استانا جاڭا جىلدى قالىڭ قارمەن قارسى الدى. قاڭتار باستالعالى بەرى ەلوردادا جاۋعان قار تولاستامادى. وسىعان وراي, كوممۋنالدىق شارۋاشىلىق سالاسىنىڭ ماماندارى تاۋلىك بويى كۇشەيتىلگەن رەجيمدە جۇمىس ىستەپ جاتىر. كەشەدەن بەرى باس قالادا بارلىعى 36 مىڭ تەكشە مەتردەن استام قار شىعارىلدى. قار تازالاۋ جۇمىستارىنا 2,3 مىڭنان استام جول جۇمىسشىسى مەن مىڭنان استام ارنايى تەحنيكا جۇمىلدىرىلدى.
قاردىڭ قالىڭ تۇسكەنىن ەگىنشىلەر مولشىلىققا بالايدى. دەگەنمەن, ءدال قازىر باس قالادا اباي ايتقانداي, «كارى قۇداڭ – قىس كەلىپ, الەك سالىپ» تۇر. ءتۇنى بويى تولاسسىز جاۋعان اق ۇلپا قالا تۇرعىندارىن ەداۋىر ابىگەرگە سالعانى راس. ادامداردىڭ ءجۇرىپ-تۇرۋى مەن قالاداعى كولىك قوزعالىسىنا دا كەدەرگى كەلتىرمەس ءۇشىن كوممۋنالدىق شارۋاشىلىق قىزمەتكەرلەرى سوڭعى كۇندەرى دامىل تاپپاي, تاۋلىك بويى كۇشەيتىلگەن رەجيمدە جۇمىس ىستەۋدە. وزدەرىنە جۇكتەلگەن ءىستى دەر كەزىندە اتقارۋ ءۇشىن ولار كۇندىز-ءتۇنى ۋاقىتپەن ساناسپاي ەڭبەك ەتىپ ءجۇر. ويتكەنى جاۋعان قار جاتا بەرسە, تاپتالىپ, كەيىن ونى جيناۋ دا وڭايعا سوقپاسى انىق.
بۇگىنگى تاڭدا ەلوردا بويىنشا قار تازالاۋ جۇمىستارىنا 2,3 مىڭنان استام جول جۇمىسشىسى مەن مىڭنان استام ارنايى تەحنيكا جۇمىلدىرىلدى. قاڭتاردىڭ 3-ىنەن 4-ىنە قاراعان ءتۇنى قالادان پوليگوندارعا 36 مىڭ تەكشە مەتردەن استام قار نەمەسە 2 700 جۇك كولىگىنە تەڭ قار شىعارىلدى.
ەڭ الدىمەن, ەرەجەلەرگە سايكەس, جولداردا كەپتەلىس بولماس ءۇشىن وتە قارقىندى قوزعالىس ايماقتارى, سودان كەيىن بارىپ ورتاشا قارقىندىلىعى بار ۋچاسكە-الاڭدار, ۆوكزال ماڭى اۋماقتارى, تروتۋارلار, الەۋمەتتىك نىساندارعا كىرمە جولدار جانە ت.ب. جەرلەر قاردان تازارتىلادى.
قىس مەزگىلى باستالعالى بەرى ەلوردادا كوممۋنالدىق قىزمەتتەر قالادان 100 مىڭنان استام جۇك كولىگىنە تەڭ ميلليون تەكشە مەتردەن استام قاردى الىپ شىقتى. قالانىڭ كوممۋنالدىق قىزمەتتەرى كەشكى جانە تۇنگى ۋاقىتتاردا كۇشەيتىلگەن رەجيمدە, سونداي-اق قار تازالاۋ مارشرۋتتارىن تۇزەتىپ جۇمىس ىستەۋدە.
استاناعا قاراستى اۋداندار قار شىعارۋ جۇمىستارىن قىزۋ قولعا الدى. ماسەلەن, الماتى اۋدانىندا قار تازالاۋ جۇمىستارى بەلسەندى جۇرگىزىلۋدە, وعان 636 جول جۇمىسشىلارى مەن 403 ارنايى تەحنيكا جۇمىلدىرىلدى. ولار سوڭعى ەكى كۇندە 8396 تەكشە مەتر جەردىڭ قارىن شىعاردى.
جالپى, قاراشا ايىنىڭ باسىنان بەرى بۇل اۋداننان 374 330 تەكشە مەتر قار شىعارىلدى.
سارىارقا اۋدانىندا دا قار تازالاۋ جۇمىستارى بەلسەندى جۇرگىزىلۋدە, وعان 514 جول جۇمىسشىلارى مەن بارلىعى 328 ارنايى تەحنيكا جۇمىلدىرىلدى. قاڭتاردىڭ 3-ىنەن 4-ىنە قاراعان ءتۇنى قار پوليگونىنا بارلىعى 501 رەيس جاسالىپ, 84 بىرلىك ارنايى تەحنيكانىڭ كۇشىمەن 6714 تەكشە مەتر قار جىبەرىلدى. قىس باستالعالى بەرى اۋدان اۋماعىنان بارلىعى 256 758 تەكشە مەتر قار شىعارىلعان.
