اباي اتامىزدىڭ 175 جىلدىق مەرەيتويى اياسىندا اقىننىڭ قارا سوزدەرى وزبەك تىلىنە اۋدارىلىپ, تاشكەنتتە سونىڭ تانىستىرىلىمى ءوتتى. بۇل تۋىندى قازاقستاننىڭ وزبەكستانداعى ەلشىلىگى مەن حالىقارالىق تۇركى اكادەمياسىنىڭ قولداۋىمەن جارىق كوردى.
حاكىمنىڭ تاعىلىمعا تولى «قارا سوزدەرىن» وزبەكشەگە اۋدارعان, پەداگوگيكا عىلىمدارىنىڭ دوكتورى قوزوقباي يۋلدوشەۆ. اۋدارماشى اقىننىڭ عيبراتتى ناقىل سوزدەرىن تارجىمالاۋعا جارتى جىلىن جۇمساپتى. «وسىدان سەكسەن جىل بۇرىن وزبەك اقىنى ناسىل فازىلوۆ ابايدىڭ «قارا سوزدەرىن» وزبەك تىلىنە اۋدارعان ەدى. وندا اراب جانە پارسى سوزدەرى كوپ كەزدەسكەن. ال قوزوقباي يۋلدوشەۆ ويشىل اتامىزدىڭ ەڭبەگىن جاڭاشا, قازاق پەن وزبەك ءتىلىن جاقىنداستىرىپ اۋدارعان» دەيدى قازاقستاننىڭ وزبەكستانداعى ەلشىلىگىنىڭ كەڭەسشىسى رۋسلان دۇيسەنوۆ.
