استانا قالالىق ارداگەرلەر كەڭەسى توراعاسىنىڭ ورىنباسارى قىزمەتىن اتقارىپ جۇرگەن ەسبولات دۇيسەنوۆ جەتپىس جاسقا تولىپ وتىر. جەتپىس مىڭنان استام ارداگەرى بار ۇيىمنىڭ جۇمىسىن جۇرگىزۋ – جەڭىل ەمەس. قارتتاردىڭ كەز كەلگەن جاعدايىمەن باراتىن ورىندارى وسى. سولاردىڭ ارقايسىسىنىڭ مۇڭىن تىڭداپ, شامالارى كەلگەنشە كومەكتەسۋگە تىرىساتىندار دا وسى ۇيىمنىڭ قىزمەتكەرلەرى. بۇدان جەتى جىل بۇرىن بۇل مەكەمەگە قىزمەتكە ورنالاسقان ەسەكەڭ سولاردى ۇيىمداستىرىپ, شەشۋىن تابۋعا كۇش سالۋمەن كەلە جاتىر. ۇرپاققا ۇلگى بولسىن دەگەن نيەتپەن ەسبولات قاسىمۇلىنىڭ وتكەن ومىرىنە كوز تاستايىقشى.
1961 جىل. تامىز ايىنىڭ ورتاسىندا اقكول اۋداندىق ءبىلىم بەرۋ ءبولىمىنىڭ بۇيرىعىمەن بۇدان بەس جىل بۇرىن ءوزىم بىتىرگەن كەڭەس ورتا مەكتەبىنە ديرەكتوردىڭ وقۋ وندىرىستىك سالاسىن باسقاراتىن ورىنباسارى جانە فيزيكا ءپانىنىڭ مۇعالىمى بولىپ ورنالاستىم. مەكتەپ اكىمشىلىگى باسقا سىنىپتارمەن قوسا, قازاقتىڭ توعىزىنشى سىنىبىنا فيزيكا پانىنەن ساباق بەرۋدى تاپسىردى. العاشقى ساباققا كىرگەنىم ءالى ەسىمدە. الدىمدا مەنەن نەبارى بەس-التى جاس قانا كىشى ۇلدار مەن قىزدار وتىر. جوعارى سىنىپ وقۋشىلارىنىڭ ادەتى عوي, جاڭا جاس ۇستازدى سىناي وتىرىپ, ونىڭ ءالسىز جاعىن تابۋعا تىرىسىپ, سول ارقىلى مۇعالىمدى بيلەپ العىلارى كەلەدى. سولاي ءبىر-ءبىرىمىزدى بايقاپ جۇردىك. ءبىراز ۋاقىتتان كەيىن بەلگىلى بولدى, ون جەتى وقۋشىنىڭ جەتى- سەگىزى ءتاۋىر وقيدى ەكەن. سولاردىڭ ىشىندە بەدەلى جوعارى, از سويلەپ, كوپ ىستەيتىن بەلسەندى جىگىتتەردىڭ ءبىرى ەسبولات دۇيسەنوۆ دەگەن وقۋشى بولدى. جۇپىنى كيىنىپ, ينتەرناتتا تۇرىپ جاتتى. ەكى جىل قاتارىنان فيزيكا پانىنەن مەنەن ءدارىس الدى.
ونىنشى سىنىپتا وقىپ جۇرگەندەرىندە, تەك قانا وسى سىنىپ وقۋشىلارىمەن عانا قوي باعۋعا بارۋ تۋرالى ۇگىت-ناسيحات جۇمىستارى جۇرگىزىلە باستادى. بۇلارمەن قاتار ورىس سىنىبى دا بولدى, بىراق ولاردى قوزعاعان جوق. ول كەزدە بۇعان ءمان بەرمەدىك. كەيىن بايقاپ قاراساق, سول كەزدەگى يدەولوگيانىڭ قۇيتىرقى ساياساتى – قازاق بالالارىنىڭ جوعارى ءبىلىم الۋلارىنا كەدەرگى جاساۋ, ول كەزدە جوعارىدان تومەن قاراي نەگىزگى باسشىلىق ورىنداردا ورىستىلدىلەر وتىردى. سونىمەن ون ءۇش بالانى كوندىرىپ, قوي باعۋعا جىبەردى. قازاق بالالارىن كوندىرۋدە سىڭىرگەن «ەڭبەگى» ءۇشىن سىنىپ جەتەكشىسى ماراپپاتتالدى. قوي باعۋعا باراتىنداردىڭ ىشىندە ەسبولات تا بولدى. ەكى جىل جاپان دالادا قوي باعىپ, العان بىلىمىنەن قارايىپ قالماۋ ءۇشىن تۇراقتى تۇردە دايىندالىپ, اۋىل شارۋاشىلىعى ينستيتۋتىنا تۇسەدى.
