پيك جۇمىسىنا كوڭىلىڭىز تولا ما؟
قالالىق جەردە پيك تۋرالى اڭگىمە قىزۋ تالقىلانادى. اسىرەسە, تۇرعىنداردىڭ ولاردىڭ قىزمەتىنە كوڭىلدەرى تولا بەرمەيدى. سول ءۇشىن اكىمدىككە حات جازادى, جۋرناليستەردى شاقىرتىپ, تەلەارنادان كورسەتەدى, باسىلىمعا جاريالايدى. بىراق ودان شىعىپ جاتقان قورىتىندى از. جىل باسىنان بەرى ەلوردالىق تۇرعىن ءۇي ينسپەكتسياسىنا جەكە جانە زاڭدى تۇلعالاردان 3 مىڭعا جۋىق ءوتىنىش تۇسكەن.
كوشپەلى جيىن كوپ وتكەن
بۇل مالىمەتتى سەيسەنبى كۇنى استانا اكىمدىگىندە وتكەن باسپاسوز ءماسليحاتىندا تۇرعىن ءۇي ينسپەكتسياسى باسقارماسىنىڭ باسشىسى ءاليحان قۋاتبەكوۆ جەتكىزدى. ونىڭ ايتۋىنشا, وسى ءوتىنىش نەگىزىندە قر كاسىپكەرلىك كودەكسىنە سايكەس پاتەر يەلەرى كووپەراتيۆى مەن قىزمەت كورسەتۋشى كومپانيالاردىڭ جۇمىسىنا 87 جوسپاردان تىس تەكسەرۋ وتكىزىپ, ارىزدار بويىنشا تالداۋ جۇرگىزگەن.
ساراپتاما قورىتىندىسىندا زاڭ بۇزۋشىلىقتار انىقتالىپ, ولاردى جويۋعا 102 ۇيعارىم جاسالعان.
بۇگىنگى كۇنى قالا اۋماعىندا 2 392 كوپ پاتەرلى تۇرعىن ءۇي بار, ولارعا 419 پيك جانە باسقا دا ۇيىمدار قىزمەت كورسەتەدى. قىزمەت كورسەتۋ بويىنشا ورتاشا تاريف م2 ءۇشىن 45 تەڭگەنى قۇرايدى. ناقتىراق ايتقاندا, ەڭ تومەنگى تاريف – 20-دان 35-كە دەيىن, ەڭ جوعارعى تاريف – 80-نەن 150 تەڭگەگە دەيىن. سونىمەن بىرگە, تۇرعىن ءۇي ينسپەكتسياسىنىڭ باستاماسىمەن پيك-تەردىڭ جانە قىزمەت كورسەتۋشى ۇيىمداردىڭ دۇرىس جۇمىس ىستەمەۋىنە بايلانىستى تۇرعىن ۇيلەردى باسقارۋ جانە كۇتىپ ۇستاۋ ماسەلەلەرى بويىنشا تۇرعىندارمەن 200-دەن اسا كوشپەلى جيىن وتكىزىلگەن. تۇرعىندار 9 قىزمەت كورسەتۋشى ۇيىمدى اۋىستىرىپ, سونىڭ ىشىندە پيك-تەردىڭ 3 ءتوراعاسىن قايتا سايلاعان.
جەرتولەنى زاڭسىز پايدالانعاندار جەتكىلىكتى
قازىرگى كۇندە قالاداعى كوپ پاتەرلى تۇرعىن ۇيدەگى جەرتولەلەردى زاڭسىز پايدالانۋ ەتەك العان. جيىندا بۇل ماسەلە دە كەڭىرەك ايتىلدى. «بۇگىندە قۇرىلىس سالۋشىلار جەرتولەنى دە, تەحنيكالىق قاباتتاردى دا جالعا تاپسىرادى. باسقا جاعىنان, مەنشىك يەلەرىنىڭ بارلىعى بىردەي كوندومينيۋمدى تىركەۋگە كەلىسە بەرمەيدى, ولار تەك ءپاتەرلەرىن عانا مەنشىك سانايتىنىن ايتادى. وسى باعىتتا ناتيجەلى جۇمىس جۇرگىزىلۋدە, بۇگىنگى كۇنى اكىمشىلىك تاراپىنان بارلىق ماسەلەلەر رەتتەلدى, قۇجاتتاردى قابىلداۋ جەڭىلدەتىلدى. 1 قاراشاداعى ءتىركەۋ ناتيجەسىندە 88 پايىزدى قۇرادى. بۇگىندە استانا رەسپۋبليكا بويىنشا العاشقى ورىنعا شىقتى. تىركەۋدىڭ باستى ارتىقشىلىعى تۇرعىندار ورتاق مۇلىكتىڭ تولىق قۇقىلى مەنشىك يەلەرى بولادى, ال قۇرىلىس سالۋشىلار مەن پيك-تەر ولاردىڭ كەلىسىمىنسىز ول مۇلىكتى پايدالانا المايدى» دەپ ءتۇسىندىردى ءاليحان قۋاتبەكوۆ. سونىمەن قاتار, باسقارما باسشىسى قالاداعى اپاتتى ۇيلەردىڭ جاعدايى تۋرالى ايتىپ ءوتتى.
