استانادا «BI – Marathon» حالىقارالىق قايىرىمدىلىق مارافونى ءوتتى. بيىل ءۇشىنشى رەت ۇيىمداستىرىلعان جارىسقا انگليا, گەرمانيا, يسپانيا, رەسەي, قىتاي, تۇركيا, ۋكراينا, وزبەكستان, فينليانديا, فيليپپين, جاڭا زەلانديا جانە باسقا دا ەلدەردەن 7 مىڭعا جۋىق اۋەسقوي جانە كاسىپقوي سپورتشىلار قاتىستى.
قايىرىمدىلىق قاعيداتىن ۇستانعان مارافون جارىسى 5 قاشىقتىق بويىنشا ءوتتى. اۋا رايىنىڭ سالقىن بولعانىنا قاراماستان جۇگىرۋگە تىركەلگەن ادامدار تۇگەلدەي جارىس جولىنا شىققانىن ايرىقشا اتاپ وتكىمىز كەلەدى. ءبىر ايتارلىعى, وسى جارىسقا 76 جاستاعى قايىرباي ءسالىموۆ قاتىسىپ, جاستارعا ونەگە كورسەتە ءبىلدى. ال ەڭ كىشكەنتاي مارافونشى ءاليا جىلانباەۆا بولدى. ءبۇلدىرشىن ەندى عانا بەس جاسقا تولايىن دەپ ءجۇر ەكەن.
– بۇل مارافوننىڭ باسقا جارىستارعا قاراعاندا باستى ەرەكشەلىگى سول – ماقساتى قايىرىمدىلىق بولىپ وتىر. وسى جارىسقا قاتىسۋ ءۇشىن تولەنەتىن جارنا ءتۇسىمى تۇگەلدەي «ءۆى-جۇلدىزاي» قورىنا اۋدارىلادى. ال ول ءوز كەزەگىندە دتسپ اۋرۋىنا شالدىققان بالالاردىڭ ەمدەلۋىنە جۇمسالاتىن بولادى. سوندىقتان وسىنداي جارىستى ۇيىمداستىرۋشىلارعا دا, قاتىسۋشىلارعا دا العىس ايتۋمىز كەرەك, – دەيدى حالىقارالىق دارەجەدەگى سپورت شەبەرى, ۋلترامارافونشى مارات جىلانباەۆ.
ال ەندى جارىستىڭ وزىنە كەلەر بولساق, ەرلەر اراسىنداعى كلاسسيكالىق مارافوندا ايدىن مايۋسوۆ جەڭىمپاز اتاندى. ايەلدەر جارىسىندا 42 شاقىرىمدى ءبىرىنشى بولىپ قىمبات ەلتاەۆا باعىندىردى. باسقا قاشىقتىقتار بويىنشا جۇگىرگەن اۋەسقوي مارافونشىلاردىڭ بارىنە ەستەلىك مەدالدار تابىس ەتىلدى.
قايىرىمدىلىق مارافوندى ۇيىمداستىرۋشىلاردىڭ الدىن الا جاسالعان مالىمەتى بويىنشا, بيىلعى شارادان 23 ميلليون تەڭگەگە جۋىق قاراجات جينالعان.
