نازارباەۆ ورتالىعىندا «كوڭىلدىڭ اسىل پەرنەسى: نۇرسۇلتان نازارباەۆتىڭ ءان شىعارماشىلىعى» ءى رەسپۋبليكالىق ءان بايقاۋىنىڭ قورىتىندى كونتسەرتى ءوتتى. قازاقستان رەسپۋبليكاسى تۇڭعىش پرەزيدەنتى – ەلباسىنىڭ كىتاپحاناسى مەن قورىنىڭ, م.وتەمىسوۆ اتىنداعى وقۋشىلار سارايىنىڭ ۇيىمداستىرۋىمەن وتكىزىلگەن بۇل بايقاۋدا ەلىمىزدىڭ تۇكپىر-تۇكپىرىنەن كەلگەن ورىنداۋشىلار باقتارىن سىنادى.
كونكۋرسقا ەلىمىزدىڭ 98 ءبىلىم بەرۋ مەكەمەسىنەن 138 ءوتىنىم كەلىپ ءتۇسىپتى. ءان بايقاۋىنا رەسپۋبليكانىڭ جالپى ءبىلىم بەرەتىن مەكتەپتەرىنىڭ وقۋشىلارى, 12 مەن 14 جاستاعى جانە 16 مەن 18 جاستاعى جەكە ونەر جانە ۇجىمدىق ۆوكال توپتارى (دۋەت, تريو, كۆارتەت) قاتىسقان. ىرىكتەۋ تۋرىنان كەيىن كونكۋرستىڭ فينالىنا وزدەرىنىڭ تاماشا ۆوكالدىق قابىلەتتەرى مەن ورىنداۋشىلىق شەبەرلىكتەرىن كورسەتكەن 30 نومينانت جولداما العان.
مەملەكەت باسشىسىنىڭ دارىندى جاستاردى قولداۋعا باعىتتالعان يدەيالارىن دارىپتەۋ ماقساتىندا ۇيىمداستىرىلعان بايقاۋعا بەلگىلى كومپوزيتور كەڭەس دۇيسەكەەۆ توراعالىق ەتىپ, ءتۇرلى نوميناتسيالار بويىنشا جەڭىمپازداردى انىقتادى.
– ءبىز بۇل بايقاۋدى سوڭعى ەكى جىلدا قاتارىنان قالالىق دەڭگەيدە وتكىزدىك. بيىل ونى العاش رەت رەسپۋبليكالىق دەڭگەيدە وتكىزىپ جاتىرمىز. ەكى جىلدىڭ ىشىندە ءبىز كونكۋرستىڭ نەگىزگى ءۇش باعىتىن انىقتاپ الدىق. بۇل – پرەزيدەنتتىڭ ولەڭ جولدارىنا جازىلعان اندەر, مەملەكەت باسشىسىنىڭ سۇيىكتى اندەرى مەن پاتريوتتىق تاقىرىپتا بايقاۋعا قاتىسۋشىلاردىڭ اۆتورلىق تۋىندىلارى. بايقاۋدىڭ ەرەكشەلىگى – وعان قاراپايىم مەكتەپ وقۋشىلارىنىڭ قاتىسۋىندا. ولار كاسىبي دەڭگەيدە ونەر مەكتەبىندە ءبىلىم الىپ جاتقان ورەندەر ەمەس, – دەدى ەلباسى كىتاپحاناسى ديرەكتورىنىڭ ورىنباسارى بوتاگوز قايىپوۆا.
سايىس قورىتىندىسى بويىنشا باس جۇلدەنى قوستاناي قالاسىنان كەلگەن تەمىرلان سامۋراتوۆ جەڭىپ السا,
«بابامنان قالعان كەڭ دالا» نوميناتسياسى بويىنشا 12-15 جاس ارالىعىندا ءى ورىندى قاراعاندىلىق الەكساندرا پوتاپكينا يەلەندى. «پرەزيدەنتىمىزدىڭ سۇيىكتى ولەڭدەرىنىڭ تولقىنىندا» نوميناتسياسى بويىنشا 12-14 جاس ارالىعىندا ءى ورىندى قاراعاندى وبلىسىنان ەكاتەرينا سۋشكوۆا قانجىعاسىنا بايلاسا, وسى اتالىمداعى 15-18 جاس ارالىعىنداعى ءى ورىندى استانا قالاسىنىڭ №30 مەكتەبىنىڭ مۋزىكالىق كۆارتەتى الدى. «پاتريوتتىق تاقىرىپتاعى اۆتورلىق شىعارما» نوميناتسياسى بويىنشا ءى ورىن استانالىق رۇستەم عازيزوۆكە بۇيىردى.
جەڭىمپازداردىڭ بارلىعى ديپلومدارمەن جانە باعالى سىيلىقتارمەن ماراپاتتالدى.
گۇلجان راحمان
