شىلدە ايىنان بەرى ەلوردادا ەستۋ قابىلەتى تومەن جاندار ەڭبەك ەتەتىن «ەمودجي» كافەسى جۇمىس ىستەيدى. مۇندا كەلۋشى قوناقتار تاماققا تاپسىرىستى ىم-يشارا ارقىلى بەرەدى. ماسەلەن, كوفە ىشكىڭىز كەلسە, ەكى جۇدىرىعىڭىزدى تىگىنەن ءبىرىنىڭ ۇستىنە ءبىرىن قويىپ, ديىرمەن تارتقانداي قيمىل جاساساڭىز بولعانى. اتالعان جوبانىڭ نەگىزىن سالۋشى ازامات بازىلوۆ اڭگىمە بارىسىندا الەۋمەتتىك كاسىپكەرلىكتىڭ قىر-سىرىمەن ءبولىستى.
ايلىق از بولعان سوڭ, قوسىمشا تابىس كوزىن ىزدەدىم
ءۇرجاردان استاناعا كوشىپ كەلگەنىمە ەكى جارىم جىلداي بولدى. قازىر ونكولوگيا ورتالىعىندا انەستەزيولوگ-دارىگەر بولىپ جۇمىس ىستەيمىن. العاشىندا وسى جاقتان پاتەر السام با دەپ ويلاپ, العاشقى جارناعا اقشا جيناعانمىن. بىراق جالاقىمنىڭ ازدىعىنا بايلانىستى بانكتەر يپوتەكا بەرۋدەن باس تارتتى. ءبىر جارىم «ستاۆكامەن» 150 مىڭ تەڭگە جالاقى الامىن. بىراق كۇن كورىپ, تىرلىك قىلۋ كەرەك. ءدارىحانا بيزنەسىمەن اينالىسىپ كورسەم بە دەپ ەدىم, بىراق مۇندا باسەكە جوعارى, جابۋعا تۋرا كەلدى. سوسىن قىتايدان فلەشكا سەكىلدى كەرەك-جاراقتارعا تاپسىرىس بەرىپ, ساتا باستادىم. تاعى نەنى بايقاپ كورۋگە بولادى دەپ, ءبىر جىل بويى اپتا سايىن قالاداعى بيزنەس-ترەنينگتەرگە قاتىسىپ ءجۇردىم. بىردە ەمين اسكەروۆ دەگەن جىگىتپەن تانىستىم. ءوزى الەۋمەتتىك كاسىپكەر ەكەن. اڭگىمەلەسە كەلە, مەنىڭ دە وسى سالاعا دەگەن قىزىعۋشىلىعىم وياندى.
اتا-اناسىنىڭ نەسيەسىن جاۋىپ بەرگىسى كەلەدى
ەستۋ قابىلەتى تومەن جاندار ماسەلەسى مەنى بالا كۇنىمنەن بەرى تولعاندىراتىن. بىرگە وسكەن بولە اعامنىڭ تۋعالى قۇلاعى ەستىمەيدى. قازىر جاسى – قىرىقتا. وسىعان دەيىن قۇرىلىستا دا جۇمىس ىستەدى, پويىزدا ءجۇرىپ داپتەر-قالام دا ساتتى. ولاردى كوپ جەردە الداپ كەتەتىن, اقشالارىن دۇرىس بەرمەيدى. وسى جايت مەنىڭ شىمبايىما قاتتى باتاتىن. سوندىقتان ءوز بيزنەسىم ارقىلى اعام سەكىلدى ەرەكشە قاجەتتىلىكتى تالاپ ەتەتىن جانداردىڭ جۇمىسقا ورنالاسۋىنا كومەكتەسىپ, قولداعىم كەلدى.
WhatsApp جەلىسىندە وزدەرىنىڭ ورتاق چاتتارى بار. كافەگە جۇمىسشىلار الاردا سول جەرگە حابارلاندىرۋ جىبەردىك. كەيىن بىرىنەن ءبىرى ءبىلىپ, كەلە باستادى. مەن 30-عا دەيىنگى جاستاردى الۋعا تىرىسامىن. ويتكەنى ۇلكەندەرىنىڭ كوبىسىندە «ماعان كومەكتەسسىن, ماعان بەرسىن» دەگەن باسقاعا يەك ارتۋشى مىنەز باسىم. ولار كوپ نارسەگە سەنبەيدى. بالكىم, ادامداردىڭ الداۋىنا ءجيى تۇسكەندىكتەن دە بولار. ال جاستار بولسا جانىپ تۇر. «ەڭبەك ەتكىم كەلەدى, اقشا تاپقىم كەلەدى, اكە-شەشەمنىڭ نەسيەسىن جاۋىپ بەرگىم كەلەدى, مەنى جۇمىسقا الىڭىزشى» دەپ باسقا وڭىرلەردەن دە كەلەدى.
