الداعى سەنبى, 9 قىركۇيەك كۇنى استانا قالاسىنداعى «سارىارقا» ۆەلوترەگىندە كوپتەن كۇتكەن «كاسىپقوي بوكس كەشى» وتەدى. ەكسپو-2017 حالىقارالىق كورمەسى اياسىندا ۇيىمداستىرىلاتىن ايرىقشا سپورت شاراسىنىڭ باستى وقيعاسى وتانداسىمىز قانات يسلام مەن كانادالىق برەندون كۋك اراسىنداعى جەكپە-جەك بولماق.
قر مادەنيەت جانە سپورت مينيسترلىگى, استانا قالاسىنىڭ اكىمدىگى, «استانا ەكسپو-2017» ۇلتتىق كومپانياسى, «سامرۇق-قازىنا» ۇلتتىق ءال-اۋقات قورى, «ZHERSU» كورپوراتسياسى, «ءۆى Group», «بازيس ا», «Mabetex Group» كومپانيالارىنىڭ قولداۋىمەن وتكىزىلەتىن بوكس كەشىنىڭ باستى جەكپە-جەگىندە قانات يسلامنىڭ ءبىرىنشى ورتا سالماقتاعى WBA Inter-Continental جانە WBO-NABO نۇسقالارى بويىنشا جەڭىپ العان اتاقتارى ساراپقا سالىناتىن بولادى. ياعني, قازاق بوكسشىسى چەمپيوندىق اتاقتارىن باسكە تىگىپ وتىر.
ال كانادالىق كۋك بولسا, چەمپيوندىق اتاقتاردى جەڭىپ الۋعا كەلگەنىن اشىق ايتادى. كاسىپقوي بوكستا ءالى ەشكىمنەن جەڭىلىپ كورمەگەن برەندوننىڭ پروۋموۋتەرى دە ءوز شاكىرتىنىڭ تەك جەڭىس ءۇشىن ايقاساتىنىن جەتكىزدى.
بۇل بوكس كەشىنىڭ كوركىن اشاتىن تاعى بىرنەشە جەكپە-جەك كورەتىن بولامىز. اتاپ ايتقاندا, بۇگىندە كاسىپقوي بوكستا ەداۋىر شىڭدالىپ قالعان قازاق جىگىتتەرىنىڭ شايقاستارىن تاماشالاۋدىڭ ءساتى ءتۇسپەك. بۇل رەتتە قازاق جانكۇيەرلەرى سەنىممەن قارايتىن جانقوش تۇراروۆ, جانىبەك ءالىمحانۇلى, مەيىرىم نۇرسۇلتانوۆ, رۋسلان مىرساتاەۆ, ءالي احمەدوۆ, ايدوس ەربوسىنۇلى, ديماش نيازوۆ جانە نۇرسۇلتان جاڭاباەۆ شارشى الاڭعا شىعادى. قازاق بوكسشىلارىنا قارسى تۇراتىن شەتەلدىك بىلعارى قولعاپ شەبەرلەرى دە وسال بولاتىن ەمەس. مالىمەتتەرىنە قاراعاندا ءبارى دە كاسىپقوي بوكستا ىسىلعان سپورتشىلار ەكەن.
ەرتەڭ, 8 قىركۇيەكتە ساعات 13.00-دە «حان شاتىر» ساۋدا ورتالىعىندا بوكسشىلاردىڭ سالماق ولشەۋ ءراسىمى وتەدى. ال بوكس كەشىنە كىرۋ بيلەتتەرىن Zakazbiletov.kz BiletiAstana.kz cايتى نەمەسە استانا قالاسىنداعى مىنا كاسسالاردان ساتىپ الۋعا بولادى: «كەرۋەن» سسو, دوستىق كوشەسى, 9; «مەچتا» ساۋدا ورتالىعى, رەسپۋبليكا داڭعىلى, 45; «BiletiAstana.kz» كەڭسەسى, جەڭىس داڭعىلى, 34; «استانا ارەنا» ستاديونى, تۇران داڭعىلى, 54.
سونىمەن, 9 قىركۇيەكتە «سارىارقا» ۆەلوترەگىندە كەرىلگەن شارشى الاڭدا الاپات ايقاستار بولايىن دەپ تۇر. قانات يسلام باستاعان قازاق جىگىتتەرىنە قولداۋ كورسەتەيىك, قادىرلى جانكۇيەر قاۋىم. جەكپە-جەكتەر 18.00-دە باستالادى.
عالىم قوجابەكوۆ