1970 جىلى ەڭبەك جولىن بولىمشە زووتەحنيگىنەن باستاعان ەسەكەڭ ءوزىنىڭ ءبىلىمدىلىگىمەن, ۇيىمداستىرۋ قابىلەتىنىڭ جوعارىلىعىمەن قىزمەت باسپالداعىمەن جوعارى كوتەرىلدى. ءبىر جىلدان كەيىن بۇلاندى اۋدانىنىڭ امانگەلدى كەڭشارىنىڭ باس زووتەحنيگىنە تاعايىندالادى. شارۋاشىلىق ون مىڭ قارا مال بورداقىلاپ, جىلىنا ءتورت-بەس مىڭ توننا ەت تاپسىرىپ تۇرعان. مال بورداقىلاۋدىڭ نەگىزگى اۋىرلىعى – باس زووتەحنيكتىڭ موينىندا. سول كەزدە وبلىستىق پارتيا كوميتەتىنىڭ مۇشەسى بولىپ سايلانعان. بۇل دا
ەسبولات قاسىمۇلىنىڭ ەڭبەگىن باعالاعاننىڭ ءبىر بەلگىسى جانە وعان دەگەن سەنىم.
سىلەتى اۋدانى ەرەيمەنتاۋ مەن اقكول اۋداندارىنىڭ شەتكى كەڭشارلارى مەن ەكى رۋدنيكتەن قۇرىلدى. جەر ايماعى جارتىلاي شولەيت, تەك مال شارۋاشىلىعىن دامىتۋعا نەگىزدەلگەن. مال شارۋاشىلىعىن جانداندىرادى دەگەن نيەتپەن ەسبولات دۇيسەنوۆتى اۋداندىق اۋىل شارۋاشىلىعى باسقارماسىنا باس زووتەحنيك ەتىپ جىبەرەدى. مۇندا دا ەكى جىلدان كەيىن باسقارمانىڭ ورىنباسارى, سودان كەيىن باسشىسى بولىپ ون سەگىز جىل ەڭبەك ەتەدى. وسى ۋاقىت ىشىندە اۋرۋعا ۇشىراعان ءتورت تۇلىك مالدى وڭالدىرىپ, شەتتەن ون ءتورت مىڭداي قۇناجىن اكەلىپ, اسىلداندىرىپ, مالدىڭ ءوسىمىن جاقسارتۋعا بار كۇش-جىگەرىن, قايراتىن جۇمسايدى. اۋدانعا ءۇش ءجۇز ەلۋ تۇيە اكەلىپ, ونى بەس جۇزگە جەتكىزەدى. اۋدان سوڭعى سەگىز جىلىندا مال ونىمدەرىنىڭ جوسپارىن ورىنداۋعا قول جەتكىزەدى. سىلەتى اۋدانى جابىلعاننان كەيىن, زەينەتكە شىققانعا دەيىن بۇلاندى اۋدانىنىڭ بەس كەڭشارىنىڭ باس ديرەكتورى, اتباسار اۋدانىنداعى م.گوركي كەڭشارىنىڭ, تسەلينوگراد اۋدانىنداعى «ورازاق» جشس ديرەكتورى قىزمەتتەرىن ابىرويمەن اتقارادى. بىلايشا
ايتقاندا, ەسبولات قاسىمۇلى قىرىق جىلعا تاياۋ ۋاقىتتا اقمولا وبلىسىنىڭ مال شارۋاشىلىعىن دامىتۋعا قوماقتى ۇلەسىن قوستى دەپ ايتا الامىز.
زەينەتكە شىققاننان كەيىن دە بۇگىنگى كۇنگە دەيىن استانا قالالىق ارداگەرلەر كەڭەسى باسشىسىنىڭ ورىنباسارى قىزمەتىن ابىرويمەن اتقارىپ كەلەدى. ءبىر جىلدا دۇنيە ەسىگىن اشىپ, بالا كەزىنەن بىرگە ءوسىپ, وتكەن عاسىردىڭ جەتپىسىنشى جىلدارى وتاۋ قۇرعان زايىبى ۇمىتپەن ءتورت بالا ءوسىرىپ, توعىز نەمەرە ءسۇيىپ وتىرعان بەلدى دە بەدەلدى وتباسى. ءۇمىت الىبەكقىزى دا كوپ جىلدار مەديتسينا سالاسىندا قىزمەت اتقارىپ, بۇگىندە قوعامدىق جۇمىستار اتقارىپ جۇرگەن جان. قازىر استانا قالاسىندا «الاش اماناتى» قازاق حورىنىڭ مۇشەسى.
ەسبولات قاسىمۇلى سىرت كوزگە قاراپايىم بولعانىمەن, ىسىنە تياناقتى, ادال, ءوز ءىسىنىڭ مامانى ەكەندىگى بايقالادى. قىزمەتتىڭ قاي سالاسىن اتقارسا دا, قاجىر مەن قايراتتى, مىندەت پەن پارىزدى ارقاشان قاتار ۇستاپ, بۇكىل سانالى ءومىرىن حالىق يگىلىگى ءۇشىن ايانباي ەڭبەك ەتۋگە ارناپ جۇرگەن ازامات.
ەركىن داۋەشۇلى, ارداگەر-ۇستاز
