ەلوردانىڭ تىلدەردى دامىتۋ جانە ارحيۆ ءىسى باسقارماسى جانىنداعى «رۋحانيات» مەكەمەسى «انا ءتىلىم – ارداعىم» اتتى رۋحاني-تاعىلىمدى كەش ۇيىمداستىردى.
مەملەكەتتىك ءتىلدىڭ مارتەبەسىن ارتتىرىپ, قوعامدىق ءومىردىڭ بارلىق سالالارىنداعى قولدانىس اياسىن كەڭەيتۋ, ەلدىك قاسيەتتەر مەن وتباسىلىق قۇندىلىقتاردى, ۇلتتىق ءتالىم-تاربيەنى انا ءتىلى ارقىلى وتانداستارىمىزدىڭ ساناسىنا ءسىڭىرۋ ماقساتىن كوزدەگەن كەشتە ءتىلىمىزدىڭ ساياسي-الەۋمەتتىك ورتاداعى قازىرگى باعىتى مەن كەلەشەكتەگى دامۋ ءورىسى باعامدالدى. ءار شاڭىراقتان باستاپ قۇزىرلى مەملەكەتتىك مەكەمەلەردە ونىڭ قولدانىلۋىنىڭ تۇيتكىلدى ماسەلەلەرى ەكشەلدى. بۇگىنگى جاھاندانۋ داۋىرىندەگى قازاقي بولمىس پەن ۇلتتىق بىرەگەيلىكتى ساقتاۋداعى انا ءتىلىنىڭ ماڭىزى بايىپتالىپ, ەل ازاماتتارىنىڭ وسىناۋ كەلەلى ىستەردەگى جاۋاپكەرشىلىگى وي تالقىسىنا سالىندى.
ۇلتتىق ۇيىسۋ مەن حالىقتار دوستىعىن نىعايتۋداعى قازاق ءتىلىنىڭ تۇعىرى تۋرالى پىكىرلەر ورتاعا سالىندى. ءتىل مادەنيەتى, ءتىل تازالىعى, ءتىل ۇيلەسىمىنىڭ ءتۇيىندى تاقىرىپتارى, تالىمدىك ماسەلەلەرى سارالاندى. قازاق ءتىلىنىڭ قازىرگى زاماناۋي تەحنولوگيالىق ۇردىستەر جۇيەسىندەگى ورنى تۋرالى ءسوز قوزعالدى.
رۋحاني ءىس-شارا بارىسىندا ۇلت قايراتكەرلەرى مەن زيالىلارىنىڭ قازاق ءتىلىنىڭ جاسامپازدىعىنا, ومىرشەڭدىگىنە قاتىستى ايتقان سوزدەرى ساحنالىق كورىنىس ارقىلى بەرىلىپ, اقىنداردىڭ انا ءتىلىنىڭ قاسيەتى مەن كيەسى حاقىنداعى سىرشىل ولەڭدەرى, تاعىلىمى تەرەڭ وي-تولعامدارى, قاناتتى سوزدەرى وقىلدى. تىلدەردى دامىتۋ جانە ارحيۆ ءىسى باسقارماسىنىڭ باسشىسى تىلەۋعالي قىشقاشباەۆ مەملەكەتتىك ءتىلدىڭ مەرەيىن اسىرىپ جۇرگەن ازاماتتارعا العىس حات تاپسىردى.
يبراگيم ەسكەندىر, ءمولدىر اۋەلبەكوۆا سىندى ەسترادا انشىلەرى حالىققا رۋح بەرەتىن اندەردى شىرقادى. «قورقىت» ءداستۇرلى توبى ۇلتىمىزدىڭ كونە سارىندارىن بۇگىنگى كۇنمەن ۇشتاستىردى.
