«اپات ايتىپ كەلمەيدى» دەگەن راس ەكەن. اي-كۇننىڭ امانىندا استانادان الماتىعا جول تارتقان «بايتەرەك» پويىزى وتار جانە شۋ ستانتسيالارىنىڭ اراسىندا اپاتقا ۇشىرادى.
ناتيجەسىندە, 829 جولاۋشى مىنگەن پويىزدىڭ 8 ۆاگونى اۋدارىلدى. 14 ادام اۋرۋحاناعا ءتۇستى. شويىن جولداعى اپاتتان 12 جاسار الەكسەي مالينەۆتىڭ ءومىرى ءۇزىلدى.
زارداپ شەككەن جولاۋ شىنىڭ ءبىرى – استانالىق 48 جاستاعى ءالىبي بايجانوۆ. ونىڭ ەكى اياعى سىنعان. شۋ قالاسىنداعى اۋرۋحانا دارىگەرلەرى ءالىبيدىڭ اياعىنا وتا جاسادى. ءالىبيدىڭ جۇبايى ايگۇل كارىموۆا دا وقىس وقيعانىڭ قالاي بولعانىن ايتىپ بەردى: «ءبىز 14-ۆاگوندا ەدىك. ساعات تۇسكى 1-ءدىڭ كەزىندە پويىز تەڭسەلە باستادى. ءبىر كەزدە اۋدارىلدى. تەرەزەنى سىندىرىپ, سىرتقا شىقتىق. ۆاگوندا 18 بالا بار ەدى. باسقا ۆاگوننان كومەككە كەلگەن اسكەري جىگىتتەر ءبارىمىزدى شىعارىپ الدى. كۇيەۋىم پويىزدىڭ تەجەگىشىندە اقاۋ بارىن, سونىڭ ناتيجەسىندە ۇنەمى تەڭسەلە بەرگەنىن بولجاعان ەدى».
جەڭىل جاراقاتىمەن اۋرۋحاناعا جەتكىزىلگەن 13 جولاۋشىعا دارىگەرلىك كومەك كورسەتىلىپ, بارلىعى ۇيلەرىنە جىبەرىلدى. اۋدارىلعان ۆاگوندار جولاۋشىلارىنىڭ ءبىر بولىگى ءارى قاراي پويىزعا مىنۋدەن باس تارتىپ, اۆتوكولىكتى تاڭدادى. «جولاۋشىلار تاسىمالى» اق-تىڭ ءباسپاسوز قىزمەتى وسى وقيعا بويىنشا تەرگەۋ جۇرگىزىلەتىنىن حابارلادى. ال ينۆەستيتسيالار جانە دامۋ مينيسترلىگىنىڭ كولىك كوميتەتىندە وقيعانىڭ نەدەن بولعانىن تەكسەرەتىن ارنايى كوميسسيا قۇرىلدى. ۆەدومستۆونىڭ مالىمەتىنشە, توتەنشە جاعدايعا ءماشينيستىڭ جولدىڭ قيسىق جەرىن كورىپ, كەنەتتەن تەجەگىشتى باسۋى سەبەپ بولعان.
«قازاقستان تەمىر جولى» ۇلتتىق كومپانيا سىنىڭ وكىلدەرى پويىزدىڭ ۆاگوندارى 2012-2014 جىلدارى تۆەر جانە كريۋكوۆ ۆاگون جاساۋ زاۋىتىندا شىعارىلعانىن, تالاپقا ساي تەحنولوگيا لىق تەكسەرىستەن ءوتىپ, نورماتيۆتىك-تەحنيكالىق قۇجاتتاماعا سايكەس ەكەندىگىن مالىمدەدى. پويىز اۋدارىلعان جەردەگى شويىن جول دا جۋىردا تەكسەرىلىپتى. اقاۋ بايقالماعان. سوندا اپاتقا نە سەبەپشى بولدى؟ وتاربانىڭ تەجەگىشى مە, الدە ءماشينيستىڭ بىلىكسىزدىگى مە؟ بۇل ساۋالداردىڭ جاۋابىن ارنايى كوميسسيا انىقتايدى.