بىلىكتى ماماندار تاپشى
پيك-ءتىڭ ماقساتى ورتاق مەنشىكتەگى كوندومينيۋم نىساندارىنىڭ ينجەنەرلىك جابدىقتارى مەن سانيتارلىق-تەحنيكالىق قىزمەتىن قامتاماسىز ەتۋ قاجەت. ونىڭ قىزمەتىنە تۇرعىندار اي سايىن ءۇيدىڭ شارشى مەترى ءۇشىن اقشا تولەيدى. بىراق وسى قارجى توڭىرەگىندە دە ءسوز كوپ. مىسالى, جينالعان قارجىنىڭ ءبىر بولىگى ونىڭ قىزمەتكەرلەرىنىڭ جالاقىسىنا, كۇردەلى, اعىمدىق جوندەۋ جۇمىستارىنا جۇمسالۋ قاجەت. وسى ارادا تۇرعىندار ولاردىڭ قىزمەتى بارىنشا اشىق بولعانىن قالاپ, ۋاقىتىلى ەسەپ بەرىپ تۇرعانىن قالايدى. ماسەلەن, ءۇيدىڭ ىشىندەگى سانتەحنيكالىق جۇمىستاردىڭ بارلىعى اقىلى ەكەنى ايان. جيىندا بىلىكتى ماماندار تۋرالى دا ءسوز بولدى. استانا قالالىق پيك-تەر قاۋىمداستىعىنىڭ توراعاسى ميزامبەك كەنجەباەۆتىڭ ايتۋىنشا, كەيبىر ۇساق پاتەر يەلەرى كووپەراتيۆتەرىنىڭ توراعالارى بولىپ ءتۇرلى ماماندىق يەلەرى تاعايىندالعان. ولار سودان ينجەنەرلىك جۇمىستىڭ قىر-سىرىن ءجىتى بىلە بەرمەيدى. كەيبىر كووپەراتيۆتەردە ەلەكتريك, سانتەحنيك سەكىلدى ماماندار جوق. ونى ولار باسقا پيك-تەردەن جالداپ شاقىرادى. سودان كەلىپ قيىندىق تۋادى. سوڭعى جىلدارى تۇرعىن ۇيلەرگە ساپالى قىزمەت كورسەتۋ ءۇشىن سەرۆيستىك كومپانيالار قۇرىلعان. سول سەرۆيستىك كومپانيالارمەن پاتەر يەلەرى كووپەراتيۆتەرى وزدەرىنىڭ مۇمكىندىكتەرىنە قاراي شارتقا وتىرىپ, اتالعان كومپانيالار قىزمەت كورسەتەتىن ۇيلەردىڭ سانى وسكەن.
جوسپارلانعان جۇمىس ناتيجەسىن بەردى
2020 جىلعا دەيىنگى ءوڭىرلەردى دامىتۋ باعدارلاماسىن ىسكە اسىرۋ اياسىندا ەلوردادا بيىل 3 كوپ پاتەرلى تۇرعىن ۇيگە كۇردەلى ءجوندەۋ جۇمىستارى جۇرگىزىلىپ, 49 ليفت قوندىرعىسى اۋىستىرىلعان. «تۇرعىن ءۇي ينسپەكتسياسى الداعى جىلى 150 كوپ پاتەرلى تۇرعىن ۇيدە كوندومينيۋم نىساندارىنا تەحنيكالىق تەكسەرۋ جۇرگىزىپ جانە 10 كوپ پاتەرلى تۇرعىن ۇيدە ەنەرگەتيكالىق تەكسەرۋدى جوسپارلاپ وتىر» دەپ ءوز ءسوزىن تۇيىندەپ ءوتتى تۇرعىن ءۇي ينسپەكتسياسى باسقارماسىنىڭ باسشىسى ءاليحان قۋاتبەكوۆ.
قىسقاسى, پيك تۋرالى پىكىر كوپ. سوندا دا وسى باعىتتا بىرقاتار جۇمىستار اتقارىلىپ جاتقاندىعىن بىلدىك. ناتيجەسى دە جامان ەمەس. ەندەشە, وسىعان سەنەيىك.
ازامات ەسەنجول