استانادا العاش رەت سپيدۆەيدەن الەم چەمپيوناتىنىڭ فينالى وتەدى. مۇز ۇستىندەگى موتوجارىس 3 اقپان كۇنى «الاۋ» مۇزايدىنىندا باستالىپ, ەكى كۇنگە جالعاسادى.
بۇل دودانى استانا اكىمدىگىنىڭ قولداۋىمەن قر اۆتوموتوسپورت فەدەراتسياسى ۇيىمداستىرىپ وتىر. جالپى, حالىقارالىق موتوتسيكل فەدەراتسياسىنىڭ (FIM) بەكىتۋىمەن جەكە ەسەپ بويىنشا 2018 جىلى سپيدۆەيدەن الەم چەمپيوناتىنىڭ فينالى 5 كەزەڭنەن وتەدى. سونىڭ ەڭ العاشقىسى جانە ەڭ تارتىستىسى استانادا سالتانات قۇرادى. ال قالعان كەزەڭدەرى رەسەي, گەرمانيا جانە گوللانديا ەلدەرىندە وتپەك.
ەلوردادا مۇنداي جارىس ءبىرىنشى رەت وتكەلى جاتقانىمەن, ەلىمىزدىڭ بۇل سپورت تۇرىنەن الەمدىك دەڭگەيدە جارىس ۇيىمداستىرۋ تاجىريبەسى بار. ءۇش جىل بۇرىن الماتىنىڭ «مەدەۋ» مۇزايدىنىندا ءار ەلدەن جينالعان موتوتسيكلشىلەر باق سىناعان.
قازاقستاندىق سپورتشىلار بۇل سايىسقا جارىس يەلەرى رەتىندە قاتىسپاق. وتە قىزىقتى, تارتىستى وتەتىن ءتۋرنيردىڭ بيلەتتەرى قازىر ساتىلىپ جاتىر.
ورىنبەك وتەمۇرات
