گروزنىي قالاسىندا اۋىر اتلەتيكادان رەسەي فەدەراتسياسى پرەزيدەنتىنىڭ كۋبوگى ءۇشىن حالىقارالىق تۋرنير مارەسىنە جەتتى.
2016 جىلى ريو-دە-جانەيرودا وتەتىن جازعى وليمپيادا ويىندارىنا ليتسەنزيا بەرىلەتىن جارىستا قازاقستاندىق سپورتشىلار جاقسى كورسەتكىشكە قول جەتكىزدى.
الدىمەن ايتارىمىز, يليا يلين تاعى دا ايدى اسپانعا شىعاردى. 105 كەلى سالماقتا سىنعا تۇسكەن ساڭلاعىمىز وسى تۋرنير بارىسىندا ەكى مارتە الەم رەكوردىن جاڭارتتى. اتاپ ايتقاندا, جۇلقا كوتەرۋدە 191 كەلىنى باعىندىرىپ, الدىنا جان سالماسا, سەرپە كوتەرۋدە اتويلاپ سەرپىلدى. الاقانىن شارت-شۇرت سوقتى دا 246 كەلىنى باسىنان ءبىر-اق اسىردى. بۇل بۇرىن كوتەرىلمەگەن سالماق-جاڭا رەكورد ەدى. ءسويتىپ, قوسسايىس قورىتىندىسىندا يليامىز 437 كەلى سالماقتى كوتەردى. بۇل دا – جاڭا الەمدىك رەكورد! بۇل جەتىستىك جونىندە سول ساتتە-اق تورتكۇل دۇنيەگە اقجولتاي اقپارات تاراپ جاتتى.
وسى سالماقتا سىنعا تۇسكەن تاعى ءبىر ايتۋلى اتلەتىمىز الەكساندر زايچيكوۆ كۇمىس جۇلدەگە يە بولدى. جاقىندا عانا الەم چەمپيوناتىندا توپ جارعان جاس سپورتشىمىز قوسسايىستا 416 كەلىنى كوتەردى. ءۇشىنشى ورىنعا رەسەيلىك تيمۋر نانيەۆ تابان تىرەدى. ول 411 كەلىنى باعىندىردى. ال 94 كەلى سالماقتا سايىسقان قازاقستاندىق دەنيس ۋلانوۆ تا كۇمىس جۇلدەگەر اتاندى. سونىمەن قاتار, وسى جارىستا ونەر كورسەتكەن قازاقستاندىق ارۋلار دا بيىككە جەتتى. وليمپيادا ويىندارى مەن الەم چەمپيونى اتاعى بار سۆەتلانا پودوبەدوۆا كۇمىس مەدال يەلەندى. 75 كەلىگە دەيىنگى سالماقتا سىنعا تۇسكەن قازاقستاندىق اتلەت رەسەي چەمپيونى ولگا زۋبوۆاعا جول بەردى. ال ءۇشىنشى ورىنعا قىتايلىق دجەي ۆانگ تابان تىرەدى. ال ەڭ اۋىر سالماق بويىنشا ايەلدەر اراسىنداعى باسەكەدە دە جەرلەسىمىز الەكساندرا ابورنەۆا ەكىنشى ورىننان كورىندى. ول اقش اتلەتى سارا رۋبەنستەن اسا المادى. رۋمىن قىزى اندرەا انەي قولانى قاناعات تۇتتى.
…وسى جارىستا تاعى ءبىر ەرەكشە رەكورد بولدى. نامىس رەكوردىن كوردىك. بۇل رەكوردتىڭ دا اۆتورى وليمپيادا ويىندارىنىڭ ەكى دۇركىن چەمپيونى, الەم بىرىنشىلىگىنىڭ ءتورت مارتە جەڭىمپازى يليا يلين بولدى.
…105 سالماقتىڭ جۇلدەگەرلەرىن ماراپاتتاۋ كەزىندە, ياعني يلينگە التىن مەدال, رف پرەزيدەنتىنىڭ كۋبوگى, باسقا دا سىيلىقتارى تابىستالىپ بولعان سوڭ جەڭىمپاز قۇرمەتىنە قازاقستان ءانۇرانى شىرقالدى. وسى تۇستا ورىنسىز وقيعا ورىن الدى. كەڭ سارايدا ەلىمىزدىڭ بۇرىنعى ءانۇرانىنىڭ اۋەنى اۋەلەپ كەتتى. سول-اق ەكەن, جەڭىس تۇعىرىندا تۇرعان ءيليننىڭ ءتۇرى وزگەرىپ سالا بەردى. قۇرمەت تۇعىرى الدىندا تۇرعان ۇيىمداستىرۋشى ازاماتتارعا جاعدايدى تۇسىندىرە باستادى. اۋەن شىرقالىپ جاتىر. يلين شىداپ تۇر. ءبىر ساتتە اۋەن اياقتالدى. بىراق يلين دە, زايچيكوۆ تا تۇعىردان تۇسپەي تۇرىپ الدى. ەكى جەڭىمپاز قوزعالماعان سوڭ باسقالارى دا تاپجىلمادى. وسى تۇستا تۇيسىنگەنىمىز, قازاقستاننىڭ ءانۇرانى شىرقالماي يلين تۇعىردان تۇسپەيتىنىن جەتكىزگەن سياقتى. سولاي بولدى دا. ۇيىمداستىرۋشىلار ابىر-سابىر بولدى. قازاقستان سايىپقىراندارى دا سابىر ساقتاپ تۇرا بەردى. ارادا 10-15 مينۋت وتكەندە كەڭ سارايدا اسەم ءان قالىقتاپ كەتتى…
«مەنىڭ ەلىم, مەنىڭ ەلىم,
گۇلىڭ بولىپ ەگىلەمىن,
جىرىڭ بولىپ توگىلەمىن, ەلىم,
تۋعان جەرىم مەنىڭ – قازاقستانىم!..».
جۇرەك تۇسىنا قولىن قويعان يليا دا شىرقاپ تۇر!
عالىم قوجابەكوۆ
