«ۆەچەرنيايا استانا» گازەتىنىڭ ءفوتوتىلشىسى ۆاسيلي كراس ىلە الاتاۋىنىڭ ەڭ بيىك شىڭدارىنىڭ ءبىرى – نۇرسۇلتان شىڭىن باعىندىردى. بۇل شىڭنىڭ تەڭىز دەڭگەيىنەن بيىكتىگى – 4376 مەتر. ءوزىنىڭ جەڭىسىن ول استانا قالاسىنىڭ 20 جىلدىعىنا ارناعان.
«شىڭعا كوتەرىلۋ ءۇشىن سپورتتىق جاعىنان وتە مىقتى دايىندىق قاجەت. ويتكەنى تاۋ قاتەلىكتى كەشىرمەيدى. بۇل ماقساتقا جارتى جىل بۇرىن دايىندالا باستادىم. ءوزىمدى, كۇش-جىگەرىمدى ءبىر سىناپ كورمەك بولدىم. بۇرىن دا تاۋعا شىعىپ ءجۇردىم. بىراق مىناداي بيىككە كوتەرىلگەن ەمەسپىن» دەيدى ۆاسيلي كراس.
وسى ساپارىندا ۆاسيانىڭ جانىنا الىشەر احمەتوۆ پەن تاجىريبەلى الپينيست الەكساندر ساپرىگين ىلەسىپ جۇرگەن. ءوزىنىڭ ايتۋىنشا, الەكساندر ساپرىگين شىڭعا شىعا الاتىن ادامدى بىردەن تانيدى. «نۇرسۇلتان شىڭىنا اپاراتىن جول تالعار اسۋى مەن بوگدانوۆيچ مۇزدىعى ارقىلى وتەدى. ودان ارىدە شىڭعا دەيىن جارتاسپەن شىعاسىڭ. مۇنداي ساپارعا شىعاردان بۇرىن, كىممەن باراتىنىڭدى دۇرىس تاڭداۋىڭ كەرەك. ول ادامعا ءوز ءومىرىڭدى سەنىپ تاپسىراسىڭ. ەگەر دە الدا-جالدا بەكىتەتىن جەردىڭ بىرىنەن اقاۋ كەتسە, قۇزدان تومەنگە قۇلايسىڭ» دەيدى ۆاسيلي ءوزىنىڭ دايىندىق كەزىندەگى اسەرلەرىمەن ءبولىسىپ.
قۇزار شىڭداردىڭ باسىنا شىعاتىن ادامداردىڭ قانداي قيىنشىلىقتارعا تاپ بولاتىنىن ول بىلاي اڭگىمەلەدى: «ءبىز شىڭعا كوتەرىلەردە اۋا رايى قولايسىز بولدى. بازالىق لاگەردە قوندىق. الەكساندر تاڭعى ساعات 4-تە تۇرىپ, جولعا شىعاتىنىمىزدى ءتۇسىندىردى. ويتكەنى شىڭنىڭ باسىندا اۋا رايى كۇرت وزگەرەدى ەكەن. كەنەتتەن جاڭبىر قۇيىپ كەتۋى مۇمكىن. ەڭ ماڭىزدىسى – وسى. ءبىز لاگەرگە جەتكەندە جاۋىن جاۋدى. مالمانداي سۋ بولدىق. وتكەن جىلى تاۋعا شىققان 800 ادامنىڭ 200-ءى عانا شىڭعا دەيىن جەتىپتى».
– قۇزار شىڭنىڭ باسىندا 10 مينۋتتاي عانا ايالدادىق, – دەيدى ۆاسيا. – ويتكەنى اسپاندى قارا بۇلت تورلادى. قاتتى جاۋعان جاڭبىر نەمەسە تۇمان جولىمىزدى جاۋىپ تاستايتىنى انىق. تاۋەكەلگە بەل بۋعا بولمايتىنىن ءبىلىپ, تەزدەتىپ تومەن تۇستىك. ارينە, بۇل جەڭىستەن العان اسەرىم كەرەمەت! الاتاۋدىڭ شىڭىنداعى ادەمىلىكتى ەشقانداي دا فوتوسۋرەتتەن كورە المايسىڭ. ونى تەك ءوز كوزىڭمەن كورۋىڭ كەرەك!
تولەن تىلەۋباي
