قايسار شىنىباەۆ, «Astana ۆusiness اviation» كومپانياسىنىڭ باسشىسى: «اۋەتاكسي» ۋاقىتى تىعىز ادامدارعا ارنالعان

– قايسار, سۇحباتىمىزدى «اۋەتاكسي» قىزمەتىمەن تانىسۋدان باستاساق.
– وتكەن جىلى «اۋەتاكسيدەن» بۇرىن «Astana ۆusiness اviation» كومپانياسىن اشقان ەدىك. نەگىزگى قىزمەتىمىز – الەمنىڭ تۇكپىر-تۇكپىرىنە تۇراقتى جانە ىسكەرلىك رەيس­تەر بويىنشا جولاۋشى تاسىمالداۋ. ىسكەر ادامدارعا جەكە ۇشاق جەتكىزىپ, چارتەرلىك رەيستەر دە ۇيىمداستىرامىز. وسى كومپانيا جۇمىسىن العاش باستاعان ساتتە «قازاقستان ىشىندە تىكۇشاقپەن ۇشاسىزدار ما؟» دەپ سۇراۋشىلار كوبەيدى. وسىنداي سۇرانىستى كورگەن سوڭ, «اۋەتاكسي» قىزمەتىن ىسكە قوستىق. نەگىزگى ورتالىعىمىز – استانادا. ال, الماتى, اقتاۋ, شىمكەنت قالالارىندا ءبىزدىڭ وكىلدەرىمىز قىزمەت ەتەدى.
– دەمەك, وسى قىزمەتتىڭ نەگىزگى يدەياسى سىزگە تيەسىلى عوي؟
– ءيا.
– مۇنىڭ الدىندا قانداي قىزمەت ات­قارعانسىز؟ اۆياتسيا سالاسىنا قاتىسىڭىز بار ما؟
– 2011 جىلدان باستاپ جەكە كاسىپكەرلىكپەن اينالىسىپ كەلەمىن. ماماندىعىم – ينجەنەر. سان ءتۇرلى سالادا ىستەپ كورگەن سوڭ, اۆياتسيا سالاسىندا دا باق سىناپ كورگىم كەلدى. بۇل سالانىڭ وقۋىن تاۋىسپاعان سوڭ, العاشىندا قيىنداۋ تيەتىن بولار دەپ توپشىلاعانمىن. بىراق, جۇمىستى وڭاي الىپ كەتتىم. «اۋەتاكسي» قىزمەتىنەن بولەك, جوعارىدا ايتقان «Astana ۆusiness اviation» جۇمىسىن جۇرگىزىپ وتىرمىن. ول قىزمەتتى نەگىزىنەن ۇلكەن لاۋازىمداعى ءبىرشاما كىرپياز كىسىلەر پايدالاناتىندىقتان, ءبىز قىزمەت ساپاسىن جاقسارتۋعا كوپ كۇش جۇمسايمىز.
– كومپانيانى اشار كەزدە قانداي قيىندىقتار كەزدەستى؟
– بىزدە ۆەرتودرومدار جوق. سونداي-اق, ازىرگە ءوزىمىزدىڭ جەكە تەحنيكامىزعا قول جەتكىزە قويمادىق. ءبىزدىڭ باسقارۋىمىزدا جەكەلەگەن كىسىلەردىڭ تىكۇشاقتارى عانا بار.
– ەل ىشىندە ۇشاتىن تىكۇشاق پەن ۇشاق سانى قانشا؟
– 20-دان اسادى.
– ەڭ كوپ جاسالاتىن رەيس؟
– قاپشاعاي مەن الماتىنىڭ اراسى.
– «اۋەتاكسيگە» قاي مەزگىلدە سۇرانىس جوعارى؟
– تىقۇشاققا جاز مەزگىلىندە, كوكتەم مەن كۇز ايلارىنىڭ باسىندا كوپ تاپسىرىس تۇسەدى. الايدا, ونىڭ تەحنيكالىق مۇمكىندىكتەرى قىستا ۇشۋعا قاۋقارسىز. سوندىقتان, كۇن سۋىق كەزدە سۇرانىس ازايادى.
