جۇمىسسىز ادامنىڭ ەكى قولعا ءبىر كۇرەك ىزدەپ, جۇمىسقا ورنالاسۋعا ۇمىتتەنىپ باراتىن جەرى – نۇر-سۇلتان قالالىق جۇمىسپەن قامتۋ ورتالىعى. جىل باسىنان بەرى مۇندا 17 مىڭنان اسا ازامات كەلىپ, جۇمىسقا ورنالاستىرۋ جونىندە ءوتىنىش ءبىلدىردى.
بۇگىنگى تاڭدا ورتالىقتا 4 مىڭنان اسا ادام جۇمىسسىز رەتىندە تىركەۋدە تۇر. ءبىر قۋانارلىعى, جىل باسىنان بەرى وسى ورتالىققا جۇگىنگەن 7200 ادام تۇراقتى تۇردە جۇمىسپەن قامتىلىپتى. ال ءۇش مىڭعا جۋىعى قازىردىڭ وزىندە جۇمىسپەن قامتۋ بەلسەندى ءىس-شارالارىمەن اينالىسىپ ءجۇر.
– بىزگە, اسىرەسە, جاستار كوپ كەلەدى. سوندىقتان وسى ورتالىقتا جۇزەگە اسىرىلعان جاستار تاجىريبەسى مەن قوعامدىق جۇمىستاردىڭ الاتىن ورنى ەرەكشە. سول ارقىلى بۇگىنگى تاڭدا مىڭداعان جاس جىگىتتەر مەن قىزدار كۇندەلىكتى ناپاقالارىن تاۋىپ ءجۇر, – دەيدى حالىقتى جۇمىسپەن قامتۋ ورتالىعى جۇمىسقا ورنالاستىرۋعا جاردەمدەسۋ ءبولىمىنىڭ باسشىسى باعيلا ورىمبەتوۆا.
