وبەكتيۆتە – ءار الۋان استانا
«بايتەرەك» مونۋمەنتى الدىنداعى الاڭدا ەكىنشى مارتە حالىقارالىق PHOTOfest.KZ فوتوكورمەسى اشىلدى.
استاناعا ارنايى كەلگەن كاسىبي فوتوگرافتار 5-8 شىلدە ارالىعىندا ەلوردانىڭ ءار قىرىن سۋرەتكە تۇسىرگەن بولاتىن. وسى جىلعى فەستيۆالدىڭ ءبىر ەرەكشەلىگى, 20 فوتوگراف ناقتى 20 باعىتتى تاڭداپ, جۇمىس ىستەدى. ولار باس قالانىڭ الەۋمەتتىك-ەكونوميكالىق, مادەني-رۋحاني كەلبەتىن جان-جاقتى قامتىپ, كورسەتۋگە تىرىستى. حالىقارالىق كورمەنى قر مادەنيەت جانە سپورت مينيسترلىگى استانانىڭ 20 جىلدىق مەرەيتويىنا وراي ۇيىمداستىرىپ وتىر.
«استانا – شەتەلدىك فوتوگرافتاردىڭ وبەكتيۆىندە» اتاۋىمەن وتكەن فوتوكورمەدە قىتاي, جاپونيا, فرانتسيا, يتاليا, گەرمانيا, انگليا, رەسەي, ارمەنيا, ازەربايجان سىندى ەلدەردەن كەلگەن كاسىبي فوتوگرافتاردىڭ ەڭ ۇزدىك شىققان 200-گە جۋىق تۋىندىسى قويىلدى. ولاردىڭ اراسىندا قازاقستان پرەزيدەنتى نۇرسۇلتان نازارباەۆتىڭ ەرەكشە سۋرەتىن ءتۇسىرىپ, الەۋمەتتىك جەلىدە بىردەن تانىمال بولعان ارمەنيا پرەزيدەنتىنىڭ جەكە فوتوگرافى داۆيد اكوپيان, سۋرەتتى ءتۇسىرۋدىڭ ەرەكشە ءادىستەرىمەن كوزگە تۇسكەن ماسكەۋلىك ۆالەري جانە ناتاليا چەركاشيندار بار.
كەلەم دەۋشىلەرگە ەسىك اشىق, فوتوكورمە 1 اي بويى جالعاسادى.