«استانا» كونتسەرت زالىندا كورنەكتى قالامگەر, حالىقارالىق «الاش» ادەبي سىيلىعىنىڭ يەگەرى, قوعام قايراتكەرى سوفى سماتاەۆتىڭ «ءسوز زەرگەرى, وي زاڭعارى» اتتى شىعارماشىلىق كەشى ءوتتى. كەشتە پوەزيا, پروزا, دراماتۋرگيا سىندى ادەبيەتتىڭ بارلىعى دەرلىك جانرلارىن قاتار الىپ كەلە جاتقان قالامگەردىڭ ءومىرى مەن شىعارماشىلىعى تەاترلاندىرىلعان قويىلىم ارقىلى جارقىراي كورىندى.
«بۇل ءان بۇرىنعى اننەن وزگەرەك» دەپ شاكارىم ايتپاقشى, بۇل كەش ەلوردادا ءوتىپ تۇراتىن ادەتتەگى كەشتەردەن وزگەشە بولىپ, باسىنان اياعىنا دەيىن سوفى سماتاەۆتىڭ ولەڭدەرى, داستاندارى, درامالىق شىعارمالارىمەن كوركەمدەلدى. ع.مۇسىرەپوۆ اتىنداعى قازاق مەملەكەتتىك اكادەميالىق بالالار جانە جاسوسپىرىمدەر
تەاترىنىڭ ارتىستەرى شىعارما كەيىپكەرلەرىن اسەرلى سومداي ءبىلدى. سونىڭ ىشىندە «كوگىلدىر تاكسي», «بايبىشە-توقال» سپەكتاكلدەرىنەن ۇزىندىلەر كورسەتىلدى.
استانالىق فيلارمونيانىڭ قازاق وركەسترى كۇيلەرمەن ارلەندىردى. ۇلتىمىزدىڭ باسىنان وتكەن اۋىر كۇندەردى پوەتيكالىق سيپاتتا ساحنا ارقىلى كورسەتكەن قالامگەردىڭ ءوزى دە ابىلاي حان سياقتى تاريحي تۇلعالارمەن, قاسىم امانجولوۆ سىندى ءورشىل اقىندارمەن پوەزيا تىلىندە تىلدەسىپ, وزىنە اقىلشى اعا بولعان مۇحتار اۋەزوۆ, قانىش ساتباەۆ, ەۆنەي بوكەتوۆ, نۇرعيسا تىلەنديەۆ رۋحتارىمەن سىرلاستى.
كەشتىڭ ەرەكشە فورماتتا وتكەنىن استانا قالاسى اكىمىنىڭ ورىنباسارى ەرمەك امانشاەۆ تا ءوز سوزىندە اتاپ ءوتىپ, تاماشا كەش سىيلاعانى ءۇشىن قالامگەرگە العىس ايتىپ, قازاق سالتىمەن يىعىنا شاپان جاپتى.
سوفى سماتاەۆ وتكەن عاسىردىڭ الپىسىنشى جىلدارى ماسكەۋدىڭ بولات جانە قورىتپالار ينستيتۋتىن ءبىتىردى. وسى جولدى قۋسا, قازىر بەلگىلى عالىمداردىڭ ءبىرى بولىپ وتىرار ما ەدى؟! الايدا كانديداتتىق ديسسەرتاتسيانى قورعاپ تۇرعان جەرىنەن تەحنيكالىق سالانى تارك ەتىپ, ادەبيەتكە ويىستى. مۇندا دا جەمىسسىز بولعان جوق, باسقاسىن ايتپاعاندا «ەلىم-اي» تريلوگياسىمەن ۇلتىمىزعا رۋح بەردى. جوعارى قىزمەت اتقارىپ, ەلدىك ىسكە كەلگەندە دە بۇعىپ قالعان جەرى بولمادى. كەش يەسىنىڭ قالامگەرلىك جانە قايراتكەرلىك قىرىن تەلەدراماتۋرگ,
پۋبليتسيست-جازۋشى, قازاقستاننىڭ ەڭبەك سىڭىرگەن قايراتكەرى سۇلتان ورازالى جاقسى اشتى.
«سوفى ادەبيەتكە الدىمەن اقىن بولىپ كەلدى. ودان كەيىن «ەلىم-اي» رومانى ارقىلى تاريحي سانامىزدى وياتۋعا بارىنشا ىقپال ەتتى. سوفى قوعامدىق ومىرىمىزگە دە بەلسەندى ارالاسىپ كەلە جاتىر. 1986 جىل مەنىڭ كوز الدىمدا, ورتالىق كوميتەتتە بىرگە جۇمىس ىستەدىك. كولبيننىڭ ءجونسىز ساياساتىنا, اسىرەسە ءوز ىشىمىزدەن شىققانداردىڭ شوۆينيستىك پيعىلىنا قارسى شىقتى. پارتبيلەتىنەن ايىرىلۋدان قورىققان جوق, ايىرىلمادى دا. بۇل – كەز كەلگەننىڭ قولىنان كەلمەيتىن باتىرلىق» دەدى س.ورازالى.
قازاقستان جازۋشىلار وداعى توراعاسىنىڭ ورىنباسارى مەرەكە قۇلكەنوۆ, قاراعاندى وبلىسى
مادەنيەت, ارحيۆتەر جانە قۇجاتتاما باسقارماسىنىڭ باسشىسى ەركەبۇلان اعىمباەۆ, جازۋشىلار وداعىنىڭ وسى وبلىستاعى فيليالىنىڭ توراعاسى سەرىك ساعىنتاي, اتىراۋ وبلىسى مادەنيەت, ارحيۆتەر جانە قۇجاتتاما باسقارماسىنىڭ باسشىسى سابىر سالامات كەش يەسىنە تىلەكتەرىن جەتكىزدى. كورنەكتى اقىن, حالىقارالىق «الاش» ادەبي سىيلىعىنىڭ لاۋرەاتى سەرىك تۇرعىنبەكۇلى ارناۋ ولەڭىن وقىپ بەردى. كەشتى سوفى سماتاەۆتىڭ ءوزى جىرىمەن تۇيىندەدى.