– مەنى جولاۋشىلاردىڭ سىزدەردىڭ قىزمەتتەرىڭىزدى پايدالانا وتىرىپ, شۇعىل تۇردە قايدا ۇشىپ باراتىنى قىزىقتىرىپ وتىر. ماسەلەن, مەن دىتتەگەن جەرىمە جەتۋ ءۇشىن جاي ۇشاقپەن ۇشامىن, سونداي-اق, سىزدەردىڭ قىزمەتتەرىڭىزگە جۇگىنە الامىن. ەكەۋىنىڭ اراسىندا قانداي ايىرماشىلىق بار؟
– ارينە, ءسىز ۋاقىتتان ۇتاسىز. نەگىزى, ءبىزدىڭ قىزمەت جۇمىسى قاۋىرت, ۋاقىتى تىعىز ادامدارعا ارنالعان. جاي ۇشاقپەن ۇشام دەسەڭىز, ءسىز كەستە بويىنشا ۇشاسىز. ال, «اۋەتاكسيگە» تاپسىرىس بەرسەڭىز, ۇشۋ ۋاقىتىن ءوزىڭىز بەلگىلەيسىز. سونداي-اق, بىزگە ادامدار حال ۇستىندە جاتقان تۋىستارىن ءبىر قالادان ەكىنشى قالاعا تەز جەتكىزۋ قاجەت بولعاندا ءجيى حابارلاسادى. مىسالى, تاياۋدا ءبىز قىزىلوردا وبلىسىندا تۇراتىن ەمشى بالانى استاناعا جەدەل جەتكىزدىك. ونى ءولىم اۋزىندا جاتقان كىسىنىڭ دەنساۋلىعىن قاراتۋ ءۇشىن تۋىس­تارى ارنايى شاقىرتقان ەكەن.
– نەگىزىنەن, قاي قالالارعا ءجيى ۇشاسىزدار؟
– كوبىنە بۋرابايداعى قوناقۇيگە, كازينولارعا كىسى تاسيمىز. سونداي-اق, قاراعاندى, پەتروپاۆل, كوكشەتاۋ سەكىلدى جاقىن قالالارعا ۇشامىز. الماتى, استانا, اقتاۋ جانە شىمكەنت قالالارىندا دا تىكۇشاقتارىمىز بار.
– ەلوردا ماڭىندا ۇشۋ قۇنى قانشا؟
– استانا ماڭىندا «Robinson» تىكۇشاعىمەن جارتى ساعات ۇشساڭىز, 130 مىڭ تەڭگە تولەيسىز.
– ەستۋىمشە, قالا ۇستىمەن ۇشا المايدى ەكەنسىزدەر.
– استانا قالاسىنىڭ ۇستىندە ۇشۋ ءۇشىن بىزگە ارنايى رۇقسات قاعازى قاجەت. ول الدىن-الا تەكسەرۋدەن وتكەن سوڭ, ءبىر-اق بەرىلەدى. باس قالانىڭ قاۋىپسىزدىگى قاتتى قاداعالانادى. ال الماتىدا ەكى دۆيگاتەلدى تىكۇشاقتار عانا قالا ۇستىمەن ۇشا الادى. الماتىدا قالتالى, ىسكەر ادامدار كوپ, تابيعاتى دا كەرەمەت بولعاندىقتان, ول جاقتا سۇرانىس جوعارى, ماسەلەلەر دە تەز شەشىلەدى.
– ءبىر جىل ىشىندە كومپانيا ءوز شىعىنىن اقتاي الدى ما؟
– شىنىمدى ايتسام, كوپ شىعىن كەتكەن جوق. مەن بۇل قىزمەتتى ءوزىم جيعان ازعانتاي قارجىمەن باستادىم. ءىستى دوڭگەلەتىپ اكەتۋ ءۇشىن يدەيا مىقتى بولۋى كەرەك دەپ ويلايمىن.
– دەۆالۆاتسيا سىزدەردىڭ باعالارىڭىزعا قانشالىقتى اسەر ەتتى؟
– تىكۇشاقتارعا قاجەتتى مايلاردىڭ ءبارىن شەتەلدەن ەۆرومەن, دوللارمەن ساتىپ الامىز. سولاردىڭ باعاسى قىمباتتاعاندىقتان, ءبىز قىزمەت قۇنىن كىشكەنە جوعارىلاتتىق. «اۋەتاكسي» العاش ىسكە قوسىلعاندا, تەلەفونىمىزعا تىنىم بولماعان ەدى. دەۆالۆاتسيادان كەيىن تاپسىرىس ازايدى. كوپ ادامدار ۇشاقپەن ۇشا باستادى.
