جالپىۇلتتىق سوتسيال-دەموكراتيالىق پارتياسى اتىنان پارلامەنت ءماجىلىسىنىڭ دەپۋتاتتىعىنا كانديدات ابدۋكامال اشىمبەكوۆ «كەنتاۋ ترانسفورماتور زاۋىتى» اق جۇمىسكەرلەرىمەن, سونداي-اق تۇركىستان وبلىسى سايلاۋشىلارىمەن كەزدەستى.
كەزدەسۋ بارىسىندا كانديدات جينالعان قاۋىمعا پارتيانىڭ سايلاۋالدى باعدارلاماسىنىڭ باسىم باعىتىن باياندادى. اتاپ ايتقاندا, پارتيانىڭ سايلاۋالدى باعدارلاماسىندا جاڭا ەڭبەك كودەكسىن قابىلداۋ تۋرالى تارماق بار ەكەنىن اتاپ ءوتتى. قۇجاتتا ەڭبەك شارتىن جاساسۋ كەزىندە جۇمىسكەرلەر مەن جۇمىس بەرۋشىلەردىڭ تولىق تەڭدىگى قامتاماسىز ەتىلەتىن قاعيدات بار. سونىمەن بىرگە, ابدۋكامال اشىمبەكوۆ ءوز سوزىندە جاستاردى جۇمىسقا ورنالاستىرۋ بويىنشا اتالمىش ءوڭىردىڭ ارتتا قالىپ جاتقانىنا توقتالدى.
«ەل حالقىنىڭ ءومىر ساپاسىن جاقسارتۋ – مەملەكەتتىڭ باسىم باعىتىنىڭ ءبىرى. الەم بويىنشا ستاتيستيكالىق دەرەكتەردە جاعدايىمىز ءماز ەمەس. ءومىر ساپاسىن ارتتىرۋعا بىرنەشە فاكتور اسەر ەتەدى. جۇمىسسىزدىق ماسەلەسىمەن قاتار, جەمقورلىققا قاتىستى ماسەلەلەردى تۇبەگەيلى شەشپەيىنشە, مەملەكەتتىك باسقارۋ جۇيەسىن قالىپتى جۇزەگە اسىرۋ مۇمكىن ەمەس. جەمقورلىقپەن كۇرەستى كۇشەيتۋ كەرەك. پاراقورلارعا قاتىستى جازانى قاتايتىپ, مەرزىمىنەن بۇرىن بوساتۋ قۇقىعىنان ايىرۋ قاجەت. مەملەكەتىمىز باسقا دا كوپتەگەن ەل سياقتى سىبايلاس جەمقورلىقتىڭ الدىن الۋ جانە ونى بولدىرماۋ ماقساتىندا قارقىندى جۇمىس جۇرگىزىپ جاتىر. جەمقورلىقتى جەڭىپ, مەملەكەتتىڭ باسقارۋ جۇيەسىن اۋىستىرۋ ارقىلى ەلدىڭ ەكونوميكالىق گۇلدەنۋىنە قول جەتكىزۋگە بولادى» دەدى كانديدات.
وسىلايشا, پارتيا مۇشەلەرى ءومىر ءسۇرۋ ساپاسىنىڭ ستاندارتىن ازىرلەۋ جانە ەنگىزۋ ماسەلەسىنە پارلامەنتتە باستاماشىلىق جاساۋعا نيەتتى. كەزدەسۋدە كانديداتتار سايلاۋشىلاردى پارتيانىڭ سايلاۋالدى باعدارلاماسىمەن تانىستىردى.
