باس قالادا XII حالىقارالىق «اق كوگەرشىن» بالالار شىعارماشىلىعىنا ارنالعان فەستيۆال دۇبىرلەپ ءوتتى. بۇل شارا ەلوردانىڭ 20 جىلدىق مەرەيتويىنا ارنالدى.
ءۇش كۇنگە سوزىلعان ءدۇبىرلى دوداعا ەلىمىزدىڭ ءار تۇكپىرىنەن دارىندى بالالار كەلدى. سونداي-اق, الىستان ات تەرلەتىپ جەتكەن رەسەي مەن قىرعىزستاننىڭ تالانتتى جەتكىنشەكتەرى دە باق سىنادى. قىسقاسى, فەستيۆالدا 5-17 جاس ارالىعىنداعى 1000-نان اسا ونەرپاز ورەندەر قاتىستى. بايقاۋ بالالاردىڭ جاس ارالىعىنا قاراي 8 اتالىمعا بولىنگەن. ماسەلەن, ۆوكال, بي ونەرى, تەاتر, حالىقتىق ونەر, كوركەم ءسوز سەكىلدى نوميناتسيالار بار.
«بۇل شارا 2007 جىلدان بەرى ۇيىمداستىرىلىپ كەلەدى. بيىل ون ەكىنشى مارتە ءوتىپ وتىر. باستى ماقساتىمىز – جاس جەتكىنشەكتەردى ونەرگە باۋلىپ, جاڭا ەسىمدەر اشۋ. بۇل ويىمىز ورىندالدى. قازىر «اق كوگەرشىننەن» ۇشقان جاس تالانتتار گەرمانيا, يسپانيا, چەحيا, كورەيا, رەسەيدە لاۋرەات اتانىپ ۇلگەردى. بۇعان ءبىز قاتتى قۋانامىز» دەدى «اق كوگەرشىن» بالالار قورىنىڭ ديرەكتورى تامارا ەسكەنوۆا.
فەستيۆال وتە قىزىقتى ءارى تارتىستى بولدى. بالالاردىڭ ونەرى بىرىنەن-ءبىرى وتەدى. ولاردى ساراپقا سالعان قازىلارعا دا وڭاي تيمەدى. الايدا بايگەنىڭ اتى – بايگە. شىن جۇيرىكتەر مارەدەن قارا ءۇزىپ كەلەتىنى انىق. «حورەوگرافيا» نوميناتسياسىنداعى ءۇش توپ بويىنشا قازاقستان, رەسەي جانە قىرعىزستاننىڭ بيشىلەرى باس جۇلدەگە قول جەتكىزدى. ال «حالىقتىق ونەر» اتالىمىندا باتىس قازاقستان وبلىسى شىڭعىرلاۋ اۋدانىنان كەلگەن «جاس تولقىن» بالالار ءانسامبلى گران-ءپريدى جەڭىپ الدى. ال الماتى قالاسىنىڭ №3 وقۋشىلار ءۇيى جانىندا «دالا سازى» وركەسترى ۇلتتىق اسپاپتار سايىسىندا ءبىرىنشى ورىنعا يە بولدى. باسقا دا اتالىمدار بويىنشا جەڭىمپازدار انىقتالدى. ءبىر سوزبەن ايتقاندا, جۇلدەگەرلەردىڭ ءبارى باعالى سىيلىقتارمەن ماراپاتتالدى.
ازامات ەسەنجول