– بولاشاقتا بۇل قىزمەت قاراپايىم ادامدارعا دا قولجەتىمدى بولۋى مۇمكىن بە؟
– جوبانى باستاعان كەزدە «بۇل قاراپايىم ادامداردىڭ قالتاسى كوتەرەتىندەي قىزمەت بولادى» دەپ ويلاعانمىن. سول ماقساتتا استانادا 15 مينۋتتىق باعدارلاما جاسادىق. باعاسى – ادام باسىنا 100 دوللار. جاسىراتىن نەسى بار, ءبىزدىڭ تۇرعىندار ۋاقىتقا وتە سالعىرت قارايدى. جولاۋشىلار سەبەپسىز كەشىگە بەردى, سوسىن ءبىز شىعىندالىپ قالدىق. بىرنەشە مارتە ۇشقان سوڭ, باعدارلامانى توقتاتۋعا تۋرا كەلدى.
– سايتتارىڭىزدا «بالىق اۋلاۋ», «اڭشىلىق» دەگەن بولىمدەر بار ەكەن.
– ءيا, بالىق اۋلاۋشىلار كولىكپەن جەتە المايتىن جەرلەرگە «اۋەتاكسيمەن» ۇشىپ بارادى. ال, اڭشىلىق كەزىندە تىكۇشاق مۇمكىندىگى جەتكەن جەرگە دەيىن تومەندەيدى. وڭتايلى ءسات تۋعاندا, اڭشىلار ولجاسىن قۇر جىبەرمەيدى.
– «اۋەتاكسي» ارقىلى قانداي قىزىقتى شارالار ۇيىمداستىرۋعا بولادى؟
– ءبىر جولى ءبىز «ءسابي سىيلاعانىڭ ءۇشىن راحمەت!» دەپ جازىلعان باننەر ىلىنگەن ەكى دۆيگاتەلدى تىكۇشاقپەن پەرزەنتحانا توبەسىنەن ۇشتىق. تاپسىرىس بەرگەن جىگىت تە, ونىڭ جارى دا قىزمەتىمىزگە ريزا بولدى. تاعى بىردە اتىراۋلىق ءبىر جىگىت ءبىزدىڭ كومەگىمىزبەن ءوزىنىڭ سۇيىكتىسىنە ۇسىنىس جاسادى. ول كەزدە ۇشۋ قىزمەتىنە قوسا ۇيىمداستىرۋ جۇمىستارىن دا موينىمىزعا الدىق. بارلىعىن قوسقاندا, باعاسى 1,7 ميلليون تەڭگە بولدى.
– «EXPO-2017» حالىقارالىق كورمەسىنە ۇلكەن ءۇمىت ارتىپ وتىر ەكەنسىز.
– ءيا, ويتكەنى, كورمە كەزىندە قازاقستانعا شەتەلدەن كوپ تۋريست كەلەدى. بىلتىر وسى شاراعا قاتىستى وتكەن ءبىر جيىندا ءبىز شەتەلدىك قوناقتارعا ءوز قىزمەتىمىزدى تانىستىردىق. الداعى ۋاقىتتا كەلىسسوزدەر جۇرگىزەمىز دەپ وتىرمىز. ولاردىڭ كورمەگە اكەلەتىن زاتتارىن تاسىپ, ارىپتەستەرىن دەمالىس ورىندارىنا جەتكىزۋ قىزمەتتەرىن ۇيىمداستىرماقپىز. قازىردىڭ وزىندە بىزگە ۆەنگريا, گەرمانيا, انگليادان سۇرانىس ءتۇسىپ جاتىر.
– ءبىر الەۋمەتتانۋشىمەن سۇحباتتاسقانىمدا, ول «بىزگە قازىر يدەال بولاتىن جاندار ساياساتكەر نەمەسە ءانشى ەمەس, كاسىپكەرلەر بولۋى قاجەت. سەبەبى, كاسىپكەرلەر – قوعامعا پايداسى بار, ءوز ءىسىن ناقتى بىلەتىن, مەملەكەتكە سالىعىن تولەپ, پايدا اكەلەتىن, وزگەلەرگە جۇمىس بەرۋشى ازاماتتار» دەگەن ەدى.
