كەشە مەملەكەت باسشىسى قاسىم-جومارت توقاەۆ ەلوردا اكىمى التاي كولگىنوۆتى قابىلدادى. پرەزيدەنتكە نۇر-سۇلتان قالاسىنىڭ الەۋمەتتىك-ەكونوميكالىق احۋالى جانە ينفراقۇرىلىمدىق دامۋ بارىسى تۋرالى مالىمەت بەرىلدى.
قالا اكىمىنىڭ پاندەميامەن كۇرەستىڭ نەگىزگى قورىتىندىلارى تۋرالى ەسەبى تىڭدالدى. ونىڭ ايتۋىنشا, كوروناۆيرۋستىق ينفەكتسياعا بايلانىستى ءبىر تاۋلىكتەگى جەدەل جاردەم شاقىرۋ 500-دەن 11-گە دەيىن, ينفەكتسيالىق ستاتسيونارلاردىڭ جۇكتەمەسى 4 مىڭنان 283 ناۋقاسقا دەيىن ازايعان.
التاي كولگىنوۆتىڭ مالىمەتىنشە, قالا كۇزدە بولۋى ىقتيمال ينفەكتسيالاردىڭ تارالۋىنا دايىندىق جۇمىستارىن باستاپ كەتتى. اتاپ ايتقاندا, ءدارى-دارمەكتەردىڭ قورى جيناقتالىپ, قاجەت جاعدايدا ستاتسيونارلاردا قوسىمشا ورىندار جاساقتالادى. 511 وتتەگى كونتسەنتراتورلارى قوسىمشا ساتىپ الىندى, قازىر جالپى 1435 اپپارات بار.
قازىر وكپەنى جاساندى تىنىستاندىراتىن 414 اپپارات بار. سونداي-اق, 600-دەن استام فلوۋمەترلەر, 500 ارنايى توسەك-ورىندار ساتىپ الىندى. جەدەل جاردەم ستانسالارى 24 جاڭا كولىكپەن قامتاماسىز ەتىلەدى.
كەزدەسۋدە جاڭا وقۋ جىلىنا دايىندىق جۇمىستارى دا ءسوز بولدى. قالا اكىمى مەملەكەت باسشىسىنا بيىل 20 مىڭ وقۋشىعا ارنالعان 12 مەكتەپ پايدالانۋعا بەرىلەتىنىن ايتتى. از قامتىلعان وتباسىلاردان شىققان بالالارعا 34500 كومپيۋتەر, مەكتەپ كيىمى جانە وقۋشىنىڭ قۇرال-جابدىقتارى بەرىلەدى.
پرەزيدەنت قاسىم-جومارت توقاەۆ قالانى ودان ءارى دامىتۋعا قاتىستى بىرقاتار تاپسىرما بەردى. اتاپ ايتقاندا, مەملەكەت باسشىسى ۇلەسكەرلىك قۇرىلىس, جاڭا جۇمىس ورىندارىن اشۋ, ينۆەستيتسيالاردى تارتۋ, تۇرعىن ۇيلەردىڭ ينفراقۇرىلىمدارىن جاڭارتۋ ماسەلەلەرىن شەشۋدىڭ ماڭىزدىلىعىن اتاپ ءوتتى.
