قايىرىمدىلىق ءتۋرنيرى

ەلوردامىزدا باق وكىلدەرى اراسىندا ۆولەيبولدان «گالينا, ءبىز سەنىمەن بىرگەمىز!» قايىرىمدىلىق ءتۋرنيرى ءوتتى.قازاقستان سپورت جۋرناليستيكاسىندا وزىندىك قولتاڭباسى بار گالينا پولەۆايا ءبىر جىلدان بەرى تۇركيادا كەزەكتى وتادان كەيىن ەم-دوم قابىلداۋدا. «ەندى كۇردەلى ءبىر وپەراتسياسى قالدى. ەگەر ءبارى ءساتتى وتسە, ەكى اياعىنان تىك تۇرىپ ورتامىزعا قايتا ورالادى» دەيدى ارىپتەسى ءازيز ءجۇمادىل. راسىمەن دە, وتاندىق سپورتتىڭ دامۋىنا جانە سپورت جۋرناليستيكاسىنىڭ وركەندەۋىنە وراسان ەڭبەگىن سىڭىرگەن ءتىلشى ۇزاق جىلدار ەلىمىزدىڭ «قازاقستان» جانە «حابار» تەلەارنالارىندا جۋرناليستىك قىزمەت اتقارعان.
وسى ورايدا «باق ليگا» قوعامدىق قورىنىڭ قولعا الۋىمەن ۆولەيبولدان «جاس ۇلان» رەسپۋبليكالىق مەكتەبىندە تاڭنان باستالعان جارىسقا جۋرناليستەردەن قۇرالعان 12 كوماندا قاتىسىپ, ويىن قاس قارايعاندا ءبىر-اق اياقتالدى. ءارتۇرلى رەسپۋبليكالىق باق وكىلدەرىنەن قۇرالعان تۋرنيردە «نوۆايا پلوششاد» جۋرناليستەر قۇراماسى جەڭىمپاز اتاندى. ال ­«حابار» اگەنتتىگى, «Elorda aqparat», «قازمەديا» ورتالىعى, «ەگەمەن قازاقستان», «ايقىن-ليتەر» كوماندالارى دا تارتىستى ويىن ورنەگىن كورسەتتى.
جارىستان بارلىعى 440 مىڭ تەڭگە جينالىپتى. بۇل قارجى گالينا پولەۆايانىڭ ەمىنە جۇمسالۋ ءۇشىن ەسەپشوتىنا اۋدارىلدى.

جادىرا مۇراتبەكوۆا