشىندە 100-دەن استام اۆياتسيالىق تەحنيكا كۇردەلى جوندەۋدەن ءوتىپ, تاكتيكا-تەحنيكالىق كورسەتكىشتەرىن جاقسارتتى. بىرنەشە جىل بۇرىن اسكەري-تەحنيكالىق قارىم-قاتىناستار شەڭبەرىندە كاسپي تەڭىزى ايماعىنداعى مۇددەلەرىمىزدى قورعاۋ ماقساتىندا ەكى امەريكالىق تىكۇشاق ساتىپ الدىق.
– «جامان ايتپاي, جاقسى جوق» دەيتىن حالىقپىز. ۋكراينادا بولىپ جاتقان جاعداي سانالى ادامدى ويلاندىرماي قويمايدى. ەل قاۋىپسىزدىگى ماسەلەسىنە اسكەري مامان جانە ساياساتكەر رەتىندە باعا بەرسەڭىز؟
– ءبىز – كوپۆەكتورلى ساياسات ۇستانعان مەملەكەتپىز. ياعني, رەسەي, قىتاي سەكىلدى الپاۋىت ەلدەرمەن, ەۋروپا وداعى مەملەكەتتەرىمەن تەڭ دارەجەلى ەل رەتىندە ارالاسامىز. قازاقستاندا تىلگە, دىنگە, مادەنيەتكە قاراماستان ءبارى تەڭ قۇقىلى ءومىر سۇرۋدە. ياعني, ءبىز الدىمەن ادامبىز, سودان كەيىن عانا قازاقپىز, ورىسپىز, ۋكراينبىز… وسىنىڭ ارقاسىندا ىشكى تۇراقتىلىعىمىز بەرىك ورنىققان.
مۇنداي جاعدايدا كەز كەلگەن مەملەكەتتىڭ دامۋىنا داڭعىل جول اشىق. ياعني, ەل دامۋىنا نە كەرەك؟ بەيبىتشىلىك, كەلىسىم مەن حالىقتىڭ بىرلىگى قاجەت.
قۋاتتى, تۇراقتى قازاقستان جاھاندىق جانە وڭىرلىك تۇرعىدان قاۋىپسىز ەلگە اينالدى. بىزبەن بارلىق ەلدەر ساناسادى. سەرىكتەس بولۋعا دا قۇمار مەملەكەتتەر جەتەرلىك. قازاقستان يادرولىق قاۋىپسىزدىككە قوسقان ۇلەسى مەن حالىقارالىق قاۋىپسىزدىكتى, ينتەگراتسيا مەن جان-جاقتى ەكونوميكالىق ارىپتەستىكتى نىعايتقانى ءۇشىن ۇلكەن بەدەلگە يە بولدى.
تاۋەلسىزدىگىمىزدىڭ العاشقى جىلدارى مەملەكەتتىك شەكارامىزدى بەكىتۋ ءىسى اسا ۇلكەن ماڭىزعا يە ەدى. بۇل جۇمىس ءساتتى اتقارىلدى. مەملەكەت باسشىسى نۇرسۇلتان نازارباەۆ ايتقانداي, شەكارا ماسەلەسىندە شەشىمىن تاپپاعان ماسەلە جوق. بولاشاق ۇرپاق بۇل ءۇشىن باس اۋىرتپايتىن بولادى. بارلىق كورشىلەس ەلدەرمەن ماڭگىلىك دوستىق تۋرالى كەلىسىمشارت جاساستىق. بۇل ەلباسىنىڭ ساليقالى ساياساتىنىڭ ارقاسىندا جۇزەگە اسىرىلدى.
نۇرسۇلتان ءابىشۇلى «قازاقستان-2050» ستراتەگياسىنىڭ ۇلكەن بولىگىن جاستارعا ارنادى. وندا جاڭا قازاقستاندىق پاتريوتيزم ماسەلەسى كەڭىنەن قوزعالعان. بۇل يدەيا – بارلىق يدەيالاردىڭ اتاسى. وتاندى ءسۇيۋ سەزىمى ادامدى العا جەتەلەيدى. ەل ءۇشىن قاسىق قانىن اياماۋعا دا شاقىرادى. ارينە, سونداي كۇن تۋمايدى دەپ ويلايمىن. ەندەشە,الاڭداۋعا دا نەگىز جوق.
– اڭگىمەڭىزگە راحمەت!
امانعالي قالجانوۆ