– ءيا, الەمدىك تاجىريبەدە ۇلكەن دەڭگەيگە ءوز كۇشىمەن جەتكەن كاسىپكەرلەر – قيىندىقتىڭ ءتۇرلى كەزەڭىنەن وتكەن ادامدار. قازىر سوعان مەنىڭ دە كوزىم جەتتى. وسىعان دەيىن دە ءبىرتالاي جوبامدى تانىستىرعانمىن, بىراق, ولارعا قولداۋ بولمادى. وسى ارالىقتا نەبىر قيىندىقتاردى, دەمەۋشىلەردىڭ قۇرعاق ۋادەلەرىن دە كوردىك.
– جاڭا جوبا باستايمىن دەيتىن جاستارعا قانداي كەڭەس بەرەر ەدىڭىز؟
– جاستاردىڭ كوپشىلىگى جەكە كاسىپتەرىن ءبىر جىلدان سوڭ تاستاپ كەتەتىنىن ءجيى بايقايمىن. ويتكەنى, ولار جەتىستىككە بىردەن جەتكىسى كەلەدى. وڭاي اقشا ەش جەردە جوق. مۇمكىن, ولار باسقا كاسىپتى باستاۋى كەرەك پە ەدى؟ مىسالى, مەن العاشىندا مەديتسينالىق قۇرىلعىلار ساتۋمەن اينالىستىم. بىراق, اۆياتسيا سالاسىنا كەلگەلى جۇمىسىم جاقسى ءجۇردى. «ەڭ باستىسى – اقشا» دەپ ويلايتىندار قاتەلەسەدى. ولاي ەمەس, ەڭ ءبىرىنشى – ءتيىمدى باستاما. ەكىنشى – جەمىستى ناتيجەگە سەنىمىڭ بولۋى كەرەك. ۇلكەن جەتىستىككە جەتكەن كاسىپكەرلەرمەن جانە وزىڭە قولداۋ كورسەتەتىن كىسىلەرمەن كوپ ارالاسقان ءجون. جەكە كاسىپ باستاعاندا كەزدەسەتىن ەڭ ۇلكەن قيىندىق – ينۆەستور تابۋ. ستارتاپ جوباڭدى جۇزەگە اسىرۋ ءۇشىن, باسىڭدى تاۋعا دا, تاسقا دا ۇراسىڭ. ءارتۇرلى مەملەكەتتىك باعدارلامالارعا جۇگىنۋگە بولادى, دەگەنمەن, ماسەلە وڭاي شەشىلە قويۋى قيىن. سوندىقتان, جاس كاسىپكەرلەر تەك ءوز كۇشىنە سەنۋى ءتيىس.
– الداعى جوسپارلارىڭىزبەن بولىسسەڭىز.
– ورىس حالقىندا «پروتيۆ بولشيح دەنەگ نە پوپرەش» دەگەن ءسوز بار. قانشا مىقتى بولساڭ دا, «قوماقتى قارجىعا» توتەپ بەرە المايسىڭ. ماسەلەن, مەن ويعا العان نارسەمدى جۇزەگە اسىرۋ ءۇشىن كوپ جۇگىرەمىن. ال, قالتالى كىسىلەر ول ماسەلەنى ءبىر-اق ساتتە شەشە الادى. مەنىڭ بيزنەسىم كوپ قاراجاتتى قاجەت ەتەدى. جەكە تەحنيكا ساتىپ الۋ, قىزمەت ساپاسىن كوتەرۋ, ءبارى-ءبارى اقشاعا كەلىپ تىرەلەدى. جاقسى ينۆەستور تابىلسا, سونىمەن بىرگە قىزمەت اياسىن ۇلعايتسام دەيمىن. ويتكەنى, ءبىزدىڭ قىزمەتىمىزدىڭ كوپ سالاعا پايداسى تيەتىنىن كورىپ وتىرمىن.
– اڭگىمەڭىزگە راحمەت!

روزا ارەن