رەسەيدىڭ بەلويارسكي قالاسىندا سوتسياليستىك ەڭبەك ەرى فارمان سالمانوۆقا ارنالعان مۇنايلى مەملەكەتتەردىڭ XV الەم كۋبوگى اياقتالدى. بۇل بىرىنشىلىكتە بوكستان قازاقستان ۇلتتىق قۇراماسىنىڭ قورجىنىنا التى مەدال ءتۇستى. ونىڭ ەكەۋى – التىن, ەكەۋى – كۇمىس, ەكەۋى – قولا جۇلدە.
تۋرنيرگە 17 مەملەكەتتەن 100 سپورتشى قاتىستى. بايراقتى باسەكەدە ەلدىڭ اتىن قىزداردىڭ اراسىنان ريمما ۆولوسەنكو مەن الينا تۇرلىباەۆا شىعاردى. 60 كگ سالماقتا التىننان القا تاققان ريمما – استانا قالاسى اكىمدىگىنە قاراستى مامانداندىرىلعان جوعارى سپورت شەبەرلىگى مەكتەبىنىڭ سپورتشىسى. ال الينا 52 كگ دارەجەدە كۇمىس جۇلدەگەر اتاندى.
سپورتشىنىڭ جاتتىقتىرۋشىسى, استانا قالاسى دەنە شىنىقتىرۋ جانە سپورت باسقارماسىنىڭ باسشىسى بەرىك مارجىقپاەۆ مۇناي مەملەكەتتەرىنىڭ الەم كۋبوگىندا ءبىزدىڭ ەلدەن بۇعان دەيىن تەك مارينا ۆولنوۆا عانا چەمپيون بولعانىن, وسى جىلى ريمما ۆولوسەنكو سول جەڭىستى جولدى جالعاعانىن ايتتى.
ال جىگىتتەردىڭ اراسىنان ەرجان ورداباەۆ (60 كگ) چەمپيون اتاندى. 56 كگ سالماقتا ابىلاي سايلاۋبەكوۆ ەكىنشى تۇعىرعا كوتەرىلدى. ال قولاعا قول جەتكىزگەندەر – راشيت سالاۋاتوۆ (52 كگ) پەن شايمۇرات قۇسايىنوۆ (81 كگ).
ورىنبەك وتەمۇرات
