استانادا قالانىڭ تۇرعىن ءۇي-كوممۋنالدىق شارۋاشىلىعىنا ارنالعان ارناۋلى پورتال اشىلدى. بۇل اقپارات الاڭىندا پيك جەتەكشىلەرى, كوممۋنالدىق قىزمەت كورسەتۋشى مەكەمەلەردىڭ وكىلدەرى, سونداي-اق پاتەر يەلەرى ءوزارا پىكىر الماسىپ, تاجىريبە بولىسۋگە مۇمكىندىك الاتىن بولادى.
– بۇل پورتال ارقىلى قالاداعى تۇرعىن ۇيلەرگە قىزمەت كورسەتۋدىڭ, جالپى تكش سالاسىنداعى پروبلەمالاردى اشىق تالقىلاۋعا جول اشىلادى. تۇرعىندار وزدەرىن مازالاعان ماسەلەلەر بويىنشا پيك نەمەسە كوممۋنالدىق قىزمەت كورسەتۋشى مەكەمەلەردىڭ باسشىلارىنا تىكەلەي شىعىپ, ورىن العان پروبلەمالاردى شەشۋگە اتسالىسا الادى. ءبىزدىڭ نەگىزگى ماقساتىمىز – قالانىڭ تۇرعىن ءۇي-كوممۋنالدىق شارۋاشىلىعىندا اقپارات الماسۋ جۇيەسىن قالىپتاستىرۋ, – دەيدى پورتالدىڭ قۇرىلتايشىسى ءارى ۇيلەستىرۋشىسى «AstanaOpenCity» جشس ديرەكتورى رۋسلان شاريپوۆ.
بۇگىندە ۇيلەستىرۋشى كومپانيا قالاداعى پيك جانە باسقا دا قىزمەت كورسەتۋشى كومپانيالارمەن كەلىسىمدەر جۇرگىزۋدە. پورتال قىزمەتى ابونەنتتىك تولەم جۇيەسىندە بەرىلەدى. بۇل تولەم ءار پاتەردەن 10 تەڭگە كولەمىندە بەلگىلەنىپ وتىر. تولەمدى قىزمەتتى الۋشى ۇيىم, ياعني پيك نەمەسە باسقا دا كوممۋنالدىق قىزمەت كورسەتۋشى ۇيىم تولەيتىن بولادى.
پورتال ءوز جۇمىسىن استانا قالاسىنىڭ تۇرعىن ءۇي ينسپەكتسياسىمەن تىعىز بايلانىستا جۇرگىزبەك. الداعى ۋاقىتتا وسى پورتالدا قالاداعى پيك, كوممۋنالدىق قىزمەت كورسەتۋ مەكەمەلەرىنىڭ, ليفت شارۋاشىلىقتارىنىڭ رەيتينگتەرى جاريالاناتىن بولادى.
تۇپتەپ ايتقاندا, استانادا تۇرعىن ءۇي-كوممۋنالدىق شارۋاشىلىقتىڭ جۇمىسىن جانداندىرۋعا باعىتتالعان پايدالى پورتال قىزمەتى ىسكە قوسىلىپ وتىر.
پورتالدىڭ مەكەنجايى: astana.opencity.kz.
