بۇگىن قازاقستان رەسپۋبليكاسىنىڭ مەملەكەتتىك حاتشىسى گ.ن.ابدىقالىقوۆانىڭ توراعالىق ەتۋىمەن قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق- دەموگرافيالىق ساياسات جونىندەگى ۇلتتىق كوميسسيانىڭ كەزەكتى وتىرىسى ءوتتى.
وتىرىستا مەملەكەت باسشىسىنىڭ «نۇرلى جول – بولاشاققا باستار جول» اتتى جولداۋىن ىسكە اسىرۋ اياسىندا ەلىمىز ەكونوميكاسىنىڭ يندۋستريالىق-يننوۆاتسيالىق دامۋىنا ايەلدەردىڭ قاتىسۋىن ارتتىرۋ ماسەلەلەرى قارالدى.
ۇلتتىق ەكونوميكا, ينۆەستيتسيالار جانە دامۋ مينيسترلىكتەرىنىڭ باسشىلارى وزدەرىنىڭ سويلەگەن سوزدەرىندە يندۋستريالاندىرۋ باعدارلاماسىنىڭ ءبىرىنشى بەسجىلدىعىندا 770 جوبا ىسكە قوسىلعانىن اتاپ ءوتتى. بۇل جوبالارعا 63 مىڭ ادام تارتىلسا, ونىڭ 18 مىڭى (29%) ايەلدەر. تۇتاستاي العاندا, ايەلدەردىڭ ەلىمىزدەگى ءىجو-گە ۇلەسى شامامەن 40% جەتەدى.
ۇلتتىق كوميسسيا ءتورايىمى گۇلشارا ابدىقالىقوۆا ايەلدەردىڭ ەل ەكونوميكاسىنداعى سانىن ارتتىرۋدىڭ ماڭىزىنا توقتالىپ, حالىقارالىق ۆاليۋتالىق قور ساراپشىلارىنىڭ پىكىرىنشە, «ەڭبەك نارىعىنا ايەلدەر بارىنشا كوپ شىققان سايىن, الەمدىك ءىجو مەيىلىنشە وسەتىن بولادى. ءبىر قاتار ەلدەردە نازىك جاندىلار ەكونوميكانىڭ ءوسۋىن 30%-كە جەدەلدەتۋگە قابىلەتتى» – ەكەنىن اتاپ كورسەتتى.
وتىرىستا سونداي-اق, مەملەكەتتىك ورگانداردىڭ ستراتەگيالىق جوسپارلارىنىڭ گەندەرلىك اسپەكتىلەرى, استانا, الماتى قالالارى مەن وبلىستار اۋماقتارىن دامىتۋ باعدارلامالارى, سولتۇستىك قازاقستان وبلىسى اكىمدىگىنىڭ ءوڭىر حالقىنىڭ رەپرودۋكتيۆتى دەنساۋلىعىن ساقتاۋ بويىنشا قولدانىلىپ جاتقان شارالارى قارالدى. گۇلشارا ابدىقالىقوۆا حالىقتىڭ قالىپتى ءوسۋىن جانە جالپى ءومىر ساپاسىن ارتتىرۋ ءۇشىن رەپرودۋكتيۆتى دەنساۋلىقتى ساقتاۋ مەن نىعايتۋدىڭ ماڭىزدىلىعىن اتاپ ءوتتى.
سونىمەن قاتار, وتىرىسقا قاتىسۋشىلار «ايەل دەنساۋلىعى» اتتى ەلوردالىق مەديتسينالىق ورتالىقتىڭ جۇمىس تاجىريبەسىمەن تانىستى. ورتالىق جەتەكشىسى, پروفەسسور راۋشان راحىمجانوۆا ۇلتتىق كوميسسيا مۇشەلەرىنىڭ نازارىن ونكولوگيالىق اۋرۋلار رەيتينگىندە ايەلدەردىڭ جاڭادان باستالعان قاتەرلى ءسۇت بەزدەرى اۋرۋىنىڭ 1-ورىنعا شىققانىنا اۋداردى. ول ورتالىقتا ايەلدەر اۋرۋىنىڭ رەپرودۋكتيۆتى كەزەڭدەگى باستاپقى دياگنوستيكاسىنا قازىرگى زامانعى ساۋلەلى ادىستەر قولدانىلاتىنىن, مۇنىڭ سىرقاتتى دەر كەزىندە انىقتاپ, رەپرودۋكتيۆتى دەنساۋلىقتى ساقتاۋعا مۇمكىندىك تۋعىزاتىنىن اتاپ ءوتتى.
تالقىلاۋ قورىتىندىسى بويىنشا ۇلتتىق كوميسسيا مەملەكەتتىك ورگانداردىڭ ورتالىق جانە جەرگىلىكتى ورگاندارىنا ايەلدەردىڭ ەلىمىزدىڭ يندۋستريالىق-يننوۆاتسيالىق دامۋىنا قاتىسۋ بەلسەندىلىگىن ارتتىرۋ, گەندەرلىك تەڭدىكتى جانە حالىقتىڭ رەپرودۋكتيۆتى دەنساۋلىعىن ساقتاۋعا قول جەتكىزۋگە باعىتتالعان ءتيىستى ۇسىنىمدار ازىرلەدى.
