«قازاقفيلم» جاقىندا ۇلى جەڭىستىڭ 70 جىلدىعىنا ارنالعان «ورالۋ» تاريحي دراماسىن تۇسىرۋگە كىرىسىپ كەتتى.
فيلم سيۋجەتى قازاق ەلى باسىنان كەشكەن تاريحي ناۋبەت جىلدارىن – كۇشتەپ ۇجىمداستىرۋ, جۇت, ەكىنشى دۇنيەجۇزىلىك سوعىس جانە سوعىستان كەيىنگى كەزەڭدى قامتيدى.
قر مادەنيەت جانە سپورت ۆيتسە-ءمينيسترى عالىم احمەدياروۆ بولاشاق كارتينانىڭ جاستاردىڭ وتاندى سۇيۋگە, انانى سۇيۋگە ناسيحاتتايتىنىن ايتىپ ءوتتى.
«مەملەكەت باسشىسى ن.نازارباەۆ «نۇرلى جول – بولاشاققا باستار جول» جولداۋىندا 2015 جىل ۇلتتىق تاريحتى ۇلىقتاۋ جىلى, بۇگىنگى بيىكتەرىمىزدى باعالاۋ جىلى دەپ اتاپ وتكەن بولاتىن. وسى ورايدا ۇلى وتان سوعىسىندا قازا تاپقان بوزداقتاردى ەسكە الىپ, ولاردىڭ رۋحىنا تاعزىم ەتۋ – كەيىنگى بۋىننىڭ ازاماتتىق پارىزى. وسى باعىتتا مينيسترلىك بىرقاتار ءىرى شارالاردى وتكىزدى. تەاترلاردا ارداگەرلەردىڭ شىعارماشىلىعىن دامىتۋ, كورمەلەر, فەستيۆالدەر, كونفەرەنتسيا, دوڭگەلەك ۇستەلدەر وتكىزىلمەك», – دەدى قر مادەنيەت جانە سپورت ۆيتسە-ءمينيسترى عالىم احمەدياروۆ.
«بۇل فيلم 20 عاسىرداعى قازاق حالقىنىڭ ناۋبەتىن كورسەتەدى. سوعىس تاقىرىبىنداعى كارتينالار از بولعان. وسىنىڭ الدىندا بەلگىلى رەجيسسەر ءماجيت بەگالين ء«اليا», «ەل باسىنا كۇن تۋسا» فيلمدەرىن تۇسىرگەن بولاتىن. بۇل جوبا 20 عاسىرداعى قازاق تاريحىنىڭ شەجىرەسى دەسەك تە بولادى», – دەدى «قازاقفيلم» اق توراعاسىنىڭ ورىنباسارى ديدار امانتاي.
فيلم رەجيسسەرى اقان ساتاەۆ («ليكۆيداتور», «رەكەتير», «زابلۋديۆشيسيا», «جاۋجۇرەك مىڭ بالا») كينونى تۇسىرۋگە تىڭ يدەيانىڭ قالاي كەلگەنىن ايتىپ بەردى.
«فيلم سيۋجەتى مەنىڭ اتا-انامنىڭ ايتقان وقيعاسىنىڭ جەلىسىندە ءوربيدى. ولار گاسترولدىك ساپارى كەزىندە قازاق اۋىلدارىنىڭ بىرىندە اۋىل شەتىنە شىعىپ الىپ, بالاسىن كۇتەتىن كەمپىردى كورگەن. ونى اۋىل تۇرعىندارى جىندى دەپ ساناعان. وسى وقيعانى تيمۋر جاقسىلىقوۆ ەكەۋمىز ستسەناريگە بەيىمدەدىك. تاريحي تۇستارىن تاريحشى الماس ورداباەۆپەن كەڭەسىپ اقىلداسىپ جاتىرمىز. بارىنشا تاريحي شىندىققا نۇقسان كەلتىرمەي جۇمىس جاساۋعا تىرىسىپ جاتىرمىز. ءبىزدىڭ ءار كيىمىمىز, ءار ءسوزىمىز, ءار دەكوراتسيامىز تاريحشىلاردىڭ بەكىتۋىنەن كەيىن جاسالىپ وتىر», – دەدى ا.ساتاەۆ.
ونىڭ ايتۋىنشا, كينو قازاق, ورىس تىلدەرىندە ءتۇسىرىلىپ, كەيىن بىرنەشە تىدەرگە دۋبلياج جاسالادى.
«نوۆىي مير پروداكشن» پروديۋسسەرلىك كومپانياسىنىڭ باس ديرەكتورى سۆەتلانا كوروتەنكو مالىمدەگەندەي, تاريحي تۋىندى 2015 جىلدىڭ 11 جەلتوقسانىندا كورەرمەنگە جول تارتادى. سودان كەيىن تمد ەلدەرىنىڭ بارلىعىندا كورسەتىلەدى.
وقيعا وسى قيىندىقتاردىڭ بارلىعىن باسىنان كەشكەن ءبىر ادامنىڭ تاعدىرىنىڭ اينالاسىندا ءوربيدى. سيۋجەت بايانداۋ جانرىندا جاسالعان. بالالار ءۇيى, سۇراپىل سوعىس جىلدارى, اباقتىنى كورىپ, بىرنەشە جىلدار بويى تامىرىنان اجىراپ قالعان ادام ءوزىنىڭ اناسىنا ورالادى. تۋىندى اناعا, وتانعا دەگەن ماحابباتتى ناسيحاتتايدى.
اقپاننىڭ ورتاسىندا باستالعان ءتۇسىرىلىم جۇمىستارى نەگىزىنەن الماتى قالاسىندا, الماتى وبلىسىندا, مينسك, ستامبۋل قالالارىندا وتەدى. كەيىپكەرلەردى بەلگىلى اكتەرلەر ءادىل احمەتوۆ, ارۋجان جازىلبەكوۆا, ەركەبۇلان دايىروۆ, التىناي نوگەربەك, بەرىك ايتجانوۆ, بولات ءابدىلمانوۆ سومدايدى.
ءتۇسىرىلىم پروتسەسىنە ەلىمىزدىڭ ۇزدىك كينوگەرلەرى, رەجيسسەرلەر, وپەراتورلار, كومپوزيتورلار سۋرەتشىلەر جۇمىلدىرىلدى.
