قالاداعى №5 ەمحانادا قارتتار كۇنى قارساڭىندا «دەنساۋلىقتى بىرگە كۇتەيىك!» اتتى ەكى كۇندىك اكتسيا ءوتتى. اكتسيا اياسىندا ونكولوگيا دەرتىن, قانت ديابەتىن جانە جۇرەك-قان تامىرلارى اۋرۋلارىن ەرتە انىقتاۋعا پروفيلاكتيكالىق تەكسەرۋ جۇرگىزىلدى.
ەمحانانىڭ ديسپانسەرلىك پاتسيەنتتەر جانە جوعارى جاستاعى توپ ادامدارىن قاراۋ ورتالىعىنا تەكسەرىلۋگە وسىندا تىركەلگەن سالا ارداگەرلەرى, 65 جاستان جوعارى ەگدە ادامدار كەلدى.
– ەمحانادا 20 شاقتى ءوز ارداگەرلەرىمىز, ياعني بۇرىنعى ارىپتەستەرىمىز بار. ولاردىڭ كەيبىرى ءبىزدىڭ ەمحاناعا تىركەلمەگەن بولسا دا, بۇگىنگى اكتسياعا كەلىپ قاتىسۋدا. سونىمەن قاتار وسى ارداگەرلەرگە ارنايى داستارقان جايىلىپ, كونتسەرت ۇيىمداستىرىلدى, سىيلىق تابىستالدى. جالپى ەمحاناعا 65 مىڭنان استام ادام تىركەلگەن, اتالعان اكتسيا اياسىندا سونىڭ ىشىندەگى ەگدە جاستاعى ازاماتتار كەلىپ قارالۋدا, – دەيدى اتالعان ەمحانا ديرەكتورى, استانا قالالىق ءماسليحاتىنىڭ دەپۋتاتى التىنشاش تابۋلدينا.
ەمحانا باسشىسىنىڭ ايتۋىنشا, بيىل مامىر ايىندا وسى جەردە ءبىرىنشى رەت ديسپانسەرلىك پاتسيەنتتەر جانە جوعارى جاستاعى توپ ادامدارىن قاراۋ ورتالىعى اشىلدى. بۇل ورتالىقتا ديسپانسەرلىك ەسەپتە تۇرعان ازاماتتار وزدەرى بولەك كەلىپ قارالادى, ۇدايى تەكسەرۋدەن ءوتىپ وتىرادى. قازىرگى تاڭدا ورتالىقتا سوزىلمالى اۋرۋلارى بار 9508 ادام تىركەلسە, سونىڭ ىشىندە 3895-ءى – 65 جاستان جوعارى ادامدار.
– تەكسەرۋ بارىسىندا ەكگ-دەن وتكىزەمىز, تالداۋ سىنامالارىن الامىز. ولاردىڭ دياگنوزىنا قاراي بارلىق تەكسەرۋ شاراسى جۇرگىزىلەدى, جاعدايىنا قاراي ودان ءارى ءتيىستى دارىگەرلەرگە جىبەرىلەدى. ءبىر ۋچاسكەدە تىركەلگەن مىڭ جارىمنان استام ادامنىڭ ەڭ ۇلكەنىنىڭ جاسى – 85-تە. جالپى 540 تىركەلۋشى تۇرعىن 65 جاستان اسقان. اكتسيا تۋرالى بارلىعىنا ءوزىمىز قوڭىراۋ شالىپ, حابارلاپ ايتتىق. ەگدە جاستاعىلاردىڭ كوبىندە كەزدەسەتىنى – جۇرەك-قان تامىرلارى اۋرۋلارى, – دەيدى اعا مەدبيكە كۇلزي ابەنوۆا.
