جاز مەزگىلى اياقتالۋعا جاقىن. سوندىقتان قالادا جىلىتۋ ماۋسىمىنا دايىندىق باستالىپ كەتتى. جىلۋمەن قامتاماسىز ەتەتىن قالالىق شتاب استانا قالاسىنداعى قۋات كەشەنىن, تۇرعىن ءۇي-كوممۋنالدىق شارۋاشىلىق, ءبىلىم بەرۋ, مادەنيەت جانە دەنساۋلىق نىساندارىنىڭ جىلىتۋ ماۋسىمىنا دايىندىعىن پىسىقتاۋدا. شتابتىڭ جوسپارى بەكىتىلىپ, سوعان سايكەس اپتا سايىن شتاب وتىرىستارى وتكىزىلىپ كەلەدى.
قۋات كوزدەرى
استانا قالاسىن جىلۋمەن جەس-1, جەس-2 جانە «استانا-ەنەرگيا» اق اۋداندىق قازاندىقتارى قامتاماسىز ەتەدى. وتىن قورىنا توقتالاتىن بولساق, قالالىق ەنەرگەتيكا باسقارماسىنىڭ باسشىسى باقتىبەك جاپاەۆتىڭ ايتۋىنشا, كومىر – 132 876 توننا, مازۋت – 8 185 توننانى قۇرايدى. جالپى, جىلىتۋ مەزگىلىنىڭ باس كەزىنە تامان بەكەتتەردە جيىرما تاۋلىككە جەتەرلىك نورماتيۆتىك وتىن قورى بار.
ونىڭ ىشىندە جەس-1 ۇلەسى – 36 140, جەس-2 – 185 420 توننا ەكەن.
باسقارما باسشىسىنىڭ مالىمەتىنە سۇيەنسەك, 2016 جىلدىڭ كومىر تاسۋ كەستەسى جاسالىپ, ءار ايعا بولىنگەن. ال 2017 جىلعا كومىر جەتكىزۋ تۋرالى كەلىسىم وسى جىلدىڭ اياعىندا جاسالادى. ايتا كەتكەن ءجون, قالامىزعا مازۋت جەتكىزۋ بويىنشا «الما مۇناي ترەيد» كومپانياسىمەن كەلىسىم جاسالعان. جىلىتۋ مەزگىلىندە مازۋتقا دەگەن مۇقتاجدىق (قازاننان ءساۋىر ايىنا دەيىن)
9 708 توننانى قۇرايدى.
بۇگىندە «استانا-ەنەرگيا» اق نەگىزگى جانە قوسالقى قۇرال-سايماندارى بەكىتىلگەن كەستەگە سايكەس جوندەۋ جۇمىستارىنان وتكەن.
جىلۋ جانە ەلەكتر جەلىلەرى
ەلوردالىقتاردى ورتالىق جىلۋمەن قامتاماسىز ەتۋدە جەس-1, جەس-2 جانە اۋداندىق قازاندىقتاردىڭ مۇمكىندىگى جوعارى. «استانا-تەپلوترانزيت» اق قىزمەت ەتەتىن جىلىتۋ جەلىلەرىنىڭ جالپى ۇزىندىعى 583 شاقىرىمدى قۇرايدى. ال جىلۋمەن قامتاماسىز ەتۋ جۇيەسىندەگى سورعىش بەكەتتەردىڭ سانى – 10. كاسىپورىن ءساۋىر-قىركۇيەك ايلارىندا كۇردەلى جوندەۋ جۇمىستارىن جۇرگىزگەن. اتاپ ايتقاندا, 1,15 شاقىرىم توراپتىق جەلىلەر, 1,432 شاقىرىم ءبولۋ جەلىلەرى جوندەلگەن. سونىمەن قاتار, قۇبىر سىرتىن جىلۋمەن وقشاۋلاۋدى قالپىنا كەلتىرۋ جۇمىستارى دا اياقتالىپ قالعان.
باس قالاداعى «استانا-رەك» مەكەمەسى جالپى ۇزىندىعى 3631 شاقىرىمدى قۇرايتىن ەلەكتر جەلىلەرىنە قىزمەت كورسەتەدى. شاعىن بەكەتتەر سانى – 1 134.
«استانا-رەك» كاسىپورىنى دا كۇردەلى جوندەۋ باعدارلاماسى بويىنشا قۇرال-سايماندارىن سايلاپ قويعان.
P.S. «استانا-ەنەرگيا» مەكەمەسىنىڭ جىلىتۋ مەزگىلىنە جالپى دايىندىعى – 88,0%, «استانا-تەپلوترانزيت» – 62,7%, «استانا-رەك» اق 65,9% قۇرايدى.
گۇلميرا ايماعانبەت
