كەشە استانادا قازاقستان حالقى اسسامبلەياسىنىڭ «مىڭ بالا» رەسپۋبليكالىق مادەني-اعارتۋشىلىق جوباسىنىڭ جەڭىمپازدارى ماراپاتتالدى. سالتاناتتى ءراسىم الدىندا اسسامبلەيا توراعاسىنىڭ ورىنباسارى – حاتشىلىق مەڭگەرۋشىسى دارحان مىڭباي جينالعان قاۋىمدى قر تۇڭعىش پرەزيدەنتى كۇنىمەن قۇتتىقتاپ, جوبانىڭ ماڭىزىنا توقتالدى.
– قازاقستاندىقتاردى بىرىكتىرۋشى فاكتور رەتىندە ءبىز مەملەكەتتىك ءتىلدى ءارى قاراي دامىتۋىمىز كەرەك. مۇنى ەلباسى دا ۇنەمى ايتىپ وتىرادى. تىلگە قۇرمەتىمىز ارقىلى ءبىز ەلىمىزگە دە قۇرمەتىمىزدى بىلدىرەمىز. انا ءتىلدى ءبىلۋ – بارىمىزگە پارىز. ال وزگە تىلدەردى بىلسەك, مۇمكىندىگىمىز مولايا تۇسەدى. ويتكەنى الدىمىزدا تۇرعان مىندەتتەردىڭ ءبارى سوعان سايكەس كەلەدى. ەلباسىمىزدىڭ «رۋحاني جاڭعىرۋ» باعدارلامالىق ماقالاسىندا ءبىلىمنىڭ سالتانات قۇرۋىنا ماڭىزدى ءرول بەرىلگەن. ال ءبىلىمنىڭ وزەگى – ءتىل, ءتىلدى ءبىلۋ. «مىڭ بالا» جوباسىنا قاتىسۋشىلار ۇلكەن بەلەستەن ءوتتى. جوبا ءبىلىم جاعىنان باسەكەلەستىككە ۇيرەتتى. العاشقى بايقاۋعا 45 مىڭ ادام قاتىسسا, وسى جولى ولاردىڭ سانى 50 مىڭنان استى. بۇل كوپ تە, از دا ەمەس. بىراق شىن كوڭىلىمەن, ىقىلاسىمەن مەملەكەتتىك ءتىلدى ۇيرەنۋدە, وقۋدا باسقالارعا ونەگە, ۇلگى كورسەتىپ جۇرگەن ادامداردى بارلىق ۋاقىتتا قۇرمەت تۇتىپ, قولداۋىمىز كەرەك, – دەدى دارحان مىڭباي.
شاراعا قر پارلامەنتى ءماجىلىسىنىڭ دەپۋتاتتارى قاتىستى. سولاردىڭ ءبىرى – بەلگىلى قالامگەر, عالىم, قازاقستاننىڭ ەڭبەك سىڭىرگەن قايراتكەرى ساۋىتبەك ابدراحمانوۆ: «ءبىر ءتىل – ءبىر ادام, ەكى ءتىل – ەكى ادام» دەگەن قازاقتا ءسوز بار دەي كەلە, تىلدەردى ءبىلۋدىڭ ماڭىزى تۋرالى ايتىپ, ماراپاتتاۋ ءراسىمىن باستاپ بەردى.
جوبا جەڭىمپازدارى شەشەندىك ونەرگە باۋليتىن «اسىل ءسوز» مەكتەبى, الاشوردانىڭ 100 جىلدىعىنا ارنالعان «كەمەل ەلدىڭ كەمەڭگەر قالامگەرلەرى» ەسسە بايقاۋى اتالىمدارى بويىنشا ماراپاتتالدى. سونداي-اق, ءتاۋەلسىزدىكتى, قازاقستاندىق ءپاتريوتيزمدى, مەملەكەتتىك ءتىلدىڭ مارتەبەسىن كوتەرۋدى جانە دوستىق پەن بىرلىكتى ناسيحاتتايتىن بەينەروليكتەر بايقاۋىندا توپ جارعاندارعا سىيلىقتار تاپسىرىلدى.
سوڭىندا «مىڭ بالا» جوباسى اياسىندا لاتىن ءالىپبيىنىڭ ستاندارتىن ناسيحاتتاۋعا بايلانىستى «لاتىن ءالىپبيى – جاستار بولاشاعى» اتتى ەركىن پىكىرتالاس الاڭى ۇيىمداستىرىلدى.
امانعالي قالجانوۆ
