استانا قالالىق ءماسليحاتىنىڭ ەكونوميكا, ونەركاسىپ جانە كاسىپكەرلىك ماسەلەلەرى جونىندەگى تۇراقتى كوميسسياسىنىڭ كەزەكتى وتىرىسىندا 2017-2019 جىلدارعا ارنالعان قالا بيۋدجەتىنىڭ جوباسى تالقىلاندى.
ەكونوميكا جانە بيۋدجەتتىك جوسپارلاۋ باسقارماسى باسشىسىنىڭ ورىنباسارى گۇلنار ءجۇسىپوۆا ساۋلەت جانە قالا قۇرىلىسى, كاسىپكەرلىك جانە ونەركاسىپ باسقارماسى, ينۆەستيتسيالار جانە دامۋ باسقارماسى جانە استانا قالاسى بويىنشا تەكسەرۋ كوميسسياسىنىڭ الداعى ءۇش جىلدىق بيۋدجەتتەرىنىڭ جوباسىنا تالداۋ جاسادى.
بايانداماشى الداعى جىلدارى دا شاعىن جانە ورتا بيزنەستىڭ وركەندەۋىنە ەرەكشە نازار اۋدارىلاتىنىن ايتتى. وسىعان بايلانىستى ءتۇرلى اكىمشىلىك كەدەرگىلەردى قىسقارتىپ, تولەمگە قابىلەتتى سۇرانىس جاساپ, «بيزنەستىڭ جول كارتاسى-2020» باعدارلاماسى بويىنشا تىكەلەي قارجىلاي قولداۋ كورسەتىلەتىن بولادى. ەگەر بولجاۋ ساندارعا ءسوز بەرسەك, كەلەسى جىلى شاعىن جانە ورتا بيزنەس سالاسىنداعى تاۋار ءوندىرىسىنىڭ كولەمى 3541 ملرد تەڭگەگە جەتپەك. بيۋدجەتتە جوسپارلانعانداي, كاسىپكەرلەر ءۇشىن بەلگىلەنگەن قاراجات بانك كرەديتتەرى بويىنشا پايىزدىق ءمولشەرلەمەنىڭ ءبىر بولىگىن سۋبسيديالاۋ, بانك كرەديتتەرى بويىنشا ءىشىنارا كەپىلدىك بەرۋ سياقتى قارجىلاندىرۋ كوزدەرى ەسكەرىلگەن.
ينۆەستيتسيالار جانە دامۋ باسقارماسى بويىنشا استانا قالاسىنىڭ 2017-2019 جىلدارعا ارنالعان بيۋدجەتىندە 3 417 605 مىڭ تەڭگە جوبالانعان. ول ءۇش كەزەڭدە, اعىمداعى التى باعدارلامانىڭ شەڭبەرىندە جۇزەگە اسىرىلادى. استانانىڭ جاڭا ەلوردا رەتىندەگى حالىقارالىق بەدەلىن كوتەرۋگە, ونىڭ گۇلدەنۋىنە, قالانىڭ يننوۆاتسيالىق دامۋىن قامتاماسىز ەتۋ ءۇشىن قارجى قاراستىرىلعان. تۋريزم قىزمەتىن جەتىلدىرۋ ءۇشىن دە بيۋدجەتتەن قوماقتى قارجى جوسپارلانىپ, ونىڭ كولەمى 438 441 مىڭ تەڭگەنى قۇراپ وتىر.
ساۋلەت جانە قالا قۇرىلىسى باسقارماسى جەرگىلىكتى دەڭگەيدە ساۋلەت جانە قالا قۇرىلىسى سالاسىنداعى مەملەكەتتىك قىزمەتتى جۇزەگە اسىرادى. وسى باعىتتاعى قىزمەتتىڭ شىعىندارىن ەسەپتەگەن بايانداماشى جوسپارلانعان قاراجاتقا تالداۋ جاساپ, الداعى ءۇش جىلدا يگەرىلەتىن قارجىنىڭ بولجالدى ناتيجەسىنە توقتالدى.
ايگۇل ۋايسوۆا