قالادا قاردىڭ كوپ جاۋىنا بايلانىستى بايقوڭىر اۋدانىنىڭ كوممۋنالدىق قىزمەتتەرى دە كۇشەيتىلگەن رەجيمدە جۇمىس ىستەپ, قار تازالاۋ جۇمىستارى ەكى اۋىسىمدا تاۋلىك بويى جالعاسۋدا. اتالعان جۇمىس بارىسىنا بارلىعى 198 ارنايى تەحنيكا مەن 361 جول جۇمىسشىلارى جۇمىلدىرىلدى. بايقوڭىر اۋدانى بويىنشا سوڭعى كۇندەرى بارلىعى 6684 تەكشە مەتر قار شىعارىلىپ, پوليگونعا 529 رەيس جاسالدى. ال قاراشانىڭ 1-ىنەن باستاپ اۋدان اۋماعىنان 220 289 تەكشە مەتر جەردىڭ قارى شىعارىلعان.
ەسىل اۋدانىنىڭ كوشەلەرىن قاردان تازارتۋعا 802 جول جۇمىسشىسى مەن 360 بىرلىك ارنايى تەحنيكا, اتاپ ايتساق, 61 سىپىرعىش ماشينا, 25 بىرلىك متز تراكتور ششەتكاسى, 167 ساموسۆال, 25 فرونتالدى تيەگىش, 18 قۇم شاشۋعا ارنالعان تەحنيكا شىقتى. اتالمىش اۋدان بويىنشا قاڭتاردىڭ 3-ىنەن 4-ىنە قاراعان تۇندە 15 010 تەكشە مەتر قار شىعارىلىپ, پوليگوندارعا 948 رەيس جاسالدى. قاراشا ايىنان بەرى ەسىل اۋدانىنىڭ كوشەلەرىنەن 388 690 تەكشە مەتر قار شىعارىلدى.
قالا جولدارىنىڭ جاياۋ جۇرگىنشىلەرگە ارنالعان بولىگى تايعاققا قارسى ماتەريالدارمەن وڭدەلۋدە, ول قار جاۋا باستاعاننان سەبىلەدى. بۇل رەتتە ءبىرىنشى كەزەكتە كولىك قوزعالىسى ءۇشىن ەڭ قاۋىپتى ماگيسترالدار مەن كوشەلەردىڭ ۋچاسكەلەرى وڭدەلۋدە.
قار قالىڭ جاۋسا, سول جىلى ەگىن مول بولادى دەپ قۋانۋشى ەدى بۇرىنعىلار. حالقىمىز ىرىسقا بالايتىن, جەر-انانىڭ تامىرىن تولتىرىپ, ىلعالعا اينالاتىن وسى اق ۇلپا بالالاردى قىزىققا كەنەلتىپ, ادەمى كورىنگەنىمەن, قالالىقتار ءۇشىن قالىڭ قاردان كەلەر ماشاقات تا از ەمەس. تولاسسىز جاۋعان جاپالاقتار كوشەلەردى باسىپ, جاياۋ جۇرگىنشىلەرگە دە, كولىك جۇرگىزۋشىلەرىنە دە قولايسىزدىق تۋدىرماۋى كەرەك. بۇل رەتتە تازالىققا جاۋاپتى ماماندار كۇن-ءتۇن دەمەي دامىلسىز قار شىعارۋمەن اينالىسىپ, كوكتايعاقتىڭ الدىن الۋ ماقساتىندا قۇمشاشقىشتاردىڭ كۇشىمەن جولدارعا قۇم مەن تۇز ارالاس ماتەريالدار سەۋىپ الەك.
ۇزىن-سونار كەپتەلىستەر قالىپتاسىپ, كوكتايعاقتىڭ كەسىرىنەن اۆتوبۋستار جۇمىس كەستەسىنەن كەشىكپەۋى ءۇشىن قالالىق قىزمەتتەر تىنىم تاپپايدى. ءبىرىنشى كەزەكتە ولار ورتالىق كوشەلەر, جاياۋ جۇرگىنشىلەر جولى مەن ايالدامالاردىڭ ماڭىن تازالاۋدا.
قار تازالاۋ جۇمىستارى اۋدانىنىڭ بارلىق اۋماعىندا جالعاسۋدا جانە سانيتارلىق تازالاۋ بارلىق ۋچاسكەلەر بويىنشا جوسپارلى تۇردە جۇرگىزىلىپ جاتىر.
