بۇدان بىلاي استانادا دا قاتتى تۇرمىستىق قالدىقتار كونتەينەرگە بىردەن سۇرىپتالىپ تاستالادى. دۇنيە جۇزىلىك قورشاعان ورتانى قورعاۋ كۇنى قارساڭىندا استانا قالاسى اكىمدىگى مەن «وكم وپەراتورى» جشس-ءتىڭ ۇيىمداستىرۋىمەن قاناتقاقتى جوبانى ىسكە قوسۋعا ارنالعان «قايتا وڭدەۋگە» اتتى ەكولوگيالىق اسار ءوتتى.
«قازاقستان» سپورت سارايىنىڭ الاڭىندا وتكەن شارا بارىسىندا قاتتى تۇرمىستىق قالدىقتار قابىلدانىپ, قايتا وڭدەۋدەن شىققان ونىمدەر جۇرتشىلىق نازارىنا ۇسىنىلىپ, بالالارعا ارنالعان تانىمدىق باعدارلاما ۇيىمداستىرىلدى. سونىمەن, ەلوردادا تۇرمىستىق قالدىقتاردى ەكىگە (قۇرعاق جانە ىلعالدى) ءبولىپ تاستاۋدىڭ پيلوتتىق جوباسىن ەنگىزۋ قولعا الىنا باستادى. ەندى شىلدە ايىنان باستاپ قالاداعى 2070 قوقىس الاڭىنا (استانا الاڭدارى 100 پايىزعا قامتىلادى) 6 275 كونتەينەر قويىلادى. سارى جانە جاسىل ءتۇستى كونتەينەرلەرگە تۇرمىستىق قالدىقتار سۇرىپتالىپ تاستالادى. مىسالى, سارى ءتۇستى كونتەينەرگە مەتالل, پلاستيك, قاعاز, شىنى سياقتى قايتا وڭدەۋگە جارامدى قالدىقتار تاستالسا, جاسىل كونتەينەرگە تاعامنان قالعان ورگانيكالىق جانە باسقا دا وڭدەۋگە كەلمەيتىن قالدىقتار سالىنادى.
«جىل سايىن قازاقستاندا 5,5 ميلليون توننادان اسا قاتتى تۇرمىستىق قالدىق جينالسا, استانانىڭ وزىنەن ءبىر جىلدا شىعارىلاتىن قالدىق كولەمى 300 مىڭ تونناعا جەتىپ جىعىلادى. ياعني, كۇنىنە قالادان 1 مىڭ تونناعا جۋىق قالدىق شىعادى دەگەن ءسوز. وسى رەتتە قالدىقتى بولەك تاستاۋ قوقىس پوليگونىنا تۇسەتىن كولەمدى ازايتادى. سونىمەن قاتار تابيعي رەسۋرس ۇنەمدەلىپ, ەلىمىزدە قايتا وڭدەۋ سالاسىنىڭ دامۋىنا جول اشادى» دەيدى «وكم وپەراتورى» جشس ءباسپاسوز حاتشىسى جومارت راقىمجان.
اۋا رايىنىڭ قولايسىزدىعىنا قاراماستان ەكولوگيالىق شاراعا بەلسەندى قاتىسقان جۇزدەگەن قالا تۇرعىنى 300 كەلى ەلەكتر جانە ەلەكتروندى قۇرالدار مەن 405 كگ ماكۋلاتۋرا, 120 كەلى پلاستيكالىق بوتەلكە, 100 كەلى شىنى, 14 كەلى باتارەيا, 85 كەلى سىناپتى شام, 20 كەلى كيىم-كەشەك قالدىعىن تاپسىردى. شارا سوڭىندا 1 توننادان اسا قالدىق قالاداعى قايتا وڭدەۋ زاۋىتىنا جىبەرىلدى.
اتالمىش شارا اياسىندا ىستەن شىققان تۇرمىستىق ەلەكتر تەحنيكالارىن تەگىن الىپ كەتەتىن جاڭا ەكولوگيالىق «Cleاn taxi» جوباسى تانىستىرىلدى.