تاپسىرىستاردى جەتكىزۋگە اكەم دە كومەكتەسەدى
نەگە «ەمودجي»؟ بۇل – ۆيرتۋالدى الەمدە, حابارلامالاردا ءبىز قولداناتىن «سمايليكتەردىڭ» جالپى اتاۋى. ءبىزدىڭ كافەگە كەلگەن كىسىلەر دە ءوز تاپسىرىسىن ساۋساقتارىمەن ىمداپ, ءتۇرلى قيمىلدار جاساۋ ارقىلى تۇسىندىرەدى.
جۋىردا جەلتوقسان كوشەسىنەن ەكىنشى كافەمىزدى اشتىق. ەكەۋىندە وتىز شاقتى قىزمەتكەر بار. ولاردىڭ ءبىرازى سىرتتان – قىزىلوردادان, الماتىدان, اتىراۋدان, تالدىقورعاننان كەلگەن. كوبىسى داياشى بولعىسى كەلەدى. بىراق ماعان اسپازدار كەرەك. وسى سالاعا ماماندانعان جاستار بولسا, تىپتەن جاقسى. قازىرگى باس اسپازىمىز – قازاقستانداعى باس اسپازدار گيلدياسىنىڭ مۇشەسى. «بالالاردى ۇيرەتەيىن» دەپ ءوزى ۇسىنىس ايتىپ, بىزگە جاردەمدەسىپ جاتىر. اسپازدىقتىڭ قىر-سىرىن ۇيرەنىپ العان سوڭ, ۇل-قىزدار ءارى قاراي وزدەرى الىپ كەتەر دەپ ويلايمىن.
تاعامدارىمىز قوناقتاردىڭ كوڭىلىنەن شىعىپ جاتىر. ەلەكتر جەلىسىنە بايلانىستى پروبلەما تۋىپ, سەيفۋللين كوشەسىندەگى كافەمىز ۋاقىتشا جابىق تۇرعان. كليەنتتەرىمىز «سەندەردىڭ ناندارىڭدى ساعىندىق, قاشان اشاسىڭدار؟» دەپ كۇن سايىن حابارلاسادى. نەگىزگى تابىس كوزى – كەشەندى تۇسكى اس. مەكەمەلەردەن تاپسىرىس الامىز. باعاسى – 900 تەڭگە, ەگەر 10-نان كوپ تاپسىرىس بولسا جەتكىزۋ تەگىن. تاپسىرىستاردى ءوزىم جەتكىزەمىن. مەنىڭ قولىم تيمەي جاتسا, اكەم كومەكتەسەدى.
«مۇگەدەكتەرمەن» بايلانىسۋدان قاشادى
ەرەكشە جاندارمەن جۇمىس ىستەۋ دە ەرەكشە. اعامدى كورىپ وسكەن سوڭ, ولاردىڭ پسيحولوگياسىن جاقسى بىلەمىن. مىسالى, ولاردى الداۋعا بولمايدى, بالا سەكىلدى قاتتى سەنگىش. الدەنەگە ۋادە بەردىڭ ەكەن, ورىنداۋىڭ كەرەك. اراسىندا كەيدە جالقاۋلانىپ, «وياتقىشتى ەستىمەي قالدىق» دەگەن سىلتاۋمەن جۇمىسقا كەشىگىپ كەلەتىن. مەن بۇنىڭ امالىن تاپتىم. ەندى جالاقىنى كۇنىنە ەمەس, ساعاتىنا تولەيتىن بولدىم. كەشىكتىڭ ەكەن, ول ساعاتىڭ تولەنبەيدى. ەسەسىنە ۋاقىتىلى كەلەتىن بولدى.
ءبىز ءبىر وتباسى سەكىلدىمىز. مەن ولاردان ەشتەڭە جاسىرماي, ءبارىن اشىق ايتامىن, كەيدە اقىلداسامىن, كەڭەس سۇرايمىن, جوسپارىممەن بولىسەمىن. قارجىدان قىسىلىپ تۇرعان شاقتا ونى دا ءتۇسىندىرىپ, «تاپسىرىس از بولىپ جاتىر. بۇل ايدا جالاقى ءسال كەشىگىپ تۇسەدى. ەگەر بىرەۋلەرىڭنىڭ نەسيەنى تولەيتىن كۇندەرىڭ تاياپ قالسا, ونى ايتىڭدار. اۋەلى سولاردىكىن بەرەيىك» دەيمىن. قاس-قاباعىڭدى بىردەن ۇعادى.
