پايدالى پروتوتيپتەر جاسادى
كەشە نازارباەۆ ۋنيۆەرسيتەتىندە «TOM: Nur-Sultan» مەيكاتونى ءوتتى.
ەلوردادا تۇڭعىش رەت ۇيىمداستىرىلىپ وتىرعان 72 ساعاتتىق مارافوندا 7 توپ باق سىنادى. ولار مۇمكىندىگى شەكتەۋلى جانداردىڭ ءومىر ساپاسىن ارتتىراتىن پروتوتيپتەردى جاسادى.
– ءىس-شارانىڭ باستى ماقساتى – جاستار اراسىنداعى ينتەللەكتۋالدىق كلاستەردى دامىتۋ. ماسەلەن, ءبىزدىڭ جاستار رەسۋرستىق ورتالىعى نۇر-سۇلتان قالاسىنىڭ جاستار ساياساتىن جۇزەگە اسىرۋ بارىسىندا ءتۇرلى جاستارمەن جولىعامىز. سوندا عىلىمي-زەرتتەۋ قىزمەتىن مىقتاپ دامىتۋ قاجەتتىگىن تۇسىندىك. مەيكاتون سەكىلدى سايىستار وسىعان كومەكتەسەدى دەپ ويلايمىن, – دەيدى «استانا جاستارى» ۇيىمىنىڭ جەتەكشىسى شىڭعىس تىلەۋلين.
بايقاۋدا جاستار ەرەكشە كومەكتى كەرەك ەتەتىن كىسىلەرگە ارنالعان مەحانيكالىق اربالاردى جەتىلدىرىپ, بالداق پەن تايعاناۋعا قارسى اياق كيىمنىڭ جاڭا ءتۇرىن ۇسىندى, سونداي-اق ءبىر كوماندا كوزى كورمەيتىن ادامدار ءۇشىن ءموبيلدى قوسىمشا ويلاپ تاپسا, ەندى ءبىرى اياق بۇلشىق ەتتەرىن جاتتىقتىراتىن اپپارات جاسادى.