«كونگرەسس-حولل» سارايىندا «ءان مەن كۇي الديلەيدى استانانى» اتتى مەرەكەلىك كونتسەرت ءوتتى. وڭتۇستىك قازاقستان وبلىسى شىعارماشىلىق ۇجىمدارىنىڭ قاتىسۋىمەن ۇيىمداستىرىلعان كەش ەلوردا كۇنىنە ارنالدى.
بىرنەشە كەزەڭگە بولىنگەن شارادا وڭىردەگى ەسترادا انشىلەرى, «سۇگىر» ۇلتتىق مۋزىكا اسپاپتارى وركەسترى, «تۇمار» فولكلورلىق ءانسامبلى جانە وبلىستىق وپەرا جانە بالەت تەاترىنىڭ «قازىنا» بي ءانسامبلىنىڭ ارتىستەرى ونەر كورسەتتى.
ەكى جۇزگە تارتا ونەر يەلەرى قاتىسقان كەشكە كورەرمەن كوپ جينالدى. انشىلەر نەگىزىنەن وڭتۇستىكتە تۋىپ-وسكەن اقىندار مەن كومپوزيتورلاردىڭ استانا تۋرالى شىعارمالارىن ورىندادى. سونىمەن قاتار ۇمىت بولا باستاعان, سيرەك ايتىلاتىن ەسكى اندەر جاڭا نۇسقادا, ەرەكشە ارلەنگەن اۋەنمەن شىرقالدى. تۇساۋى كەسىلگەن بىرنەشە ءان كورەرمەن كوڭىلىنەن شىقتى.
وبلىستىق مادەنيەت باسقارماسىنىڭ باسشىسى كۇليا ايداربەكوۆا بۇل شارانىڭ ماڭىزى زور ەكەنىن جەتكىزدى. «ءبىز استانالىقتاردى ونەرىمىزبەن ءتانتى ەتكەنىمىزگە قۋانىشتىمىز. باس شاھاردىڭ ءسانى مەن سالتاناتىنىڭ جاراسىمىنا از دا بولسا ۇلەس قوسقانىمىز ءۇشىن دە ماقتانامىز» دەدى ول.
اسحات رايقۇل
