سوڭعى جىلدارى پيروتەحنيكالىق وتشاشۋلار مەرەكەنىڭ ءبىر نىشانىنا اينالىپ بارادى. وكىنىشكە قاراي, قىتايدىڭ ارزانقول بۇيىمدارىن قولدانۋدىڭ ارتى قايعىلى وقيعاعا سوقتىراتىنىن كوبى ەسكەرە بەرمەيدى. قايتا پيروتەحنيكانى جاپا-تارماعاي الۋشىلار كوپ قازىر. وعان دالەل كەلە جاتقان جاڭا جىلدى جارقىراعان بەنگال وتتار, شۋلى شارتىلداقتار, ءتۇرلى-ءتۇستى ساليۋتتەرسىز ەلەستەتۋ قيىن.
قازىردىڭ وزىندە سول پيروتەحنيكالىق تاۋارلار بازارداعى ساۋدانىڭ كورىگىن قىزدىرىپ تۇر. مۇنداي وتشاشۋلاردى, اسىرەسە, جاس بالالار كوپ الادى ەكەن. مامانداردىڭ ايتۋىنشا, مۇنداي زاتتاردى تەك ارناۋلى دۇكەندەر مەن ساۋدا نۇكتەلەرiنەن العان ابزال. قوراپشاسىندا شىعارعان فيرماسى جانە ساقتالۋ مەرزىمى تولىق كورسەتىلىپ, تەك مەملەكەتتىك جانە ورىس تىلدەرىندە جازىلعان بولۋى قاجەت. ەڭ باستىسى, بۇيىمدى قالاي قاۋىپسىز پايدالانۋى جونىندە نۇسقاما قوسا تىركەلۋى قاجەت. ال, ارزاندىعىنا قىزىعىپ, ليتسەنزياسى جوق تاۋاردى بازاردان ساتىپ الىپ پايدالانۋ اسا قاۋiپتi ەكەنiن ەسكەرتەدى. ستاتيستيكا مالiمەتتەرi بويىنشا, جىل سايىن وتقا كۇيiپ جاراقاتتانۋشىلار جاڭا جىلدىق مەرەكە قارساڭىندا ارتا تۇسەدi ەكەن. وسى كەزدە مۇنداي جاراقات الۋشىلار قاتارى شامامەن 30-35 پايىزعا ارتادى. ونىڭ ۇستiنە پايدالانۋ مەرزiمi ءوتiپ كەتكەن پيروتەحنيكالىق زاتتاردىڭ قۇرامىندا باري بولسا, جابىق عيمارات iشiندە ودان ادام ۋلانىپ قالۋى ىقتيمال. سوعان قاراماستان, بۇگىندە قالتاسى كوتەرەتىندەرى ارنايى دۇكەندەردەن ساتىپ الىپ جاتسا, ەندى بىرەۋلەرى قىتايدان اكەلىنگەن ارزانقول تاۋاردىڭ ساپاسىنا ءمان دە بەرمەستەن بالالارىن الدارقاتىپ جاتادى. سوندىقتان مەرەكەنى لايىقتى قارسى العىسى كەلگەن ءاربىر ادام وتشاشۋلاردى ارنايى سەرتيفيكاتى بار دۇكەندەردەن ساتىپ الىپ, جابىقجايلاردا قولدانباعاندارى ءجون.
الەمدە پيروتەحنيكالىق وتشاشۋلاردى قايدا, قاشان, قالاي پايدالانۋعا بولادى دەگەن قاعيدالار بەكىتىلگەن. ماسەلەن, يرلانديادا وتشاشۋعا مۇلدە تىيىم سالىنعان. زاڭدى بۇزۋشىلارعا ايىپپۇل تولەتەدi ءارi اباقتىعا وتىرعىزادى. فينليانديا مەن نورۆەگيادا وتشاشۋ قۇرالدارى تەك جاڭا جىل مەرەكەسi قارساڭىندا عانا ساتىلادى. باسقا دا ەۋروپا ەلدەرi مۇنداي زاتتاردى ساتۋ, ساقتاۋ جانە قولدانۋ قاقىسىندا قاتاڭ ەرەجەلەرگە باعىنادى. مۇندا دا كامەلەتكە تولماعاندارعا تىيىم سالىنعان. ونىڭ ۇستiنە ولاردى جاعاتىن كەزدە مiندەتتi تۇردە ارناۋلى كوزاينەك كيۋ كەرەك. ايتپەسە, وتشاشۋ كەزiندە جاراقاتتانۋشىلار قاتارى تىم كوبەيiپ كەتەدi دەپ ساقتانادى.
ەركەجان ساتىمبەك
