مىڭجىلدىق شاھاردىڭ مەرەيى
قر تاۋەلسىزدىگىنىڭ 25 جىلدىعىنا ارنالعان «قۋاتتى ءوڭىر – قۋاتتى قازاقستان» باعدارلاماسىنىڭ اياسىنداعى شارالار استاناداعى الماتى قالاسىنىڭ كۇندەرىمەن تۇيىندەلدى. مىڭجىلدىق شاھار مادەنيەتى ەكى كۇن بويى ەلوردادا سالتانات قۇردى.
قر ۇلتتىق مۋزەيىندە وتكەن «الماتى – تاۋەلسىزدىكتىڭ التىن بەسىگى» اتتى مۋلتيمەديالىق كورمە مەن الاتاۋ باۋرايىنا جايعاسقان قالا تۋرالى فوتوكورمەگە 30-دان استام ارحەولوگيالىق تاريحي جادىگەر مەن 100-گە جۋىق فوتوسۋرەت قويىلدى.
كورمەنى اشقان الماتى قالاسىنىڭ اكىمى باۋىرجان بايبەك كورمەنىڭ تاقىرىبىنا توقتالدى. ونىڭ ايتۋىنشا, قازاقستان كونستيتۋتسياسى, ەگەمەندىك تۋرالى دەكلاراتسيا, ۇلتتىق ۆاليۋتامىز – تەڭگەنى شىعارۋ تۋرالى شەشىم الماتىدا قابىلداندى. سەمەي پوليگونىن جابۋ تۋرالى جارلىق تا بۇل شاھاردا شىعارىلدى. سوندىقتان تاڭ-دالعان تاقىرىپ تا كورمەگە ساي كەلىپ تۇر.
ال قر ۇلتتىق اكادەميالىق كىتاپحاناسىندا الماتىلىق اقىندار وقىرماندارمەن كەزدەستى. ولاردىڭ اراسىندا كيەلى تۇركىستاننىڭ كەشەگىسى مەن بۇگىنگىسىن جىرعا قوسقان قاسىمحان بەگمانوۆ, «تۇلپارعا مىنگەن ۇلى دالانىڭ, تارپاڭ مىنەزدى ۇلى بولامىن» دەپ جىرلايتىن مارالتاي رايىمبەكۇلى, س.مۇقانوۆ پەن ع.مۇسىرەپوۆتىڭ مەملەكەتتىك ادەبي-مەموريالدىق مۋزەي كەشەنىنىڭ ديرەكتورى ادىلعازى قايىربەكوۆ, جاناربەك ءاشىمجان, ەسەي جەڭىسۇلى سىندى بەلگىلى اقىندار بولدى. الماتىدان ارنايى كەلگەن قوعام قايراتكەرى, قازاق ءتىلىنىڭ جاناشىرى اسىلى وسمان كەلەلى اڭگىمە ءوربىتتى.
ەل تاۋەلسىزدىگىنىڭ شيرەك عاسىرلىق مەرەيتويى مەن قالانىڭ مىڭ جىلدىعىنا وراي الماتى رۋحانياتىندا بيىل ەلەۋلى جاڭالىقتار ورىن الدى. جاقىندا قالادا «الاتاۋ» ءداستۇرلى ونەر تەاترى مەن ءداستۇرلى مۋزىكانىڭ مۋلتيمەديالىق ورتالىعى اشىلدى. الماتى اكىمىنىڭ ورىنباسارى ارمان قىرىقباەۆتىڭ سوزىنشە, ەندى جاقىندا قالا تاريحىنا ارنالعان مۇراجاي ەسىگىن شالقايتا اشپاق.
وتكەن سەنبى كۇنى بەيبىتشىلىك جانە كەلىسىم سارايىندا الماتىنىڭ ەسترادا-سيمفونيالىق وركەسترى جانە قازاقستاندىق ەسترادا جۇلدىزدارىنىڭ قاتىسۋىمەن قر تاۋەلسىزدىگىنىڭ 25 جىلدىعىنا ارنالعان گالا-كونتسەرت ءوتىپ, وندا ايقىن تولەپبەرگەن, لۋينا, ديماش قۇدايبەرگەن, ديانا شاراپوۆا, ءالي وقاپوۆ, «مۋزارت» ءانسامبلى, «قوڭىر», «كەشيۋ», «جىگىتتەر», «سارىن» جانە «رينگو» توپتارى ءان سالدى.
ال جەكسەنبى كۇنى بۇل سارايدا ءداستۇرلى مۋزىكا وكىلدەرى استانالىقتاردى «ماڭگىلىك مۇرات» اتتى كونتسەرتتە ءان-كۇيمەن سۋسىنداتتى. ولاردىڭ اراسىندا «سازگەن سازى» فولكلورلىق-ەتنوگرافيالىق وركەسترى, نۇرجان جانپەيىسوۆ, تالعات ابۋعازى, ايگۇل قوسانوۆا, شولپان دارجانوۆا, ۇلجان بايبوسىنوۆا, تىلەۋلەس قۇرمانعاليەۆ سىندى انشىلەر, كۇيشىلەر مەن جىرشىلار بولىپ, ۇلتتىق مۋزىكانىڭ مايەگىن ۇسىندى.
تەاتر سۇيەر قاۋىم دا نازاردان تىس قالمادى. الماتىداعى مەملەكەتتىك قۋىرشاق تەاترى استانا قالاسىنىڭ ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ساحناسىندا «التىن ادام» ەپيكالىق سپەكتاكلىن جانە بالالارعا ارناپ «كۋكلى شوۋ» مەرەكەلىك قويىلىمىن قويدى.
امانعالي قالجانوۆ