ۇلتتىق اكادەميالىق كىتاپحانادا قازاقستان سۋرەتشىلەر وداعىنىڭ مۇشەسى, بەلگىلى قىلقالام شەبەرى رۋسلان اقاناەۆتىڭ جەكە كورمەسى اشىلدى.
كورمەگە شەبەردىڭ سوڭعى جىلدارى سالىنعان جۇمىستارى قويىلدى. رۋسلان – الەمگە تانىمال سۋرەتشى اماندوس اقاناەۆتىڭ بالاسى. جالپى, قازاقتىڭ بەينەلەۋ ونەرىنىڭ دامۋىنا اقاناەۆتار اۋلەتىنىڭ قوسقان ۇلەسى زور دەپ ايتۋعا بولادى. بۇل اۋلەتتىڭ ونەردەگى جولى وتكەن عاسىردان باستالادى. وسى سارا جولدى بۇگىندە ءتورتىنشى ۇرپاق وكىلدەرى جالعاپ ءجۇر.
وسىنداي تەكتى شاڭىراقتان قانات قاققان تالانتتى ازامات بالا كۇنىنەن بەينەلەۋ ونەرىنە ىنتىق بولىپ, ەسەيە كەلە الماتىداعى كوركەمسۋرەت ۋچيليششەسىنە وقۋعا تۇسەدى. ونى ويداعىداي اياقتاعاننان كەيىن دە ونەر جولىنان الىستامايدى. 
بۇگىندە رۋسلاننىڭ عاجايىپقا تولى تۋىندىلارى ەلىمىزگە عانا ەمەس, سىرت جەرلەرگە دە جاقسى تانىلعان. قازىر ونىڭ جۇمىستارى گەرمانيا, فرانتسيا, كانادا, رەسەي, شۆەيتساريا سەكىلدى مەملەكەتتەردىڭ جەكە كوللەكتسيالارىندا ساقتاۋلى تۇر. بۇعان دەيىن شەبەردىڭ ماسكەۋ, ەرفۋرت, ۆاشينگتون, نۇر-سۇلتان جانە الماتى قالاسىندا جەكە كورمەسى وتكەن.
سۋرەتشىنىڭ تۋىندىلارى ءتۇرلى وبرازعا تولى… بوياۋى دا قانىق. كارتينالارداعى بەينەلەردى كورگەن ادامدار ودان ءبىر ەرەن كۇش العانداي اسەردە بولادى. سوعان قاراعاندا اۆتور ءوز جۇمىستارىن ەنەرگەتيكامەن بايلانىستىرىپ سالا ما دەگەن وي تۋادى.
كورمەنىڭ اشىلۋىندا كىتاپحانا ديرەكتورى ءۇمىتحان مۇڭالباەۆا ءسوز الىپ, بۇل مادەني شارانىڭ ەلباسىنىڭ «رۋحاني جاڭعىرۋ» باعدارلاماسى اياسىندا ۇيىمداستىرىلعانىن ايتتى. سونداي-اق كورمە يەسى دە جينالعاندارعا ىزگى تىلەگىن ءبىلدىردى.
