قر ۇلتتىق مۋزەيىندە «كۇي اتاسى – قۇرمانعازى» اتتى وسكەلەڭ ۇرپاققا بەرەر تاعىلىمى, تاربيەسى مول كەش ءوتتى. قازاق ۇلتتىق ونەر ۋنيۆەرسيتەتىنىڭ ستۋدەنتتەرى, استاناداعى مۋزىكا مەكتەپتەرىنىڭ شاكىرتتەرى قۇرمانعازىنىڭ «اداي», «بالبىراۋىن», «سارىارقا», ت.ب. كۇيلەرىن توكتى. شاراعا قاتىسقاندار كۇي اتاسىنىڭ ءومىرى مەن شىعارماشىلىعى تۋرالى وي ءوربىتتى.
ەلباسى نۇرسۇلتان نازارباەۆ «رۋحاني جاڭعىرۋ: بولاشاققا باعدار» اتتى ماقالاسىندا: «ۇلتتىق سالت-ءداستۇرىمىز, ءتىلىمىز بەن مۋزىكامىز, ادەبيەتىمىز, جورالعىلارىمىز, ءبىر سوزبەن ايتقاندا ۇلتتىق رۋحىمىز بويىمىزدا ماڭگى قالۋعا ءتيىس. ابايدىڭ دانالىعى, اۋەزوۆتىڭ عۇلامالىعى, جامبىلدىڭ جىرلارى مەن قۇرمانعازىنىڭ كۇيلەرى, عاسىرلار قويناۋىنان جەتكەن بابالار ءۇنى – بۇلار ءبىزدىڭ رۋحاني مادەنيەتىمىزدىڭ ءبىر پاراسى عانا» دەپ جازعان ەدى. وسىنى جانە بيىل مەملەكەت باسشىسىنىڭ جارلىعىمەن ۇلتتىق دومبىرا كۇنى بەكىتىلگەنىن ەسكە العان اتالمىش مۋزەي ديرەكتورىنىڭ مىندەتىن اتقارۋشى لەونيد كوچەتوۆ مادەني مۇرانى ناسيحاتتاۋ تۋرالى ايتىپ, قۇرمانعازىنىڭ قازاق ونەرىندەگى ورنىنا توقتالدى.
كۇي اتاسىنىڭ ومىرىنەن ءبولىپ تاستاۋعا بولمايتىن ونەرى جايلى كۇيشى, كومپوزيتور, ديريجەر, قر مادەنيەت قايراتكەرى نۇرلان بەكەنوۆ كەڭىرەك اڭگىمەلەدى. «قۇرمانعازىنىڭ ءومىرى وتە قيىن بولدى. تۇرمەدە بولدى, ايداۋدا ءجۇردى. كوپ قاسىرەت شەكتى. ءومىرىنىڭ سونداي كەزەڭدەرىنىڭ بارلىعىندا كۇي شىعارىپ وتىردى. كۇيشىنىڭ قازىرگى كۇنى بىزگە 200 كۇيى جەتىپ وتىر. ول – ناعىز رۋحاني ازىق, مادەني مۇرا. قولدارىنا دومبىرا الىپ, اتا-باباسىنىڭ كۇيىن شەرتىپ وتىرعان مىنا بالالار – ەلدىڭ ەرتەڭى. قارا دومبىرا ۇستاعان بالادا سەزىم بولادى, ونداي ۇرپاق حالقىنىڭ قامىن كۇيتتەيتىن ناعىز ازاماتقا اينالماق» دەگەن كۇيشى ءوزى دە قۇرمانعازىنىڭ بىرنەشە كۇيىن شابىتتانا تارتتى.
قۇرمانعازى كۇيلەرىنىڭ ناسيحاتى استانادا جاقسى ءجۇرىپ جاتقانىن ايتا كەتۋ كەرەك. ماسەلەن, جۋىردا باس قالانىڭ مەملەكەتتىك اكادەميالىق فيلارمونياسىنىڭ قازاق وركەسترى جاڭا ماۋسىمىن كۇي اتاسىنا ارنالعان كونتسەرتپەن اشتى. 29 قازاندا «قورقىت» ءداستۇرلى ساز توبى «قۋانىش» اتتى كەشىن ۇلى كۇيشىگە ارناماق. ال 17 قاراشادا استانادا احمەت جۇبانوۆ پەن عازيزا جۇبانوۆانىڭ «قۇرمانعازى» وپەراسىنىڭ كونتسەرتتىك قويىلىمى وتەدى.
