استانا قالاسىنىڭ كوممۋنيكاتسيالار قىزمەتىندە ينتەرنەتتە ونلاين ساتىپ الۋ كەزىندە تۇتىنۋشىلاردىڭ قۇقىعىن قورعاۋ تۋرالى استانا قالاسى ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتىنىڭ باسشىسى نۇرعالي ەگەمبەرديەۆ بريفينگ وتكىزدى.
رەسمي اقپارات بويىنشا تاۋاردى ونلاين ساتىپ الۋعا قاتىستى بيىلعى 9 اي ىشىندە رەسپۋبليكا بويىنشا 600 ءوتىنىش قارالىپ, 31 ملن تەڭگەدەن استام سوماعا تەڭ بۇزىلعان قۇقىقتار قالپىنا كەلتىرىلگەن.
«استانا قالاسىنىڭ ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتى تۇتىنۋشىلاردىڭ قۇقىعىن قورعاۋدىڭ جوعارى ستاندارتىن قامتاماسىز ەتۋ ماقساتىندا ەلەكتروندىق ساۋدا الاڭىنىڭ وكىلدەرىمەن ىنتىماقتاستىقتى جالعاستىرۋدا. بىرلەسە جۇمىس جۇرگىزۋ تۇتىنۋشىلاردىڭ ەلەكتروندىق ساۋدا جەلىلەرىنە دەگەن سەنىمىن نىعايتىپ قانا قويمايدى, سونىمەن قاتار تۇتىنۋشىلاردىڭ قۇقىعى ساتىپ الۋدىڭ بارلىق كەزەڭىندە قورعالاتىن ەلەكتروندىق كوممەرتسياعا تەڭدەستىرىلگەن كوزقاراستىڭ ماڭىزىن كورسەتەدى» دەپ ءتۇسىندىردى قۇزىرلى دەپارتامەنت باسشىسى.
ونىڭ ايتۋىنشا, استانا قالاسى بويىنشا قايتارىلعان تاۋار ءۇشىن اقشالاي قاراجاتتى تيىسىنشە جانە تيىسىنشە ەمەس ساپادا قايتارۋعا جاردەمدەسۋ تۋرالى 65 ءوتىنىش قارالعان. ناتيجەسىندە تۇتىنۋشىعا جالپى سوماسى 1200 ملن تەڭگەگە اقشالاي قاراجاتتى قايتارۋعا كومەك كورسەتىلگەن.
دەپارتامەنت باسشىسى ازاماتتار «تۇتىنۋشىلاردىڭ قۇقىقتارىن قورعاۋ تۋرالى» قر قولدانىستاعى زاڭىنا سايكەس تۇتىنۋشى اقاۋلى تاۋارلاردى قايتارۋعا, سونداي-اق ءوز تاڭداۋى بويىنشا ساتىپ الۋ باعاسىن پروپورتسيونالدى تومەندەتۋدى, تاۋاردىڭ كەمشىلىگىن وتەۋسىز جويۋدى, تاۋاردى ۇقساس ماركالى تاۋارعا (مودەلگە, ارتيكۋلعا) اۋىستىرۋدى, شارتتى بۇزۋدى جانە تاۋار ءۇشىن تولەنگەن اقشالاي سومانى قايتارۋدى تالاپ ەتۋگە قۇقىلى ەكەنىن اتاپ ءوتتى.
«سونداي-اق «تۇتىنۋشىلاردىڭ قۇقىقتارىن قورعاۋ تۋرالى» جاڭا زاڭ جوباسى شەڭبەرىندە تاۋارلاردى وتكىزۋ ماقساتىندا پايدالانىلاتىن ينتەرنەت-رەسۋرستاردى «ساۋدا نىساندارىنا» تەڭەستىرۋ ۇسىنىلاتىنىن اتاپ وتكىم كەلەدى. تيىسىنشە, وفلاين ساتۋشىعا قويىلاتىن بارلىق تالاپ ونلاين ساتۋشىلارعا دا قولدانىلادى» دەدى نۇرعالي ەگەمبەرديەۆ.
بۇدان بولەك, ەلەكتروندىق ساۋدا الاڭدارىنىڭ يەلەرىن كاسىپكەرلەر مەن تۇتىنۋشىلاردىڭ قۇقىعىن قورعاۋ تۋرالى زاڭنامانىڭ تالاپتارىن ساقتاۋ جونىندە شارتتار جاساسۋعا مىندەتتەۋ ۇسىنىلادى.
