استانا قالاسى ورتالىقتاندىرىلعان كىتاپحانالار جۇيەسىنە 18 كىتاپحانا قارايدى. اتاپ ايتقاندا, 11 كوپشىلىك كىتاپحانا, 6 بالالار كىتاپحاناسى جانە 1 كوزى كورمەيتىن جانە ناشار كورەتىن ازاماتتارعا ارنالعان ارنايى كىتاپحانا. وسى قاڭتار ايىندا قالانىڭ بارلىق كىتاپحانالارىندا بيىلعى اتاۋلى وقيعالار مەن مەرەيتويلارعا ارنالعان ءىس-شارالار وتەدى.
بيىلعى كۇزدە استانادا V دۇنيەجۇزىلىك كوشپەندىلەر ويىندارى وتەدى. سول ۋاقىتتا ەلىمىزگە الەمنىڭ 100-دەن استام ەلىنەن تۋريستەر كەلەدى دەپ كۇتىلۋدە. ويىندار كەزىندە سپورتتىق, مادەني جانە عىلىمي باعدارلامالار ۇشتاسادى. جالپى ويىندارعا 20 جارىستىق جانە 10 كورنەكى سپورت ءتۇرى كىرىپ, 110 مەدال جيىنتىعى ويناتىلادى. جارىستار ات سپورتى, ۇلتتىق كۇرەس, ساداق اتۋ, قۇستارمەن اڭ اۋلاۋدىڭ تۇرلەرى, ءداستۇرلى زياتكەرلىك ويىندار بويىنشا وتەدى. وسى ايدا قالا كىتاپحانالارىندا اتالمىش وقيعاعا ارنالعان ءىس-شارالار ۇيىمداستىرىلادى.
بيىل – اقىندىعىمەن, باتىرلىعىمەن اتى شىققان ماحامبەت وتەمىسۇلىنىڭ تۋعانىنا 220 جىل. سونداي-اق وسى جىلى كلاسسيك جازۋشى, الاش ارداقتىسى جۇسىپبەك ايماۋىتۇلىنىڭ 135 جىلدىعى, جىراۋ سۇگىر بەگەندىكۇلىنىڭ تۋعانىنا 130 جىل, قازاق بەينەلەۋ ونەرىنىڭ نەگىزىن سالۋشىلاردىڭ ءبىرى, ايگىلى قىلقالام شەبەرى, قازاقستاننىڭ حالىق سۋرەتشىسى ءابىلحان قاستەەۆتىڭ 120 جىلدىعى, ءان ءدۇلدىلى, قاز كسر حالىق ءارتىسى عاريفوللا قۇرمانعاليەۆتىڭ 115 جىلدىعى, قۇيرىقتى جۇلدىزداي قازاق ادەبيەتى كوگىنەن جارق ەتىپ سونگەن ساتتار ەرۋباەۆتىڭ 110 جىلدىعى, پوەزيا پاديشاسى فاريزا وڭعارسىنوۆانىڭ تۋعانىنا 85 جىل.
بيىل تۋعانىنا 130 جىل تولىپ وتىرعان الاش قايراتكەرى اسىلبەك سەيىتوۆتىڭ ەسىمى مەن ەڭبەگى كوپشىلىككە بەيمالىم. توم مەملەكەتتىك ۋنيۆەرسيتەتىنىڭ مەديتسينا فاكۋلتەتىندە وقىعان ول 1916 جىلى اقمولا ۋەزىندە اۋىلشارۋاشىلىعى بويىنشا ساناق جۇمىستارى جۇرگىزىلگەندە وڭتۇستىك بولىگى كوميسسياسىن باسقاردى. 1917 جىلى ءساۋىردىڭ سوڭى, مامىردىڭ باسىندا وتكەن اقمولا وبلىستىق قازاق سەزىندە الدىمەن حاتشىلىققا, سوڭىندا توراعانىڭ ورىنباسارلىعىنا سايلانعان. سول جىلى ورىنبوردا وتكەن ءبىرىنشى جالپىقازاق سەزىنە كاتىسىپ, وندا تورالقا قۇرامىندا مىرجاقىپ دۋلاتوۆپەن بىرگە حاتشىلىققا ۇسىنىلدى. وسى جيىندا اقمولا وبلىسى اتىنان قۇرىلتاي جينالىسىنا دەپۋتاتتىققا سايلانعان.
اسىلبەك سەيىتوۆ الاشوردانىڭ اقمولا وبلىستىق كوميتەتى باسشىلارىنىڭ ءبىرى بولا وتىرىپ, ۇلت-ازاتتىق قوزعالىسىنا ۇلكەن ۇلەس قوستى. باياناۋىلدا باس دارىگەر, سەمەي قالاسىنداعى گۋبەرنيالىق دەنساۋلىق ساقتاۋ باسقارماسىنىڭ باستىعى بولىپ 15 جىل بويى قىزمەت ىستەدى. سەمەي وبلىسىندا قۇرت اۋرۋىنا قارسى ەمدەيتىن «اۋىل» جانە «بەرەزوۆكا» شيپاجايلارىن اشۋعا اتسالىستى. 1937 جىلى قاز كسر دەنساۋلىق ساقتاۋ حالىق كوميسسارياتىنىڭ جوسپارلاۋ-قارجىلاۋ ءبولىمىنىڭ مەڭگەرۋشىسى, الماتى قالاسىنداعى №5 ەمحانانى العاش ۇيىمداستىرۋشىلاردىڭ ءبىرى جانە ونىڭ باس دارىگەرى بولدى. «تاڭ» جۋرنالىنا پۋبليتسيستيكالىق ماقالالاردى جازدى. 1937 جىلى 1 جەلتوقساندا ۇستالىپ, 8 جەلتوقساندا اتۋ جازاسىنا كەسىلدى.
