قازىرگى قوعام ەكولوگيالىق اپاتتىڭ ورتاسىندا تۇر, بىراق قالىڭ كوپشىلىك ول تۋرالى ويلانبايدى. وركەنيەت ۇردىستەرى ادامزاتتىڭ ءومىر ءسۇرۋ جاعدايىن جاقسارتا وتىرىپ, سونىمەن بىرگە عالامشارعا ۇلكەن زيان تيگىزۋدە. پايدالى قازبالاردىڭ ازايۋى, اتموسفەرانىڭ لاستانۋى, الەمدىك مۇحيتتار ماسەلەلەرىنىڭ كۇردەلەنۋى, وزون قاباتىنىڭ بۇزىلۋى – بۇل كوز كورىپ وتىرعان ەكولوگيالىق پروبلەمالاردىڭ ءبىر قىرى عانا.
12-14 شىلدە ارالىعىندا Galmart سۋپەرماركەتتەرىنىڭ ساۋدا زالدارىندا I care with galmart ەكو-كۇندەرى ۇيىمداستىرىلدى. مۇندا ەكو تاقىرىبىنداعى فوتوكورمە قويىلىپ, «روپ وپەراتورى» ستەندى ۇسىنىلدى. ستەندتە قوقىستى قالاي دۇرىس سۇرىپتاۋ كەرەكتىگى, قوقىس قالاي وڭدەلەتىندىگى جانە باسقا دا پايدالى اقپاراتتار توپتاستىرىلعان.
– ءبىز ادامداردى كۇندەلىكتى تۇرمىستا ەكولوگيالىق تازا ونىمدەردى قولدانۋعا شاقىرامىز. اسىرەسە, اس-سۋدى پوليەتيلەن, پلاستيك ىدىستاردا ساقتاۋدىڭ زيانى وراسان. ول جايىندا دۇنيەجۇزىلىك دەنساۋلىق ساقتاۋ ۇيىمى باياعىدا-اق دابىل قاققان. بىراق جۇرت ءبارىبىر ەنجار, – دەپ قىنجىلدى «ەكو-پروداكتس گرۋپپ» جشس ديرەكتورى ميراس ابباتوۆ.
اتالعان كومپانيا 2014 جىلدان بەرى وسى پروبلەمالاردى شەشۋگە قاتىسۋدا. جىل سايىن Galmart ECO DAY شاراسىن وتكىزىپ كەلەدى. اتالمىش اكتسيا اياسىندا حالىقتى پوليەتيلەن پاكەتتەر مەن باسقا دا پلاستيكالىق ىدىستاردى پايدالانۋدى بىرتىندەپ قىسقارتۋعا شاقىرادى. اكتسيا بارىسىندا «بيو-پروداكتس» جشس بيوىدىراتىلاتىن پاكەتتەرى تانىستىرىلدى.
