كەشە الماتىدان استاناعا قانات يسلام مەن باپكەرى نەلسون لوپەس كەلدى. ولار 9 قىركۇيەكتە وتەتىن جەكپە-جەككە دايىندالۋ ءۇشىن ەلوردادا ءبىر اي بويى دايىندالاتىن بولادى.
بوكس كەشىنىڭ ەڭ باستى كەزدەسۋى قانات يسلام مەن برەندون كۋك اراسىندا وتەدى. بوكسشىلار 1-ءشى ورتا سالماق دارەجەسىندە WBA Inter-Continental جانە WBO-NABO نۇسقاسى بويىنشا تيتۋلىنا جۇدىرىقتاسادى.
قانات يسلامنىڭ ايتۋىنشا, الداعى ۋاقىتتا وتەتىن جەكپە-جەكتە ەل نامىسىن قورعايتىن بوكسشىلار تىڭعىلىقتى دايىندالىپ جاتىر. ماسەلەن, ول وسىعان دەيىن ءبىر اي بويى جىگىتتەر الماتى قالاسىندا دايىندالعانىن تىلگە تيەك ەتتى.
– الماتىدا ءبىز «استانا ارلاندارىنىڭ» جىگىتتەرىمەن بىرگە جاتتىعىپ, ءبىراز تاجىريبە جينادىق. قازىرگى تاڭدا تاۋداعى جاتتىعۋلاردى اياقتاپ, استاناعا ات باسىن تىرەپ وتىرمىز. ەندى ءبىر اي بويى وسىندا دايىندالىپ, بايراقتى باسەكەدە بارىمىزدى سالساق دەپ وتىرمىز. ويتكەنى بىزگە مۇندا ەلوردانىڭ اۋا رايىنا بەيىمدەلىپ, بوي ۇيرەتۋ كەرەك بولىپ وتىر.
سونداي-اق وسىندا تەك قانا سپارينگتەر وتكىزىپ, 9 قىركۇيەككە دەيىن دايىندىق جۇمىستارىن جالعاستىرامىز. ويتكەنى بۇل جولعى شارشى الاڭدا كەزدەسەتىن قارسىلاسىم وڭاي شاعىلا قوياتىن جاڭعاق ەمەس. ماسەلەن, برەندون كۋك بۇعان دەيىن بىردە-ءبىر رەت جەڭىلمەگەن ءتىس قاققان سپورتشى. جالپى, ءوز باسىم كەز كەلگەن كەزدەسۋگە ساقاداي ساي بولىپ دايىندالىپ شىعامىن, – دەدى بوكسشى.
ايتا كەتەيىك, 9 قىركۇيەك كۇنى استاناداعى «سارىارقا» ۆەلوترەگى عيماراتىندا كەڭ اۋقىمدا بوكس كەشى وتەدى. جەكپە-جەككە جانقوش تۇراروۆ (21-0, 15كو), جانىبەك ءالىمحانۇلى (1-0, 1كو), مەيىرىم نۇرسۇلتانوۆ (3-0, 2كو), رۋسلان مىرساتاەۆ (3-0, 3كو), ءالي احمەدوۆ (7-0,5كو), ايدوس ەربوسىنۇلى (6-0, 6كو), ديماش نيازوۆ (11-0-3, 5كو) جانە نۇرسۇلتان جاڭاباەۆ (2-0, 1كو) سىندى بوكسشىلار دا شىعادى.
سەرىك جولداسباي