ولارعا تەك جۇمىس ۋاقىتىندا عانا ەمەس, بارلىق ۋاقىتتا قامقور بولۋعا تىرىسامىن. مۇمكىندىگىنشە تازا, قاۋىپسىز جەردە, بىرگە تۇرعاندارىن قالايمىن. وكىنىشكە قاراي, كوبىسى ءالى كۇنگە دەيىن حوستەلدە تۇرادى. پاتەر جالدايىق دەسەم, پاتەر يەلەرى «مۇگەدەك» دەپ ولارعا جالعا بەرۋدەن قاشادى. «ەشقانداي دا مۇگەدەك ەمەس. اياق-قولدارى ساۋ. تەك ەستىمەيدى. ودان سىزگە كەلەر ەش اۋىرلىق جوق» دەپ سويلەسىپ كورمەكشى بولىپ ەدىم. وزدەرىنىڭ ايتۋىنشا, «ارتىق پروبلەما كەرەك ەمەس».
كەپىلسىز نەسيە الۋ مۇمكىن بولماي تۇر
قازىرگى قيىندىقتاردىڭ كوبى قارجىعا كەپ تىرەلەدى. پاتەردىڭ العاشقى جارناسى ءۇشىن دەپ جيناعانىمدى وسى بيزنەسكە سالدىم, بىراق ءالى دە ءبىراز اقشا قاجەت. قوماقتى نەسيە الۋعا مەندە كەپىلگە قوياتىن مۇلىك جوق. سوندىقتان مەملەكەت تاراپىنان الەۋمەتتىك كاسىپكەرلىك ءۇشىن كەپىلسىز قانداي دا ءبىر نەسيە الۋ مۇمكىندىگى بەرىلسە, جاقسى بولۋشى ەدى.
جاقىندا زاڭگەر بولىپ ىستەيتىن ءبىر جىگىت كەلىپ, ەرەكشە قاجەتتىلىكتى تالاپ ەتەتىن قىزمەتكەرلەر جالاقىسىنىڭ 35 پايىزىن مەملەكەت ەسەبىنەن تولەۋگە بولاتىنىن ايتتى. دەرەۋ جۇمىسپەن قامتۋ ورتالىعىنا بارعان ەدىم, سويتسەم ول ءۇشىن الگى قىزمەتكەرلەر نۇر-سۇلتان قالاسىندا تىركەلۋى كەرەك ەكەن. ال باعانا ايتقانداي, ءبىزدىڭ بالالاردىڭ ءبىرازى سىرتتان كەلگەن, ونىڭ ۇستىنە حوستەلدە تۇرىپ جاتقاندىقتان, مۇندا تىركەلە المايدى.
بىراق قانداي قيىندىقتار تۋسا دا, ونىڭ ءبارى ۋاقىتشا ەكەنىنە سەنەمىن. قۇدايعا شۇكىر, از عانا ۋاقىتتىڭ ىشىندە ءبىرشاما كليەنت جينادىق. ءبىزدى كوبىنەسە ەرەكشە قاجەتتىلىگى بار جاندار قولدايدى. ءوزارا جيىلا قالسا, كەزدەسۋ ورنى ەتىپ ءبىزدىڭ كافەنى تاڭدايدى, تۋعان كۇندەرىن دە بىزدە جاسايدى. وتباسىلارىمەن ءجيى كەلەدى.
تاماققا تەلەفون ارقىلى تاپسىرىس بەرۋشىلەر كوپ. سوندىقتان جاقىندا كولل-ورتالىق اشساق دەگەن جوسپارىم بار. وپەراتور ەتىپ قۇلاعى ەستيتىن, بىراق اربادا وتىراتىن جانداردى العىم كەلەدى. «قاشان ءبىزدىڭ قالامىزدا اشىلاسىزدار؟» دەپ كۇتىپ جۇرگەندەر جەتەرلىك, بولاشاقتا وزگە دە وڭىرلەردەگى ەرەكشە مۇقتاجدىققا يە جاستاردى جۇمىسپەن قامتىپ, اياقتارىنان تۇرۋعا جاردەمدەسسەم دەيمىن.
